PHILIPPIANS 1 - Pathen Thutheng BU (BSI)

Lemna

¹ Jesu Christa sohteni Paul le Timothy'in Philippi'a um Christa Jesu'a mithengte jouse hengle aumpiu houvaipole lhachaho henga;

² I-Pau Pathen le Pakai Jesu Christa-a konin lungsetle lungmon naheng uva umhen.

A Lekhathot Simho Dinga Paul Taona

³ Nangho kageldoh chanin a-imatih chanin Pathen kathangvah jingin;

⁴ Kataona jouse-a nangho nabon chaova dingin kipahtah-in kataojin ahi.

⁵ Amasapen nikho-a patna tuni geija Kipana Thupha-a neikiloi khompi jeh-un;

⁶ Nangho sunga thilpha pandoh-a ama chun Christa nikho ni geija abol molso ding ahi ti dettah-in kagingchai;

⁷ Chule nangho nabon chaova thudola keiman lung kahiti gel hi adih lam ahi; ajeh chu nangho kalung sunga kavop jing nahiuve; hiche jeh-a chu keima bulput thudola chule Kipana Thupha lama pana kihonna thuseile phudetna lam thudola, nangho nabon chaova keimatoh lungsetna kachan khompi nahiuve.

⁸ Ajehchu Jesu Christa milungset na-a chu nangho nabon chaova iti kangaiju hitam ti eihettoh peh-a Pathen ahi.

⁹ Chule keima hichena ding hin kataoji, nami ngailutnao chu hetna le gelkhen themna adima akhantou cheh akhantou cheh-a;

¹⁰ Chutia chu nanghon thil aphatah chu naphottoh theijuva; lung kitah-a chule suhkhel beihela Christa nikho ni geija naum uva;

¹¹ Pathen loupina le vahchoina dinga Jesu Christa-a kona umdoh chonphat ga chu nadimsetna dingun.

Hin hi Christa-a Ahi

¹² Sopiteho, nanghon hiche thuhi heleu chun kalung ahi, keima chunga thu soh chengse hi Kipana Thupha chalna dingjoh-a hung soh ahi;

¹³ Kabulput hi leng in jouse le mundang jouse-a Christa jala ahi ti chu akiphongtan ahi;

¹⁴ Chule sopite atamjon kabulput amuvin Pakai tahsan dettah-in, kicha louhelin thu asei angamui.

¹⁵ Atabbeh-in abangin mitthipna le kinelnan Christa chu aseiphong leuvin, chule abangin lungngeijin aseiphong leuvin ahi;

¹⁶ Loikhat chun kabulput chunga hi bolgentheija kaumna ding ngaitonan, lungdihtah pu-a hilouvin, chonoh nadingin aseiphong leuvin:

¹⁷ Adangho vang chun keima hi Kipana Thupha honna-a kitung kahi hi aheuvin, ngailutna neijah abolun ahi.

¹⁸ Achutia itiam? Phatlhemin hihen, thutah-in hijongle, itihen iti jongle Christa chu kiseiphonga ahi: chule hichea hin kakipah-e, henge, kakipa ding ahi.

¹⁹ Ajehchu hiche hi nangho taona le Jesu Christa Lhagao thilpeh vanga huhhing-a kaumna hung hi ding ahi ti kahei;

²⁰ Chutengle kalung tuple kakinepna dungjuija hi imacha-a kajachat louding ahi; ahinla a-imatih chana hakat tah-a kaum jingji banga chu tu-a jong kati chunga hi thina hihen hinna hileh, Christa chu choisanga umding ahi.

²¹ Ajeh chu keima dingin hin chu Christa ahin chule thi chu hamphatna ahi.

²² Ahinla tahsa-a hin hi keima ding tohga sona ahivangle, lhen dingjoh kahepoi:

²³ Ahin ni kah-a lunggima uma kahi; kipatdoh-a Christa toh umkhom chu kalung ahi; ijeh-inem itile hichu gamchenga pha chungnungjo ahi:

²⁴ Ahinla tahsa-a um chu nangho dinga khohjo cheh ahi.

²⁵ Chule nakhantouna dingule tahsan na-a nakipana dinguva kaum nalaiding, nabon chaova kaumpi ding nahiuve ti ginchat hi kaneije;

²⁶ Chutia chu nangho henga keima hung kit vanga keima-a dinga Christa Jesu'a nakipanao chu adimsetna dingin.

²⁷ Nanun nakhannu, nakhosah danu chu Christa Kipana Thupha toh kitoh pou pouhen; chutichun keima hungin hung mu jongleng, ahiloule umhih jeng jongleng, na-umchanu lhagao khattah-a nadindet jinguva, lung khattah-a Kipana Thupha ginchatna lama kisehtena na-umu thu chu janange.

²⁸ Chule nadouteu chu imachan kisuh lung linglausah hih-un; hichu amaho dinga manthah na photchena ahi; ahin nangho ding vangin Pathen'a kona huhhing-a umna ahi.

²⁹ Ajeh chu Christa-a tahsan jenga hilouva, ama dinga hesoh gentheisan thoh dinga jong, nangho lungsetna thilpeh kipe-a nahitaove.

³⁰ Nanghon masanga kagalsatje dan chu namusao ahin, tun jong najaove, nangho-a jong chutobang chu uma ahi.