Philemon 1 - Pathen Thutheng BU (BSI)

Thumakai

¹ Christa Jesu jala sohchang Paul le sopi Timothy'n katoh khompiu kadeitah Philemon,

² chule ingailutnu Appia chule kasepai chanpi Arkhippa, chule na ina kikhom houbung hichengse henga chun;

³ i-Pau Pathen le Pakai Jesu Christa-a konin nachung uva lungsetle lungmon umhen.

Philemon Ngailutna le Tahsan

⁴ Keiman kataona-a namin kaphan ka Pathen kathangvah jingin ahi;

⁵ Ajeh chu Pakai Jesu le mithengho jouse nangailut le tahsan thu chu kanajan ahi;

⁶ Nangma-a um chule Christa Jesu'a um thilpha jouse hetsahna hin natahsan chu thilpha bolthei asona din katao jinge.

⁷ Ajeh chu nangma ngailut chu hapan kakipapin kalungmonge; ajeh chu, sopi, nangma vangin mithengho alunghalui.

Onesimus Dinga Ngehna

⁸ Hijeh-a chu angai doltah-a bol dinga nangma thu peh ding Christa-a kangam jeng vangin,

⁹ ngailutna jala, tehse keima Paul Christa Jesu jala sohchang hi kahung taothojoh ahi;

¹⁰ Kakihen na sunga kahin kachapa Onesimus dinga kahung tao ahi;

¹¹ Ama hi khatvei chu nadinga phachom lou ahin, tu vangin nangma dinga jong, keima dinga jong, phachom ahitai.

¹² Amatah chu kalungtohtah ahin, nangma henga kahin solkit tai; hijeh chun ama anasangin.

¹³ Kipana Thupha jala kakihenna-a hi nangma thakhela eijenlea apantheina dinga keima kina dinga lhoden kagot ahin;

¹⁴ Ahivangin nangma lung hina louvin ima kabol nompoi; naphatna chu khoh bola kon hilouva, nangma chamchama ahinajoh dinga kati ahi.

¹⁵ Amapa hi tonsot geija nanei theina dinga, chomkhat dinga nakoidoh hikhat hinte;

¹⁶ Soh bang hita louva, soh sanga chungnungjo, sopi deitah bang hijohen, kei dingtah-a bon ahile, nangma dinga tahsa-a le Pakaiya gamchenga ha hicheh ahi.

¹⁷ Chuti chu ahile nangman keima hi tohkhompi tia neigela ahile, ama hi keima neilem ding khelin analemin.

¹⁸ Chule ama nangma chunga suhkhel nei ahi jongle, ahilouva nabat aum jongle, hichu keijan simjengin,

¹⁹ Keima Paul'in kakhut tah-a kasut ahi, keiman sanange: hichu, nangma tah-in keima neibat chu neisan, tia kasei ahipoi.

²⁰ Ahi, sopi, nanga konin keima Pakaiyah phatchomna neineisah-in; nangman keima Christa-a neisulung halin.

Thu Chaina

²¹ Naseingai gingcha tah-a kahinsut ahi, kathusei chu akalvala phajon bolinate, ti kahei.

²² Chujongle kalhunna ding mun gotsan anakoijin; ajeh chu nangho taona vangin nangho henga peh-in uminge ti kakineme.

²³ Christa Jesu'a kasohchanpi Epaphras'in nasalame;

²⁴ Marcus, Aristarchus, Demas chule Luke, kakithopiho hicheng hin nasalamui.

²⁵ I-Pakaiyu Jesu Christa milungsetna chun nalhagaovu umpihen. Amen.