Micah 1 - Pathen Thutheng BU (BSI)

¹ Judah lengho Jotham, Ahaz chule Hezekiah nikholaijin Moresheth mi Micah henga Pakai thu hunglhung, Samaria le Jerusalem chung chang thudolla athilmu.

Samaria le Jerusalem'a Dinga Lunghemna

² Ngaijun nangho mijousen; Vo leisetle asunga um jousen, ngaitemun; Pakai Pathen chu nangho douna-a ahetoh hihen, a-houin thenga kona Pakai chu ahetoh chu hihen.

³ Ajehchu veuvin, Pakai chu aumna munna kona hung potdoh-a, leiset munsang ho chu achotpha ding ahi.

⁴ Chule mei koma khoilu jun bangle, twiho mun nema akisunlhah bang hella, phaicham ho chu khikeh-a, molsangho chu anoija junlha ding ahi

⁵ Hicheho jousehi Jacob khan gitlou jehle, Israel insung chonset jeh ahi. Jacob suhkhelna ipi ham? Samaria chu hilou ham? Chule Judah munsang ho chu ipi ham? Jerusalem chu hilou ham?

⁶ Hijeh-a chu keiman Samaria chu gamlah-a thilnen kisekhom banga kasema, chule lengpi leija kibol ding; Chule chua songho chu damphaija kasunlhah-a, abul ho chu kadosah ding ahi.

⁷ Chule alim semthu milim jouse chu kavohchip gam hella, noti mana amu jouse chu meija kahal vam gamhel ding, chule milim jouse chu kasuh manghel ding ahi; ajehchu amanun noti mana kon alokhom ahijeh-in, hicheho chu noti man mama-a kilekit ding ahi.

⁸ Hijeh-a chu kaka-a kapen ding, kakisut lha-a sagoh keova kaumding ahi. Dragon ho bangin penging ting, sumbupi bangin haminge.

⁹ Ajehchu amanu maput chu damkit theilou ahi: ajehchu hichehi Judah gam alhungtan, kamite kotpi phung ahung lhungtan, Jerusalem jengjong ahung lhungtai.

Melmaten Jerusalem Ahin Naiju

¹⁰ Hichehi Gath kho-a seiphong hih-un, kapjong kaphih hellun; Aphrah insunga leivui lah-a chun kitangle leovin.

¹¹ Vo Shaphir'a chengpa nangma, sagoh keovin jahcha tah-in chemangtan, Zaanan miho chu Bethe-zel miho lunghemna-a dingin apotdoh pouvin, aman nangma-a kona dinmun akimuding ahi.

¹² Maroth mihon chingthei tah-in chanpha angahuvin, ahinla Pakaiya konin thilse chu Jerusalem kotpi phung ahunglhung suhtai.

¹³ Vo, nangho Lachish mite, kangtalai chu gamsa hattah toh sutouvin; amanu hi Zion chanute chonset kipatna ahin, ajehchu Israel suhkhelna chu nanga akimudoh-in ahi.

¹⁴ Hijeh-a chu nangin Moresheth-gath henga thilpeh napeh ding, Achzib inho chu Israel lengho dinga lheplhahna hiding ahi.

¹⁵ Ahinla vo Mareshah mi, nangma goulo ding khat nahenga kahin puiding; Israel loupi nachu Adullam geija hung ding ahi.

¹⁶ Nasam kivel tollin, nacha ngaitahho jallin kivel tollin; mulaopi lumui bangin kivou muijin, ajehchu amaho nanga kona gal hinga che ahitaove.