Amos 1 - Pathen Thutheng BU (BSI)

¹ Ling kiho kumni masang, Israel leng Joash chapa Jeroboam nikholai, chule Judah leng Uzziah nikho laija Israel chungchang thu; Tekoa mi, kelngoi ching holah-a pang Amos'in anamu thuho chu ahi.

² Chule aman aseije, Pakai chu Zion'a kona hung kitumding, Jerusalem'a kona aw ginga thu aseiding; kelngoi chingho chenna chu lunghem ding, chule Carmel molvum chu golha ding ahi.

Syria Chunga Pathen Thutanna

³ Pakaiyin hitin aseije; Damascus suhkhelna thumle liho jeh-a, Keiman achunguva chuding talen chu kalahdoh lou ding ahi; ajehchu amahon Gilead chu changchilna thih manchah-in achilun ahi.

⁴ Ahinla keiman Hazael insunga meikong kahinsol ding, hichun Ben-hadad leng inpiho ahalvam ding ahi.

⁵ Keiman Damascus jol jong kaheboh ding, Aven phaichama chengho le, Eden insunga kon leng tenggol tuhpa chu kasat lhah ding ahi. Chule Syria mite chu Kir chana gal hinga kikaidiu ahi, tin Pakaiyin aseije.

Philistia Chunga Pathen Thutanna

⁶ Pakaiyin hitin aseije; Gaza suhkhelna thumle liho jeh-a, Keiman achunguva chuding talen chu kalahdoh lou ding ahi; ajehchu amahon Edom mite pehdoh dingin, sohchangho chun abonun gal hingin akaijun ahi.

⁷ Ahivangin keiman Gaza bang chunga meikong kahinlelhah ding, hichun leng inpiho chu ahalvam ding ahi.

⁸ Chule keiman Ashdoh kho-a chengho le Ashkolon'a kon leng tenggol choipa chu kakaidoh ding, chule keiman Ekron chunga kakhut kalhah ding ahi: chule Philistine mite ahingdoh amoh chengse chu mangthah ding ahiuve, tin Pakai chun aseije.

Tyre Chunga Pathen Thutanna

⁹ Pakaiyin hitin aseije; Tyre suhkhelna thumle liho jeh-a, Keiman achunguva chuding talen chu kalahdoh lou ding ahi; ajehchu amahon gal hinga kimanho jouse chu Edom apetan; hiti chun sopi hina-a kitepna chu ageldoh tapouve.

¹⁰ Ahinla keiman Tyre bang chungna meikong kahin lelhah ding, hichun leng inpi chu ahalvam ding ahi.

Edom Chunga Pathen Thutanna

¹¹ Pakaiyin hitihin aseije; Edom suhkhelna thumle liho jeh-a, Keiman achunguva chuding talen chu kalahdoh lou ding ahi; ajehchu aman asopipa chu chemjamin adelin, khotona kiti himhim adontapoi, hitichun alunghana-a chun suhset aneijingin, chule alungsatna chu a-itih in avopjingin ahi.

¹² Ahinla keiman Taman chunga meikong kahinlelhah ding, hichun Edom sunga um Bozrah leng inpi chu akahvam ding ahi.

Ammon Chunga Pathen Thutanna

¹³ Pakaiyin hitin aseije; Ammon chate suhkhelna thumle liho jeh-a, Keiman achunguva chuding talen chu kalahdoh lou ding ahi; ajehchu amahon gamsung kehlet ding deinan Gilead'a um numei ho naovop lai ho chu akhe jalun ahi.

¹⁴ Ahivangin keiman Rabbah bang chunga mei kakonsah ding, galsat nikho-a kisen awgin toh, chimpei kipei nikho-a huipi toh tho-a, aleng inpi hou ahalvam ding ahi.

¹⁵ Chule alengpau chu gal hinga kikai mangding, ama le apipuihou puma kaimanga umding ahiuve, tin Pakaiyin aseije.