YOEL 1 - SURAT TUHAN Dahun Kayan 1990

Daha' namu luman daha'

¹ Nunih nah dahun Tuhan men Yoel anak Petuel

² U ikam aleng uh dekaya', kelenghi nah dahuk anih, lim ikam alem daléh anih, ting nah iling kam. Té' kah ket aleng nunih alem urip kam uh men'a iah, dahin alem urip sepun kam lahuh?

³ Sayu nah kelo' bara tuk anih men anak kam, ja anak kam pah bara na' men anak-anak daha' baya, anak-anak daha' pah bara na' men anak daha' la'an.

⁴ Ket aleng melek en tumeng kani, paho' kalap pah nei kani na', ket en paho' kalap lek, paho' jangin pah kani na', dahin nun aleng en paho' jangin lek, paho' paeri pah nei kani na'.

⁵ Mengan nah, u ikam aleng mengalei mavuk, nangih nah ikam! U lim ikam aleng du'i ata' aleng la'it, nelahung nah namu ata' agun aleng maring, avin nusi' nah té' ata' agun aleng maring la'an en kam du'i.

⁶ Avin uh té' nah ji bengsa' aleng tu'a dahin em deng ta' ujap kahum daha', nei nyudung daléh kui. Ipen daha' awi ipen singa', avei daha' pah awi avei singa' doh.

⁷ Banah agun kui uh en daha' manit, dahin pa'un iung bua ara kui uh pah berit, en daha' ka' nah lim kun-kun na' pelalau en daha' sau, ateng da'an-da'an na' pah tegang tua.

⁸ Nirau nah awi ji nyemdoh aleng meté' basung lumuh, avin iha' namu laké' aleng teng na' atih.

⁹ Uli tuvuh dahin ket du'i en daha' uk men Tuhan bara bun usu daha' dih, uh em té' alem Uma Tuhan la'an. Lun ji'ek kenep nah daha' imam-imam, iha' tih daha' aleng nyadui men Tuhan.

¹⁰ Luma' hu'uh langah, tana pah uh tei tegang, lim-lim parei pah hu'uh jangau tua, agun pah hu'uh kelubei, anyih pah hu'uh em té' la'an.

¹¹ U ikam aleng na luma', melak nah! Ikam aleng na lida atih pah, nangih nelahung, avin parei dahin jelei hu'uh ji'ek, uli luma' kam uh em té' loh.

¹² Banah agun hu'uh megang, bua ara pah lahuh hu'uh mangau, iung levang dahin iung bua korma dahin iung limau pah uh kelubei, lim-lim iung bua ha' luma' hu'uh kelubei lahuh. Lan, lim kenep kelunan lahuh uh tei pasi tua.

¹³ U ikam imam-imam, ngetutuk nah ikam té' keluma' lmuh kam, pelalau nangih. U ikam aleng nyadui té' béh avo' laluh, nangih nah ikam. Tei nah ikam halem Uma Tuhan, pah malem meté' keluma' lumuh kelo' anan, u ikam aleng nyadui men Allah kui, avin uli tuvuh en daha' uk men Tuhan dahin ata' agun en daha' uk men Tuhan bara bun usu daha', nusi' nah té' na'.

¹⁴ Na nah ji dau pelien aleng ma'ang, en uvui nah daha' nei pelemana' sayu-sayu. En peng nah lim-lim daha' aleng dekaya'-dekaya' dahin lim daha' huang daléh anih ha' Uma Tuhan Allah tam, hinan nah ikam ngetalau-ngetalau té' Tuhan.

¹⁵ Hayah, nuno' kah dau anan! Uh jeleng lan nah dau Tuhan. Dau anan ateng awi ji ket aleng nasa' aleng nei men Iha' Aleng Kelalau Ningan.

¹⁶ Kitan matan tam kah iha' uh em té' kanen. Kelu'an dahin pedéng tam melu uh em té' la'an ha' Uma Allah tam.

¹⁷ Lim beni alem tana uh tegang, lepau parei pah hu'uh halah. Lim lepau parei hu'uh puva, avin em té' parei seng en tei halem na' la'an.

¹⁸ Lim hulung-hulung pah katé' kenep! Sapi'-sapi' meté' medéng avin nusi' nah té' uro' kanen daha' la'an, lim-lim daha' duba pah katé' lahuh.

¹⁹ U Tuhan, akui medéng ngetalau Ika', avin ketu tana ngavan hulung murip hu'uh pah en paui nutung, kelat apui anan pah uh nutung lim-lim iung kayo' ha' luma'.

²⁰ Nurei lahuh tulan-tulan aleng alem uro' pah ngetalau Ika', avin lim iung hungei hu'uh keté', lim tana ngavan tulan-tulan murip pah hu'uh en apui nutung.