RUT 1 - SURAT TUHAN Dahun Kayan 1990

Elimelekh dalo' anak na' ha' Moab

¹ Alem daha' aleng petneng atih dih gem pelitah ha' tana Israel, té' nah ji lien aya'. Tei nah ji laké' dahin hawan na' dahin dua' anak-aké' na men Betlehem-Yehuda tei ha' daléh Moab melo' hinan awi kelunan aleng daméh.

² Aran laké' anan Elimelekh, aran doh na' Naomi, aran anak dawa', Mahlon dahin Kilyon, dalo' anih kelunan Efrata men Betlehem-Yehuda. Tegu dalo' ateng ha' daléh Moab, pelalau nah dalo' melo' hinan.

³ Jarun dalo' melo' hinan matei nah Elimelekh hawan Naomi nan dih, melek nah doh anan dahin dua' anak-aké' na'.

⁴ Dawa' anak anan pah ngehawa' doh daha' Moab, aran ji men dawa' Orpa, aran ji Rut. Murip nah dalo' hinan kio'-kio' pulu duman dara na'.

⁵ Uh anan matei nah Mahlon dawa' Kilyon, jadi' doh aya' anan melek dep, hawan na' ji'ek em té', anak na' pah em té' lahuh.

Naomi dahin Rut uli ha' Betlehem

⁶ Men daléh Moab anan nah Naomi kelenghi dengah Tuhan uh té' masi daha' anak Na' ha' daléh Yehuda, ma'uk parei men daha'. Avin anan iha' dahin dawa' anak-divan na' anan dih petmei ketanun dalo' ja dalo' seng tei leka'.

⁷ Leka' nah dalo' men ngavan dalo' anan. Alem dalo' té' té' hang alan seng tei uli ha' tana Yehuda,

⁸ ken Naomi men dawa' anak-divan na' anan, “Tei nah kua' uli ha' amin hinan kua', sayu nah Tuhan masi kua' piah awi kua' pah uh masi dalo' aleng uh melek telo' anih dih, awi kua' uh masi akui lahuh.

⁹ Akui nginah té' Tuhan tua aleng seng nyingau kua' té' alem amin hawan kua'.” Lun petabi' nah dalo', beka' nangih aya'-aya' nah dawa' pelalau kuma',

¹⁰ “Nusi' kawa' ngenep tei uli Inei, adang kawa' ngioh ika' kah anih tei uli ha' bengsa' ka'.”

¹¹ Bi ken Naomi, “U anak kui, tei nah kua' ji'ek uli, na' nun kua' ngenep nei dahik? Seng té' anak-aké' alem butit kui nih ek nganak la'an jadi' hawan kua' baya tih iah?

¹² Tei nah kua ji'ek uli, avin uh muku lan nah akui, em deng seng ngehawa' la'an. Awi akui ji'ek pah ala laké' dahin peji malem anih dahin na', dahin nganak anak laké' la'an,

¹³ seng deng kua' pidah dawa' ateng dawa' deng ngehawa' kua' iah? Seng deng kua' pihen em ngehawa' jarun kua' pidah anan iah? Meng nah kua' ji'ek na nunan, u anak kui, avin uh katé' lan nah kenep kui pelemana' kua', avin Tuhan uh mivi usu Na' té' akui nunih.”

¹⁴ Nangih aya' nah dalo' la'an, pelalau en Orpa tabi' nah hinan-divan na' la'an, bara iha' ngenep tei uli, bi Rut pa'en ngelameng hinan-divan na' anan.

¹⁵ Ken Naomi men Rut, “Nyineng im, hangu ka' uh tei uli pala bengsa' na', dahin pala lim ket avan na' sebayang. Tei nah im lahuh uli ngioh hangu ka' tih.”

¹⁶ Rut nyu'ei iha', “Meng im ngepden akui tei uli seng melek ika', dahin em mun akui ngioh ika', Inei, avin hino'-hino' ka' seng tei, hinan pah akui seng tei, hino' ka' seng tudu, hinan pah akui seng tudu lahuh, bengsa' ka' anan pah bengsa' kui lahuh, dahin Allah ka' anan pah Allah kui lahuh.

¹⁷ Hino'-hino' ika' matei, ju hinan kah akui matei lahuh, Inei, dahin seng en tanem tinan lahuh. Bei nah Tuhan em mukum akui awi akui mebet jaji kui dahim. Ki'an patei tua kah aleng seng metat itu.”

¹⁸ Tegu Naomi jam Rut tangen lan-lan ngenep tei ngioh iha' nunan, nusi' nah iha' kaséh ngepden iha' la'an.

¹⁹ Iha' nah dawa' leka' la'an. Panau nah dawa' ateng ha' Betlehem. Hawen tua daha' huang daléh anan tegu daha' jam dawa', iha' nah daha' doh kuma', “Naomi anan du?”

²⁰ Ken na' nyu'ei daha', “Meng metut aran kui Naomi. Sayu metut aran kui Mara, avin Iha' Aleng Kelalau Ningan hu'uh na kahum na'an ji'ek té' akui.

²¹ Ngahum daven kui aring kui tei dih, bi Tuhan muli akui hinih dahin em té' nun-nun la'an. Na' nun ikam metut aran kui Naomi, avin Tuhan hu'uh bara ji'ek kui, Iha' Aleng Kelalau Ningan anan pah hu'uh menei katé' té' akui.”

²² Nunan nah tuk na' Naomi tei uli, dahin Rut anak-doh-divan na' men Moab atih, aleng nei ngioh iha' uli men daléh Moab. Dawa' ateng ha' Betlehem men aring-aring jaka' daha' ngelunau.