MARKUS 1 - SURAT TUHAN Dahun Kayan 1990

Hadui Yohanes aleng Meduh

¹ Anih nah aring-aring dengah sayu marung Yesus Kristus, Anak Allah.

² Alem surat nabi Yesaya té' kalung aleng nunih dahun na', “Nyineng, Akui nyihu sihu Kui tei una' té' Ika', aleng seng petmei alan Ka',

³ iha' tih dahun kelunan aleng medéng-medéng ha' tana ngahit, Nemei nah alan Tuhan, dahin nutau nah avan Na' panau” ken na'.

⁴ Yohanes aleng Meduh kelunan atih nei nyemau ha' tana ngahit atih, dahin pedengah marung duh aleng bara ngelisah kenep aleng avan sala pebet.

⁵ Lun musang nah lim-lim huang daléh Yudea tei pala iha', dahin lim-lim huang daléh Yerusalem pah lahuh, en na' duh nah daha' alem hungei Yordan, alem daha' akun sala daha'.

⁶ Kanan Yohanes tih en daha' na men bulun hulung unta, jet na' anit, ket en na' kani, paho' dahin nyihun hinget.

⁷ En na' katuk nah kelunan, ken na', “Té' ji aleng seng nei ngebaya akui, aleng lalau dekaya' men'uh akui. Nudok muvan talé' kasut Na' pah akui em tekep.

⁸ Té' pah akui anih meduh ikam té' ata', bi Iha' atih seng meduh ikam té' Belua' Ma'ang,” ken na'.

Yesus en Yahya duh

⁹ Tegu atih Yesus nei men Nazaret aleng alem daléh Galilea, en Yohanes duh nah Iha' alem hungei Yordan.

¹⁰ Tegu Iha' peju men alem ata' atih, en na' nyineng nah langit neng'ap, Beluan Allah pah nei ngiléh té' Iha' awi jam tuk ji manuk sepukun.

¹¹ Nei nah ji daho' men langit, aleng kuma', “Ika' anih nah Anak Kui aleng Ek nyalam, aleng ngavan kenep Kui melu,” ken daho' atih.

Setan pesek Tuhan Yesus

¹² Tegu atih pah en Belua' geri nah Yesus ha' tana ngahit.

¹³ Té' nah Iha' tinan ha' tana ngahit tih pat-pulu dau dara na', hinan nah Setan pesek Iha'. Iha' murip té' hang tulan-tulan aleng hatan, meliket pah masi Iha'.

Hadui Yesus ha' tana Galilea

¹⁴ Tegu Yohanes uh en daha' apuh, nei nah Yesus ha' daléh Galilea, pedengah dengah sayu Allah.

¹⁵ Ken Na', “Jaka' na' uh ateng, keligem Allah pah hu'uh jeleng. Ngelisah nah ikam, nginah té' dengah sayu anih,” ken Na'.

Yesus muvui pat la'ung

¹⁶ Alem Iha' panau-panau té' béh bawang Galilea, en Na' nyineng nah Simon dahin Andreas harin Siomon tih alem dawa' biving jala té' bawang, avin dawa' atih kelunan aleng ngejala'.

¹⁷ Ken Yesus men dawa', “Nei nah kua', ngioh Akui. Akui seng na kua' ngejala' kelunan.”

¹⁸ Pelalau dawa' melek jala' dawa', pelalau ngioh Iha'.

¹⁹ Alem Iha' panau men inan, nusi' payan Iha' nuno' su la'an, en Na' nyineng nah Yakobus dawa' Yohanes harin na' tih, aleng anak Zebedeus, alem dalo' atih melo' alem haruk manyut jala' dalo'.

²⁰ Pelalau en Na' uvui nah dawa', dawa' atih pah melek Zebedeus taman dawa' alem haruk dahin kelunan aleng nyuwa atih lahuh, pelalau dawa' tei ngioh Yesus.

Yesus muga to'

²¹ Tei nah dalo' ha' daléh Kapernaum. Tegu Dau Kelarah, pelalau tei nah Yesus alem uma sebayang, dahin katuk daha'.

²² Ngeniheng nah daha' té' katuk Na' atih, avin Iha' pekatuk daha' awi kelunan aleng nyemugen, dep lelan katuk Na' men'uh daha' aleng puboh surat Tuhan.

²³ Tegu anan té' nah ji la'ung alem uma sebayang atih aleng té' to' nilung halem na' aleng meté' medéng,

²⁴ ken na', “U Yesus, kelunan Nazaret, nuno' kah tuk kamé' seng piah kenep Ka'? Ika' nei seng nasa' kamé' anih iah? Akui jam Ika' anih. Ika' anih nah Aleng Ma'ang, aleng nei men Allah,” ken na'.

²⁵ En Yesus mano' nah iha', ken Na', ‘Tepaka' nah im. Musang nah im men kelunan anih,” ken Na'.

²⁶ Ngepu'an nekjen tua nah kelunan anan kenan to' atih pelalau medéng aya', pelalau musang nah iha'.

²⁷ Ngeniheng tua nah daha' lim, ateng daha' pepteng pedeng daha' dahin kuma', “Ket nun anih pa? Katuk maring anih iah? Alem tingan Iha' duan to', daha' pah ngioh dahun Na'.”

²⁸ Salet nah dengah marung tuk Yesus anan putat hino'-hino' tei alem lim-lim daléh Galilea.

Yesus petagéh daha' kahum

²⁹ Tegu dalo' musang men alem uma sebayang, pelalau dalo' tei halam uma Simon dahin Andreas, Yohanes dawa' Yakobus pah tugung.

³⁰ Té' hinan-divan Simon ngeluvan avin iha' larem, pelalau dalo' bara Yesus.

³¹ Tei nah Iha' gem usu na', meju iha', pelalau tengau nah iha' men larem na' atih, pelalau nyamah té' dalo'.

³² Uh levi nah dau, tegu matan dau ngesem, en daha' geri nah lim kelunan aleng perah pala Iha', dahin kelunan aleng ngavan to' nilung.

³³ Lim huang daléh atih pah pepeng té' ba ketamen.

³⁴ Pelalau en Na' petagéh nah daha' kahum aleng perah kelesé'-kelesé', to' pah kahum en Na' sau, nusi' Ha' mun to' atih duan, avin jam to' atih nelana' Iha'.

Yesus sebayang ha' ngavan aleng henung

³⁵ Tegu jihima pesun-pesun alem ha' lidem loh kah, ma'un nah Yesus, pelalau musang tei ha' ji ngavan aleng henung, hinan nah Iha' sebayang.

³⁶ Simon dahin dalo' aleng dahin na' pah behi'a Iha'.

³⁷ Tegu dalo' pesuk Iha', dalo' kuma' men Iha', “Lim kelunan ilau Ika'.”

³⁸ Ken Yesus men dalo', “Tei nah itam ha' béh ha' uma aleng jeleng anih, ja Akui deng katuk hinan lahuh, avin anan nah tavit na' Akui nei ateng nih,” ken Na'.

³⁹ Pelalau tei nah Iha' halem lim uma sebayang ha' lim tana Galilea, dahin katuk dahin mesau to' lahuh.

Yesus petagéh kelunan aleng perah malin

⁴⁰ Nei nah ji la'ung kelunan aleng perah malin pala Iha' akei asi lelan té' Iha' dahin nyepukun ha' unan Na', ken na' “Awi ha' kenep Ka', adang Ika' haman na akui ma'ang.”

⁴¹ Pelalau perah hengan Na' masi iha', pelalau en Na' jei nah usu Na', Na' gem iha', ken Na' men iha', “Ngenep kah Akui. Ma'ang nah im.”

⁴² Tegu atih pebet nah perah malin atih, pelalau ma'ang nah iha'.

⁴³ En Na' bara nah iha' petajen, dahin pelalau nyihu iha' tei,

⁴⁴ ken Na' men iha', “Hituk nah im lelan, men ji kelunan pah meng im bara nun-nun. Bi tei nah im bara batung ka' men laké' imam dahin ma'uk bun usu ka' aleng hu'en Musa, ja ika' ma'ang, iha' atih tada' men daha',” ken Na'.

⁴⁵ Bi musang nah laké' atih, pelalau bara dengah hiréh-hitih ateng ino'-ino' tih, dahin mutat daho' atih, ateng Yesus em deng tei tula la'an tei alem daléh aya', bi Iha' té' ha' tana aleng henung tua, kahum loh kah kelunan men ino'-ino' tei pala Iha'.