LUKAS 1 - SURAT TUHAN Dahun Kayan 1990

Atoh na'

¹ U Teofilus aleng maren, kahum kelunan aleng uh tengayet ngalung lung aleng uh jadi té' hang tam,

² awi aleng uh en daha' bara men itam anan, iha' tih kelunan aleng men aring-aring hu'uh nyineng té' matan daha', aleng hu'uh pedengah daho' atih.

³ Avin anan akui aleng uh ngetneng lim-lim lung anan men pa'un na', tekep kah akui ngalung na' men ika' dahin peken'an na',

⁴ ja ika' jam lan lim daho' aleng en daha' bara men ika' anan atek teneng lan.

Kanak Yohanes aleng Meduh en meliket nira

⁵ Men alem urip Herodes laja' daléh Yudea, té' nah ji la'ung imam aran na' Zakharia, iha' tih ji men daha' aleng asah Abia, doh Zakharia nih men pahu Harun, aran na' Elisabet.

⁶ Té' pah dawa' atih kelalau teneng ha' unan Allah dahin ngioh lim dahun tebara Tuhan dahin alan Na', barik dawa' pah peletu em té' tuten lahuh.

⁷ Bi dawa' atih em té' anak, avin Elisabet nyalun, pija' pah dawa' uh muku aya'.

⁸ Bi ji hangun tegu Zakharia gem hadui imam ha' unan Allah,

⁹ daha' na pili ilau hi aleng gem hadui imam tei pahun kemanyan alem Uma Allah, iha' pah aleng ga' pili tei na hadui atih.

¹⁰ Lim peng daha' kahum atih sebayang hawang tegu jaka' pahun kemanyan atih.

¹¹ Lun tula nah té' Zakharia ji meliket nei nekring bah ta'o té' dangin kemanyan atih.

¹² Pelalau tekjet nah Zakharia nyineng iha', dahin kelalau takut.

¹³ Bi kuma' nah meliket atih men iha', “Meng takut, Zakharia, avin dahun sebayang ka' hu'uh en Tuhan kelenghi, dahin doh ka' Elisabet atih seng nganak men kua' ji anak laké'. Sayu nah im na aran na' Yohanes.

¹⁴ “Ika' seng melu dahin sayu lelan kenep, dahin kahum kelunan seng melu té' kanak na',

¹⁵ avin iha' aleng seng dekaya' té' unan Tuhan. Nusi' ha' seng du'i ata' agun dahin du'i ata' aleng la'it, iha' pah seng penu dahin Belua' Ma'ang men alem butit hinan na'.

¹⁶ Kahum kelunan men pahu Israel seng nei uli pala Tuhan Allah daha' kenan na'.

¹⁷ Iha' nah aleng seng panau ha' unan Tuhan dahin belua' dahin tingan awi anun Elia, iha' seng ngelisah kenep taman daha' pala anak daha', iha' aleng seng ngelisah kenep kelunan aleng muau na daha' nei nyemugen, piah daha' aleng teneng, iha' nah iha' petmei ji pahu men Tuhan.”

¹⁸ Ken Zakharia men meliket atih, “Seng nuno' tuk akui jam daho' anih nei teneng lo? Avin akui uh muku, hawak pah uh muku aya' lahuh.”

¹⁹ Bi meliket atih nyu'ei dahin kuma' men iha', “Akui anih nah Gabriel aleng nekring ha' unan Allah, akui pah en Na' nyihu nei bara ika' dahin geri men ika' dengah sayu anih.

²⁰ Hituk nah im, ika' seng jadi' mameng, nusi' peletu ika' deng duan la'an ateng tuk anih nei la'ung na'a, avin ika' em nginah té' dahuk aleng adang seng la'ung tegu jaka' na'.”

²¹ Alem nunan dih kahum kelunan pidah Zakharia nei musang. Ngeniheng tua nah daha' avin iha' kelalau dara alem Uma Allah atih.

²² Tegu iha' musang nusi' nah iha' deng tengaran dahin daha' atih, daha' pah jam iha' uh jam ji ket en na' nyineng halem Uma Allah. Ngatah-ngatah tua nah iha' tengaran daha' atih avin iha' tei mameng nutih.

²³ Tegu iha' uh lepek lim hadui na' tegu jaka' anan, uli nah iha' ha' uma na'.

²⁴ Ngebaya men'uh atih dih, mali nah Elisabet, doh na' atih, pelalau murip sihuk alem lima' bulan dara na', dahin kuma',

²⁵ “Anih nah hadui Tuhan men akui tegu Iha' nyineng akui, ngenep mebet ha'éh kui ha' unan kelunan.”

Kanak Tuhan Yesus en meliket nira

²⁶ Kenem bulan ali Elisabet nan en Allah nyihu nah meliket Gabriel tei ha' daléh aleng alem daléh Galilea, aran na' Nazaret,

²⁷ tei pala ji nyemdoh aleng teng ji laké' aran na' Yusuf, aleng pahu Daud. Aran nyemdoh atih, Maria.

²⁸ Meliket atih pah tei pala iha' dahin kuma', “Sayu lan nah men ika' aleng hu'uh ala asi Tuhan. Tuhan nah aleng dahim.”

²⁹ Pelalau tekjet nah iha' avin dahun meliket anan nunan, pelemana' nah iha' té' alem daho' atih.

³⁰ Ken meliket atih men iha', “Meng takut, u Maria, avin ika' uh ala asi men Allah.

³¹ Lan ika' seng mali, ika' pah seng nganak ji anak laké'. Sayu nah im na aran Na' Yesus.

³² “Iha' aleng seng dekaya', Iha' aleng seng en daha' kuma' Anak Allah aleng Kelalau Bau, avin Tuhan Allah seng ma'uk men Iha' ladung aren Daud sepun Na' menuna' atih.

³³ Iha' pah seng jadi' laja' té' ujung pahu Yakub pa'en-pa'en, dahin keligem Na' atih pah em té' ka'uh na'.”

³⁴ Pelalau ken Maria men meliket atih, “Seng nuno' tuk akui jam daho' anih nei teneng, avin akui em payan ga' laké'?”

³⁵ Bi nyu'ei meliket atih dahin kuma' men iha', “Belua' Ma'ang seng nei nesun té' ika', dahin tingan Allah aleng Kelalau Bau seng nyingau ika'. Avin atih lahuh Iha' aleng seng in nganak atih seng en daha' kuma' Ma'ang, dahin kuma' Iha' Anak Allah.

³⁶ Nunan kah harin-higet ka' Elisabet atih hu'uh mali, iha' seng nganak ji anak laké' alem uku na'. Kerei inih iha' uh nem bulan dara na' iha' mali, bi menuna' daha' kuma' iha' nyalun,

³⁷ avin ji-ji pah dahun Tuhan em tei halah.”

³⁸ Ken Maria, “Lan nah akui anih panyin Tuhan, sayu nah lim ket aleng im tira anan nei teneng men akui.” Uh anan leka' nah meliket atih men béh na'.

Maria tei panau ha' Elisabet

³⁹ Men tegu atih lahuh leka' nah Maria dahin salet, tei ha' daléh ngalang té' daléh Yehuda,

⁴⁰ pelalau tei nah iha' alem uma Zakharia dahin pelalau pejamat dahin Elisabet.

⁴¹ Tegu Elisabet pejamat dahin Maria atih, ngalep nah anak alem butit na' atih dahin Elisabet pah penu dahin Belua' Ma'ang.

⁴² Pelalau iha' medéng dahin dekaya' dahun na', “Sayu lan nah ika' men hang lim doh, nurei kah anak aleng im mali anan lahuh.

⁴³ Nuno' pah tuk hinan Tuhan kui nih nei jam akui nunih lo, bareng si' ita' awi kelunan dih iah?

⁴⁴ Avin lan tegu akui kelenghi dahum nei jamat akui, ngalep nah anak anih alem butit kui avin iha' melu.

⁴⁵ Sayu lan nah men ika' aleng hu'uh nginah anih, avin ket aleng hu'uh en Tuhan bara men ika' Tuhan seng menei na'.”

⁴⁶ Lun ken Maria, “Kenep kui meju lan aran Tuhan,

⁴⁷ dahin beluak petenglu alem Allah Aleng Pekurip akui,

⁴⁸ avin Iha' uh nyineng panyin Na' aleng ji'ek. Men kerei inih lim-lim tebin kelunan seng kuma' Tuhan uh muak asi Na' té' akui.

⁴⁹ avin Iha' aleng ningan uh na men akui tuk-tuk aleng dekaya'. Ma'ang lelan aran Na'.

⁵⁰ Asi Na' pah té' té' ha'ut-ha'ut tebin kelunan aleng takut té' Iha'.

⁵¹ Iha' uh bara tingan té' usu Na', dahin metat kelunan aleng bau kenep aleng ngio'-ngio' alem kenep daha' dep.

⁵² Daha' aleng dekaya' pah en Na' na liva men ladung aren daha', bi kelunan aleng ji'ek en Na' na bau,

⁵³ kelunan aleng la'o en Na' na besoh té' ket aleng sayu, bi kelunan aleng kaya' en Na' nyihu tei lap halah tua.

⁵⁴ En Na' masi nah nyam panyin Na' Israel, avin Iha' hituk té' asi Na'

⁵⁵ men sepun tam Abraham dahin men pahu na' ateng-ateng baya, awi aleng uh Na' kuma' men sepun tam.”

⁵⁶ Melo' nah Maria dahin Elisabet kio'-kio' telo' bulan dara na', men'uh anan uli nah iha' ha' uma na'.

Marung tuk kanak Yohanes aleng Meduh

⁵⁷ Elisabet pah uh sukup bulan na' iha' seng nganak, pelalau iha' nganak ji anak laké'.

⁵⁸ Tegu daha' ha' uma na' dahin daha' peharin na' jam Tuhan hu'uh ma'uk asi Na' men iha', daha' atih pah melu lelan dahin na'.

⁵⁹ Té' dau aleng kesaya' na' tei nah daha' seng nyunat anak atih, dahin ngenep na aran na' Zakharia ngioh aran taman na'.

⁶⁰ Nyu'ei nah hinan na' dahin kuma', “Nusi' ha' nunan, té' pah anak anih iha' nah Yohanes.”

⁶¹ Bi ken daha' atih men iha', “Nusi' té' ta' jam aran nunan men hang kam panak anan.”

⁶² Pelalau daha' meteng taman na' dahin ngatah tua, meteng aran na' aleng kenep na' té' anak na'.

⁶³ En na' akei nah ngavan na' ngalung, pelalau ha' ngalung nunih, “Yohanes aran na'.” Lim daha' atih pah ngeniheng nah.

⁶⁴ Men tegu atih nyemau nah dahun na' men ba na' pelalau nah jelan na' haman pela'ung dahun na', iha' pah duan pelalau mahek-mahek Allah.

⁶⁵ Takut nah lim kelunan ha'ut uma aleng teliling uma dawa' té' lim daho' atih, en daha' pedengah nah men lim kelunan aleng ha' daléh ngalang Yudea atih.

⁶⁶ Lim kelunan aleng kelenghi daho' atih pah melo' na' tua alem kenep daha', ken daha', “Nuno' si' tuk anak anih baya tih?” Avin usu Tuhan té' dahin na' nan.

⁶⁷ Zakharia taman na' pah penu dahin Belua' Ma'ang, pelalau iha' pekatuk, dahin kuma',

⁶⁸ “Meju lelan nah aran Tuhan aleng Allah daha' Israel, avin Iha' nah hu'uh nei nyakei té' pahu Na' dahin makau daha'.

⁶⁹ Iha' uh meju men itam ji uheng murip alem pahu Daud aleng panyin Na' atih,

⁷⁰ awi jam tuk aleng uh en Na' bara men nabi aleng ma'ang aleng men aring kelesing usun tana.

⁷¹ Iha' aleng makau itam men ayau tam, dahin men lim usu kelunan aleng heléh té' itam,

⁷² ja Iha' pela'ung asi Na' men sepun tam aleng menuna', dahin hituk té' jaji Na' aleng ma'ang.

⁷³ Atih nah tevah Na' en Na' tevah men sepun tam Abraham menuna',

⁷⁴ Iha' aleng perah henga' masi itam dahin makau itam men usu daha' ayau tam ja itam sebayang té' Iha' dahin em takut,

⁷⁵ alem barik ma'ang dahin barik teneng ha' unan Na' ji iung urip tam.

⁷⁶ “Té' pah ika' anih, u anak kui, ika' seng en daha' kuma' nabi Allah aleng Kelalau Bau, avin ika' nah aleng seng panau una' ha' unan Allah dahin nemei alan Na',

⁷⁷ ika' seng bara men daha' pahu Na' marung urip avin sala daha' pebet.

⁷⁸ Avin alem asi aleng men Allah tam, alah matan dau men ujung seng nei netan té' itam,

⁷⁹ dahin menei alah men daha' aleng melo' halem lidem dahin alem lidem lingei patei, ja mayak kudek tam tei halem alan ngavan dena'.”

⁸⁰ Anak anan pah nei-nei dekaya', dahin nei-nei tu'a alem beluan na', iha' melo' ha' tana ngahit ateng iha' nei tula té' daha' kelunan Israel.