KOLOSÉ 1 - SURAT TUHAN Dahun Kayan 1990

Tabi' dahin sebayang

¹ Surat anih nei men Paulus, sihu Kristus Yesus avin anih kenep Allah, dahin nei men Timotius harin tam,

² en tei men ikam lim aleng anak Tuhan, ikam harin tam aleng nginah, aleng alem Kristus ha' Kolosé. Nei nah asi ha' ikam dahin dena' aleng men Allah Taman tam.

Sebayang bara sayu kenep avin kinah daha'

³ Kawa' bara sayu kenep men Allah, Iha' tih Taman Tuhan tam Yesus Kristus, dahin sebayang pa'en men ikam.

⁴ Kawa' jam dengah marung kinah kam alem Kristus Yesus dahin halam kam té' lim daha' anak Tuhan lahuh,

⁵ avin ikam nginah té' ket aleng uh en lo' men ikam ha' Surga. Marung ket aleng kam tebelum atih, uh menuna' nah ikam kelenghi dengah na' men alem daho' aleng teneng, iha' tih dengah sayu, aleng uh ateng ha' ikam.

⁶ Dengah sayu atih lahuh uh ateng ha' lim usun tana anih, dahin musang bua dahin nei pi'at-pi'at kahum, awi aleng té' halem kam lahuh, men dau aring kam kelenghi marung asi Allah dahin nei jam na' lan-lan.

⁷ Té' Epafras nah ikam uh nei jam daho' atih, iha' aleng bakéh awa' alem hadui anih, aleng avan tam nyalam, iha' pah ji panyin Kristus aleng teneng aleng kalui kawa' alem hadui;

⁸ iha' nah aleng uh bara men kawa' halam kam alem Belua' Ma'ang.

Sebayang na' ja sidang sa' nei jam aren Kristus

⁹ Avin atih kawa' pah, men dau kawa' kelenghi aleng daho' atih, nusi' nah kawa' tapah sebayang dahin akei men ikam ja ikam nei-nei jam lelan lim kenep Allah, iha' tih alem kenep aleng nyemugen alem Belua' dahin kenep aleng ateng té' alem na',

¹⁰ ja urip kam tekep ha' unan Tuhan, dahin tei té' kenep Na' té alem lim-lim tuk, ja ikam ngebua alem lim-lim hadui aleng sayu lahuh, dahin nei-nei pi'at jam kam marung Allah.

¹¹ Akui akei ja Iha' ngetu'a ikam alem tingan na' aleng maren té' u'a Na', ja ikam aru kenep dahin nengayet dahin melu lahuh té' alem lim-lim tuk,

¹² dahin bara sayu kenep té' Taman tam aleng petmei itam seng ala tulan dahin lim daha' anak Na' alem ket aleng seng en daha' sengayan alem alah.

¹³ Iha' uh makau itam men tingan lidem atih dahin masan itam la'an tei alem keligem Anak halam Na',

¹⁴ alem Na' atih itam takau, lim-lim sala tam pah uh pebet.

¹⁵ Iha' nah aleng atek katah Allah lan, Allah aleng em tula atih, Iha' Anak aleng una' men lim ket nun-nun aleng en Na' ngelengunan.

¹⁶ Avin men alem Na' atih Allah uh ngelengunan ket lim-lim, iha' tih aleng ha' Surga dahin aleng ha' usun tana, ket aleng tula dahin aleng em tula, iha' tih ladung aren, dahin keligem pah dahin ket aleng gem dahin tingan; ket lim-lim uh jadi' kenan Na', en Na' na men Iha' lahuh.

¹⁷ Iha' pah aleng una' men'uh lim-lim nun-nun, halem Na' pah ket lim-lim té'.

¹⁸ Iha' aleng jadi' kahung sidang, sidang nah aleng itung batung Na'. Iha' nah aleng pa'un ket lim-lim, aleng una'-una' peju men patei, ja Iha' jadi' dekaya' té' alem lim ket nun-nun.

¹⁹ Avin Allah melu melo' té' alem Anak Na' atih lim-lim nun-nun aleng té' alem batung Allah dep atih.

²⁰ Iha' pah en Allah na lawih, ja Iha' na urip temei kenan daha Na' aleng en Na' uk té' salip atih, iha tih men lim ket aleng ha' usun tana anih dahin aleng ha' Surga lahuh, ja daha jadi' anun Na'.

²¹ Ikam anih pah menuna' kelunan sawih dahin bunu Na' alem kenep kam avin ikam ngioh hadui kam aleng ji'ek, bi kerei inih Iha' uh na ikam pekesayu na dahin Na'

²² alem batung Na', iha' tih kenan patei Na'. Iha' ngenep metei ikam ha' unan Allah ma'ang-ma'ang, dahin em té' ji nek sala dahin em ga' tuten ha' unan Na',

²³ iha' tih awi ikam tangen alem kinah kam, tageng dahin ta'en, dahin meng kenep kam pasan men ket aleng en kam nekyang alem dengah sayu, aleng uh en kam kelenghi. Dengah sayu anih uh en daha' pedengah men lim ket aleng uh Na' ngelengunan té' ida langit anih, akui anih nah aleng uh Na' na kelunan aleng manau na' lahuh.

Marung aren dengah sayu

²⁴ Kerei inih akui melu avin akui ga' katé' tavit ikam, avin kui pehalum alem batung kui katé' aleng em payan halum té' Kristus tavit batung Na', iha tih sidang.

²⁵ Avin tavit atih pah akui uh en Allah na kelunan aleng manau dahun Na', ngioh awi tulan hadui aleng en Na' uk men akui tavit ikam. Iha' nyihu akui pedengah lim dahun Allah,

²⁶ iha' atih daho' aleng sihuk dahin aleng lingen pa'en alem kuri-kuri duman dahin men lim-lim tebin kelunan, bi kerei inih Iha' uh petula na' men daha' anak Na'.

²⁷ Men daha' atih nah Iha' melu petula kaya' dahin aren ket aleng sihuk atih alem kelunan aleng bengsa' ha' béh, iha' tih Kristus té' halem kam, ngavan tam nginah itam seng peji alem aren Na'.

²⁸ Kristus atih en awa' pendengah, dahin nangen ha'ut-ha'ut la'ung dahin katuk ha'ut la'ung té' kenep aleng nyemugen, ja kawa' deng geri ha'ut-ha'ut la'ung daha' atek teneng lan halem Kristus.

²⁹ Tavit atih nah akui la'ei anih, dahin nengayet, alem lim u'a dahin tingan Kristus aleng nyadui halem kui.