HOSEA 1 - SURAT TUHAN Dahun Kayan 1990

Atoh daho'

¹ Dahun Tuhan men Hosea anak Beeri tegu jaka' Uzia, Yotam, Ahas dalo' Hizkia jadi' laja' daléh Yehuda, dahin tegu Yerobeam anak Yoas jadi' laja' daha' Israel atih lahuh.

Dalo' amin Hosea itung katah Israel aleng em teneng

² Aring-aring Tuhan tengaran dahin Hosea, iha' nah Iha' kuma' men iha', “Tei nah im, ngehawa' nah ji doh pedayang, nganak ka' ké', anak pahu kelunan pedayang nah anak ka' atih na'a. Avin daléh anih petuyang lelan daha', tei nelikun tua nah daha' té' Akui,” ken Tuhan.

³ Lun tei nah iha' ngehawa' Gomer anak Diblaim atih, lun mali nah doh anan, lun nganak nah iha' ji anak aké'.

⁴ Men'uh anan dih, kuma' nah Tuhan men Hosea la'an, “Im na Yizreel nah aran anak anan, avin nusi' dara la'an Akui seng mukum Yehu daho' panak. Avin utang daha ha' Yizreel nan, Akui seng lemasi pelitah daha' pahu Israel nan.

⁵ Tegu jaka' anan, Akui seng merung batang jelut Israel ha' abek Yizreel tih.”

⁶ Lun mali pah doh anan la'an, nganak nah iha' ji anak doh. Lun kuma' nah Tuhan men Hosea, “Im na Lo-Ruhama nah aran anak anan, avin nusi' Kui seng namu pahu Israel nan la'an, avin nusi' peletu Kui seng masi daha'.

⁷ Bi Akui seng nyalam té' daha' pahu Yehuda dahin pekurip daha', Akui nah aleng Tuhan Allah daha', Akui nah aleng seng pekurip daha', nusi' ha' té' malat dahin té' langa' jelut tua Akui pekurip daha', dahin té' uvung-uvung kebiteng, dahin guda'-guda', dahin té' kelunan aleng pakei guda' atih lahuh, bi Akui dep kah aleng seng pekurip daha',” ken Tuhan.

⁸ Tegu Lo-Ruhama hu'uh la'at mo', mali pah doh na' la'an, nganak nah iha', laké' anak na'.

⁹ Lun kuma' nah Tuhan, “Im na Lo-Ami nah aran anak anan, avin ikam, nusi' kam pahu Kui la'an, Akui pah em Allah kam lahuh.

Jaji marung urip

¹⁰ “Bi na'a, awi kahum hit ha' benghé' banget dih kahum kam kelunan Israel nan, em deng en daha' ujap, em deng seng en tira peletu. Ha' ngavan daha' kuma' men daha', ‘Ikam em pahu Kui,’ bi ikam seng en daha' kuma', ‘Ikam nah anak-anak Allah aleng murip.’

¹¹ Daha' kelunan Yehuda dahin kelunan Israel seng peji pepeng lim-lim, daha' pah seng meju ji la'ung aleng mayak daha', daha' pah seng nyengayan daléh anih, avin dekaya', lelan nah dau Yizreel atih.

¹² Kuma' nah men daha' harin aké' kam, ‘Pahu kui!’ dahin kuma' nah men daha' harin kam aleng doh, ‘Harik aleng ek nyalam.’