FILEMON 1 - SURAT TUHAN Dahun Kayan 1990

Tabi' dahin sebayang sihu Tuhan

¹ Surat anih nei men akui Paulus, kelunan aleng uh alem jin avin Kristus Yesus, dahin Timotius harin tam atih, tei men Filemon aleng en awa' nyalam aleng bakéh awa' alem hadui,

² dahin men harin-doh awa' Apfia, dahin men Arkhipus, bakéh awa' alem kebiteng, dahin men daha' sidang alem uma telo'.

³ Nei nah asi dahin dena' ha' ikam men Allah Taman tam dahin men Tuhan Yesus Kristus.

Bara sayu kenep

⁴ Akui bara sayu kenep pa'en men Allah kui dahin metut aran ka' alem sebayang kui,

⁵ avin akui kelenghi marung tuk halem ka' dahin kinah ka' té' Tuhan Yesus dahin té' lim daha' anak Tuhan.

⁶ Akui sebayang ja alem itam peji alem kinah tam itam sa'-sa' nei jam marung ha'ut-ha'ut ket aleng sayu aleng en tam ala alem itam murip halem Kristus.

⁷ Avin akui kelalau sayu kenep dahin lema kenep alem halam ka', avin ika' uh ngepanah kenep daha' anak Tuhan, arin.

Paulus akei ja Onesimus ala asi

⁸ Avin atih, lan pah akui makang alem Kristus nyihu ika' na ket aleng tekep,

⁹ bi avin halam atih akui kelalau kaséh akei té' ika', iha' atih akui Paulus aleng uh dekaya, dahin kerei inih pah akui alem jin avin Kristus Yesus.

¹⁰ Akui akei ika' marung anak kui aleng uh ek ala alem kui alem jin anih, iha' tih Onesimus.

¹¹ Menuna' nusi' té' bang iha' té' ika', bi kerei inih té' nah bang na' men ika' dahin men akui lahuh.

¹² Iha' atih aleng ek nyihu nei ha' ika' la'an, iha' nah aleng avak nyalam lelan.

¹³ Akui kelalau ngenep ma'eng iha' dahik, ja iha' masi akui alem akui té' alem jin avin dengah sayu anih, itung kalui ika',

¹⁴ bi akui em kaséh na nun-nun alem kui em payan jam kenep ka', ja meng hadui ka' aleng sayu atih itung peden tua, bi dahin sayu kenep ka'.

¹⁵ Mina anih nah tuman na' iha' petat men ika' jaki, ja ika' hipun iha' pa'en-pa'en,

¹⁶ nusi' nah iha' awi dipen ka' tua, bi lalau sayu men'uh dipen, iha' ji harin en tu' nyalam. Nunan lan nah iha' dahik, bi lalau lan pah la'an men ika', avin marung tuk batung dahin marung tuk Tuhan lahuh.

¹⁷ Iha' ika' kuma' akui bakéh ka', sayu im ala iha' awi jam tuk ika' ala akui.

¹⁸ Bi awi iha' uh pelugi ika' dahin hu'uh putang té' ika', bei nah, ek ngalui kah.

¹⁹ Akui anih Paulus aleng ngalung té' usu kui dep, akui nah aleng seng bayen na'. Nusi' pekwat kui pehituk ika' marung ika' putang té' akui ketu-ketu urip ka'.

²⁰ Lan, arin, sayu nah akui melu marung ika' té' alem Tuhan, ngepanah nah kenep kui té' alem Kristus.

²¹ Avin akui nginah ika' seng menangen ngioh dahuk anih, iha' nah akui ngalung men ika' anih. Akui jam, mi'iat men'uh anih pah seng im na.

²² Alem anan lahuh nemei nah ji ngavak seng nyakei, avin akui nginah akui seng nei ha' ika' la'an uh anih kenan sebayang kelo'.

Tabi' na' dahin sebayang na'

²³ Epafras aleng bakéh kui alem jin alem Kristus Yesus kato' tabi' men ika',

²⁴ dahin Markus, Aristakhus, Demas dahin Lukas, dalo' atih bakéh kui alem hadui.

²⁵ Sayu nah asi Tuhan tam Yesus Kristus té' dahin beluam. Amin.