ESTER 1 - SURAT TUHAN Dahun Kayan 1990

Wasti aleng doh laja' muau dahun Laja' Ahasyweros

¹ Té' ji laja' aleng ngeligem matuh dua'-pulu-tusu daléh, men daléh India ateng Etiopia, aleng aran na' Ahasyweros.

² Tegu anan Laja' Ahasyweros atih melo' té' ujung ladung aren na' ha' daléh Susan, aleng daléh aya' ha' daléh Persia.

³ Té' ketlo' duman na', iha' na ji pahlung aya' men lim kelunan aleng gem hadui alem keligem na'. Daha' kepala' seladu men Persia dahin Media té' nei, dahin daha' gabnur dahin lim daha' aleng dekaya' men alem ha'ut daléh na atih lahuh, lim-lim daha' anan uh té' melo' té' unan laja'.

⁴ Nem bulan dara na' iha' ngelaham na daha' té' kaya'-kaya' keligem na' dahin té' aren na' aleng kelalau maren atih lahuh.

⁵ Men'uh anan iha' na ji pahlung la'an men lim huang daléh Susan atih, men daha' aleng dekaya' ateng daha' aleng nyam lim. Pahlung atih tusu dau dara na', en na' na ha' latan kubu na'.

⁶ Ha' latan atih pah daha' nyelirei balun alut aleng puti dahin nyemit awi langit, daha' pakei pah talé' en daha' na men balun alut dahin men balun aleng bela temen dahin ngaput na' té' pakau-pakau pirek aleng té' té' jihé' bato' mamar puti atih. Pagen met dahin pagen pirek pah en daha' lo' té' latan. Latan atih uh en daha' petmei sayu-sayu té' bato' aleng ngetirit puti dahin bela, dahin bato' mamar, dahin bato' aleng awi kahé' si dih aleng peklet pitem bulah, té' pah bato' aleng ha' béh lahuh aleng melegah lelan.

⁷ Ata' aleng en daha' du'i atih pah en daha' uak alem tebuk met, kuri-kuri na'an jam na'. Kelalau kahum pah ata' agun lahuh avin laja' atih peknep lan-lan té' daha'.

⁸ Meteng kenep daha' tua du'i, ngioh dahun laja' atih, avin laja' atih hu'uh nyihu lim daha' aleng mejei té' alem uma na' atih kelung daha' du'i nun-nun ket du'i, ngioh kenep daha' tua.

⁹ Tegu anan pah Wasti doh laja' atih pah lahuh na ji pahlung aya' alem uma laja', en na' na men lim daha' doh.

¹⁰ Té' dau aleng ketusu alem dau pahlung aya' na' atih, alem laké' laja' anan pekelu'an lelan avin du'i ata' agun, en na' uvui nah tusu la'ung dalo' nyemaké' aleng sihu na' atih, iha' tih Mehuman, Bizta, Harbona, Bigta, Abagta, Zetar dahin Karkas.

¹¹ En laja' anan nyihu nah dalo' geri doh na' Wasti nei ha' unan na', nei paget kanan lavung aren na', ja lim daha' aleng dekaya' aleng geri daléh atih dahin panyin-panyin na' atih jam kajau na', avin Wasti kajau lelan jam na'.

¹² Bi tegu dalo' sihu na' bara daho' atih men Wasti doh laja', beka' duyah ha' tei. Bunget lan-lan nah laké' laja' atih.

¹³ Laja' atih pah meteng daha' aleng nyemugen alem keligem na', marung tuk hawan na' muau dahun na' nutih, iha' tih daha' aleng mengalei té' tuk-tuk alem daléh atih, avin nunan nah adet laja' meteng daha' aleng haman alem udang-udang daléh, dahin aleng haman petneng kelunan.

¹⁴ Anih nah aran dalo' atih aleng lengep laja', Karsena, Setar, Admata, Tarsis, Meres, Marsena dahin Memukan, tusu la'ung dalo' aleng dekaya' alem daléh Persia dahin Media, aleng deng pakat dahin laja', dalo' anih aleng dekaya' aleng gem hadui alem keligem na'.

¹⁵ Lun ken na' men dalo' atih, “Akui aleng laja' Ahasyweros nyihu sihu kui tei bara dahuk men Wasti doh kui dih, bi iha' muau dahuk. Ngioh tebara tam, nuno' tuk aleng nuréh lo'?” ken na'.

¹⁶ Memukan pah nyu'ei laja' té' unan daha' aleng dekaya' lim, “Wasti uh na sala anan, nusi' ha' na sala men ika' dep, amei, bi iha' na sala men lim daha' aleng dekaya' dahin men lim-lim daha' alem lim-lim daléh ka' anih lahuh.

¹⁷ Java' daha' doh alem lim-lim daléh anih jam daho' nunan na'a, bi katap lim nah daha' muau laké' daha' lahuh. Tegu daha' kelenghi tuk anih, daha' seng kuma', ‘Nan! Ahasyweros pah aleng laja', tegu iha' duan Wasti nei ha' unan na', ja ha' duyah nei di,’ ken daha' na'a!

¹⁸ Men dau anih lahuh, doh daha' kelunan aya' alem daléh Persia dahin daléh Media nih pah aleng uh jam barik na' anih, daha' seng nengaran-nengaran na' nah anan na'a men laké' daha', ateng daha' hino'-hino' pah seng nuten dahin seng heléh ji la'ung dahin hawan na' lahuh.

¹⁹ Avin ha' nutih, awi dahuk nih teneng kurim, u amei laja', sayu nah im musang ji daho' ja Wasti em peletu-letu deng nei ha' unan laja' la'an. Sayu nah im ngalung na' alem buhup tebara daléh Persia dahin Media nih, ja ha' peletu em deng en daha' asan la'an. Sayu nah im ilau ji doh aleng lalau sayu kalui Wasti nan tua.

²⁰ Tegu daha' uh kelenghi utet daho' aleng uh en laja' na, dahin kelenghen lim daha' aleng alem keligem laja' aleng dekaya' lan anih, adang lim daha' doh nyepida té' laké' daha', men daha' aleng dekaya' ateng daha' aleng nyam lahuh,” ken na'.

²¹ Laja' dahin daha' aleng dekaya' aleng béh na' atih pah piah lelan kenep kelenghi daho' atih, laja' pah ngioh lim dahun Memukan atih.

²² Pelalau en laja' kato' nah surat men ha'ut-ha'ut daléh alem kalung daha' ha'ut-ha'ut na'an, dahin alem ha'ut-ha'ut daho' alem daléh atih, aleng kuma', “Tekep nah daha' laké' ha'ut-ha'ut la'ung jadi' dekaya' té' alem amin na', sayu daha' huang amin na' ngioh dahun na' tua.”