EFESUS 1 - SURAT TUHAN Dahun Kayan 1990

Tabi' Paulus

¹ Surat anih nei men Paulus, aleng sihu Kristus Yesus avin kenep Allah té' akui. Surat anih tei ha' daha' anak Tuhan aleng ha' Efesus, daha' aleng nginah aleng halem Kristus Yesus.

² Sayu asi dahin dena' nei ha' ikam men Allah Taman tam dahin men Tuhan Yesus Kristus.

Sayu kenep men Allah avin lim asi Na' alem Tuhan Yesus Kristus

³ Ju lelan nah Allah, aleng Taman Tuhan Yesus Kristus tam, aleng uh muak asi Na' men itam alem Kristus, iha' atih ha'ut-ha'ut asi aleng men belua', aleng men avan aleng bau.

⁴ Allah uh mili itam alem Kristus atih men em payan aring-aring usun tana anih, ja itam ma'ang dahin em té' tuten nun-nun ha' unan Na'.

⁵ Alem halam Na' Iha' uh petneng una' seng ala itam jadi' anak Na' avin Yesus Kristus, ngioh lu kenep Na'.

⁶ Hadui anan pah aleng mahek aren asi Na', aleng en Na' ih tua men itam alem Yesus aleng avan Na' halam atih.

⁷ Alem Yesus atih pah itam uh takau avin daha Na', iha' tih sala tam uh en Na' bet, ngioh huwi-huwi asi Na' anan

⁸ aleng uh en Na' uak men itam. Alem lim haman kenep nyemugen Na',

⁹ Iha' uh petula men itam ket aleng lingen alem kenep Na', ngioh lu kenep Na' aleng uh en Na' petneng menuna' halem Kristus,

¹⁰ iha' tih tegu uh deng dara na', Iha' seng geri lim ket nun-nun peji alem Kristus, ket aleng halem Surga dahin ket aleng ha' usun tana lahuh.

¹¹ Alem Na' atih lahuh kamé' uh jadi' ji daven aleng uh en Na' petneng una' ngioh kenep Allah aleng na ket lim-lim ngioh pakat kenep Na' dep,

¹² ja kamé' jadi' avan daha' mahek aren Na', iha' tih kamé' aleng una' nginah té' Kristus.

¹³ Ikam pah lahuh, hu'uh kam kelenghi daho' marung aleng teneng, iha' tih dengah sayu aleng pekurip ikam dahin nginah té' Iha', ikam pah té' halem Na', ikam en Na' nada' lahuh té' Belua' Ma'ang aleng uh Na' jaji atih.

¹⁴ Belua' atih pah aleng tada' kenep Allah marung ket aleng seng en tam ala, tada' ateng Iha' nei makau itam aleng daven na', atih pah jadi' avan daha' mahek aren Na'.

Iha' sebayang ja sidang jam lan tingan Allah aleng tula alem tuk Kristus nei peju murip

¹⁵ Avin atih, hu'uh kui kelenghi marung kinah kam té' Tuhan Yesus dahin halam kam té' lim daha' anak Tuhan,

¹⁶ akui em ngeta' bara sayu kenep avin tavit ikam, akui pah hituk té' ikam alem sebayang kui.

¹⁷ Akui akei Allah Tuhan tam Yesus Kristus, Iha' tih Taman lim-lim aren, ja Iha' ma'uk men ikam kenep aleng nyemugen, dahin petula Iha' alem kenep kam alem ikam nei-nei jam Iha'.

¹⁸ Akui akei lahuh ja matan kenep kam nei peting, ja ikam jam ket kam ala avin Iha' muvui ikam, dahin ja ikam jam kaya' Na' aleng kelalau lalé' aleng uh kelan Na' tavit hadui Na' alem daha' aleng anak Na'.

¹⁹ Akui akei lahuh ja ikam jam tingan Na' aleng kelalau lalé' tu'a, tingan atih pah atek tu'a lelan nyadui alem tam.

²⁰ Tingan anan nah lahuh aleng ngavan Na' meju Yesus Kristus men patei dahin melo' Iha' bah ta'o Na' ha' avan aleng bau lelan,

²¹ hinan nah Yesus Kristus gem pelitah, huwi ningan, huwi tu'a, huwi maren men'uh lim-lim ket aleng dekaya' aran: nusi' Ha' huwi bau alem urip ha' usun tana anih tua, bi huwi bau alem urip aleng seng ateng baya atih pah.

²² Ket lim-lim uh en Allah pekalah dahin en Na' lo' nah lim na' hida kudek Na', dahin na Iha' kahung hujung ket lim-lim avin sidang na'.

²³ Sidang atih pah aleng batung Na', aleng ngavan Na' la'ung, Iha' pah aleng pela'ung lim ket nun-nun alem ket lim-lim.