AMOS 1 - SURAT TUHAN Dahun Kayan 1990

Atoh na'

¹ Daho' aleng nei tula té' Amos, ji laké' aleng men hang daha' aleng puboh hulung duba ha' Tekoa, marung tuk daha' Israel, tegu urip Uzia aleng laja' daléh Yehuda, dahin tegu urip Yerobeam anak Yoas aleng laja' daha' Israel, dua' duman men em payan usun tana ngetiwet.

Ukum Tuhan té' daha' pahu aleng ha' béh

² Lun kuma' nah iha', “Tuhan nya'ui men Sion, Iha' pah petula dahun Na' men Yerusalem lahuh, megang nah lim padang ngavan daha' aleng puboh hulung geri hulung daha', kelubei nah ujet ngalang Karmel.”

³ Nunih dahun Tuhan, “Avin kenan telo' na'an hadui ji'ek en kelunan Damsyik na, ateng pat pah té', nusi' Kui seng mebet Dahuk aleng hu'uh ek mutet atih. Avin daha' uh tei mahik Gilead té' titei aleng uvung daha' mahik,

⁴ Akui seng metei apui alem uma Hazael lahuh, ateng kubu laja' Benhadad anan dih pah lanih en apui kani.

⁵ Akui seng merung kayo' tepaleng ketamen daléh Damsyik nan, tei lemnya lim kelunan huang daléh Bikeat-Awen lahuh, nurei kah daha' kelunan aya' aleng gem urip men daha' daléh Bet-Eden atih lahuh, nunan nah lim kelunan men daléh Aram seng tei salut ha' Kir tih,” ken Tuhan.

⁶ Nunih nah dahun Tuhan, “Avin kenan telo' na'an hadui ji'ek aleng en Gaza na, ateng pat pah té', nusi' Kui seng mebet Dahuk aleng hu'uh Ek mutet atih. Avin tavit daha' uh tei ma'uk ketu-ketu kelunan ji pahu atih tei salut nutih, en daha' uk men daha' Edom atih,

⁷ Akui seng metei apui alem kelahen Gaza nan, ateng kubu laja' anan pah ma'ang en apui kani.

⁸ Akui seng lemvah lim kelunan aleng alem Asdod, nurei pah daha' kelunan aya' aleng gem urip men daha' ha' Askelon lahuh, Akui seng mejen lengen Kui lawan Ekron, ateng hulé' kelunan Filistin anan pah tasa' lim,” nunan nah dahun Tuhan Allah.

⁹ Nunih dahun Tuhan, “Avin kenan telo' na'an hadui ji'ek en kelunan Tirus na, ateng pat pah té', nusi' Kui seng mebet Dahuk aleng hu'uh Ek mutet atih. Avin tavit daha' uh tei ma'uk ketu-ketu kelunan ji pahu men daha' Edom, em té' loh nah daha' hituk jaji té' hang daha' aleng peharin la'ung,

¹⁰ Akui seng metei apui alem kelahen daléh Tirus anan, ateng-ateng kubu na' pah lanih tutung.”

¹¹ Nunih nah dahun Tuhan, “Avin kenan telo' na'an hadui ji'ek aleng en kelunan Edom na, ateng pat pah té', nusi' Kui seng mebet Dahuk aleng hu'uh Ek mutet atih. Lavin daha' tei livoh harin na' atih geri malat, dahin madet halam na', em té' loh asi na' peletu, pehilu tua nah unget na' pa'en-pa'en dahin melo' hengan unget na' ji iung urip na'.

¹² Akui seng metei apui alem daléh Teman, ateng lim kubu Bozra anan pah lanih tutung.”

¹³ Nunih nah dahun Tuhan, “Avin kenan telo' na'an hadui ji'ek aleng en daha' pahu amon na, ateng pat pah té', nusi' Kui seng mebet Dahuk aleng hu'uh Ek mutet atih. Lavin kenan daha' tei nen'é butit daha' doh aleng mali ha' Gilead, avin daha' peknep ngenep na daléh daha' atih tei layang,

¹⁴ Akui seng pangu apui alem kelahen daléh Raba, ateng-ateng kubu na' pah ma'ang tutung, té' kikik dahin lalu-lalu daha' tegu jaka' kebiteng, petugung nyivung kevut tegu bahui aya'.

¹⁵ Laja' daha' pah seng en daha' ugung itung tei salut, iha' dahin daha' aleng dekaya'-dekaya' na' aleng dahin na' atih,” ken Tuhan.