'Jeen: 1 - Kuo :Dele'

¹ 'Mor 'Jeen: :or no-a Nyorsoa-: 'dekorn: :Gwlor :baa' :Yusu' 'Klae-: an-a' 'bhoi-yu, 'mor 'ye a-uh, a :mor no-a 'Klae-a' nyor⧾ :on 'dhu-a 'Ezlea 'di-', :on :korn-a 'dlu⧾ :ne-a :bhue: 'yor 'sororn', :or gboba:-a 'bluhba⧾-a' klehkpeh ken dih.

Dhih 'jeh-' :po-eh-: 'dekorn: :toror'-:

² :Yee' 'an 'Klae :de-di'-boi'-a:, a 'nyi eh no 'mona-deh: :klaba' 'do a bo, :mor nyor⧾ 'worn dih 'beh-dih-deh:⧾ 'doror: 'dor :taa 'o a bo yi.

³ Deh no-eh, a yubo-eh, a-a' dhih 'jeh-' :po-eh-a' 'dhen-a', eh-: mu-eh :no, 'de a :se-' :sea: i.

⁴ Jorwor: 'nyi a-a' se sea-a' :dao', eh no eh-a' :koan-a' klehkpeh, a 'ye nyor⧾ :on 'bor-a 'yu-yu-deh:⧾ :no-eh, 'de :on gweh-a Nyorsoa-deh 'zorn, 'de :on :gweh-a 'kwla gweh.

⁵ :Mor a-a' nyor se :toror' 'ble, 'nyi or dhele: Nyorsoa dih, :yee' or mu-or 'ye-:. Deh no-eh, Nyorsoa se 'kwa dih :kmu, or-a' 'dba-dih: nyor 'yuba 'i. Or 'nyi nyor⧾-a' klehkpeh deh.

⁶ Jorwor: :mor eh 'dhu a :taa Nyorsoa deh 'yba-dih, a po-eh dhih 'jeh-', a-a' :porluh⧾-a' dhobo:-'. Deh no-eh, nyor :or :korn-a :porluh-a: dhobo-a, :yee' or gweh yobo'-a' 'duh⧾ :pobor'-a ya-a 'de, :en mu-a de.

⁷ Nyor :dao', or-a' :na-dih-eh' :gwluhuh' dih :eh :mor or mu deh 'ye-: 'de :Gwlor :baa' 'kwa.

⁸ Deh no-eh, or-a' 'worn, or-a' 'si-dih: buh⧾ 'sororn' dih. Or-a' kpon 'o deh :due' ken dih, 'do deh⧾-a' klehkpeh or no-a bo.

Se deh-a' :za-da 'ble-nyor⧾-: 'dekorn: bhaan-nyor⧾-:

⁹ :Yee' 'Klae :de-di' :or se-a deh-a' :za-da 'ble, 'nyi or-a' :porluh 'pehn dih or 'ye 'mona no, :mor Nyorsoa 'ya-dih-or ya.

¹⁰ :Yee' 'Klae :de-di' :or no-a bhaan-nyor, 'nyi or-a' :porluh 'pehn dih :ke, :mor Nyorsoa ya-or 'bluhbor. Deh no-eh, or mu nyor⧾ 'yli-' 'ma-dih:, :ka :peli'-a' 'voma'e-a no-a 'o 'wluh-a'.

¹¹ :Mor 'yluh :kma 'i, :yee' :peli' :dao' en wlor-', 'de en-' 'voma'e-a 'kpa 'zorn, :yee' en-' 'yi dih :nmor-eh 'kor-'. 'Ka-: bhaan-nyor-a mu gbe :zi-eh :no :ke, 'do ti or zi-dih-a-' dih bo, or 'bhorn-a 'wlii, or 'ye-a or-a'a: bhaan-deh⧾ ken po.

Dih 'dhen-eh:

¹² :Yee' :bhorlie' 'do nyor :or ku-a dih, 'de :or se-a sea, :mor nyor⧾ 'worn dih 'beh-dih-deh⧾ yi 'o or bo. Deh no-eh, :mor eh 'dhu or :nyna dih 'dhen-eh: :daa 'i, :yee' or mu 'kmo :sie: :febeh' :gblaa', :eh 'dhu-a geli' :za-dih-deh: :eh :korn-a wlu Nyorsoa po-a :dhama'-' or mu-a nyor :or ybeh-or' 'nyi-:, :yee' or mu-eh 'ye-:.

¹³ :Mor nyor 'dhen-eh: dih, or 'ye deh-zon no, or-a' :no-', Nyorsoa :oo', or-: 'dhen 'on-' dih, 'on 'ye deh-zon no. Deh no-eh, Nyorsoa se deh-zon-' :ne. 'De mor Nyorsoa-a' 'dhen nyor-' dih, or 'ye deh-zon no :ke.

¹⁴ Jorwor: :mor nyor 'dhen-eh: dih, or 'ye deh-zon no, :yee' or-a' 'jeh 'yor-eh-a' 'bhororn'-deh⧾-zon:⧾, me-: 'o :en jli-or, 'de :en 'da-dih-or 'yi, or 'ye deh-zon no.

¹⁵ :Yee' or-a' 'bhororn'-deh⧾-zon:⧾ :dao', :mor or dhe 'o en-' 'tele' dih, me-: ya 'de deh⧾-zon⧾-a' no-a'. :Yee' :mor deh⧾-zon⧾ ku deh 'jeh, :yee' en ya 'de 'meh-a'.

¹⁶ :Yee' deh-a' :bo-dih:-' a dih, 'an 'Klae :dhih :kma :de-di'-boi'-a:.

¹⁷ 'Nyii'-deh:⧾ 'jeh ne-a' klehkpeh-: 'dekorn: 'nyii'-deh⧾-a' klehkpeh :en :gweh-a 'kwla-: en 'wluh 'de Nyorsoa 'bli yai'. 'De en yi 'noror 'zorn, en 'wluh 'de :a :Baa' Nyorsoa bo, :or no-a 'yluh-: 'chuh-: 'dekorn: 'chuh :dhlaen-: :en :ne-a 'de yai'. Or se worn :gweh-eh :korn. 'De mor or-a' :to :a 'kpuh ya, :a-a' :na :kule-'.

¹⁸ 'De or-a' 'yi 'sleh-wlu 'di, or no :a or-a'a: 'nynuu-', 'de or-a' 'jeh-a' 'ton :korn ka 'di, 'de :a 'ye :zai'-nyor⧾ no 'do noo-deh⧾-a' klehkpeh or no-a bo.

Deh-' dih 'worn-eh-: 'dekorn: eh-a' no-a'-:

¹⁹ :Yee' 'an 'Klae :dhih :kma :de-di'-boi'-a:, a :korn a 'ye deh :daa yubo:. Nyor⧾-a' klehkpeh, on 'dhobo: on 'ye dih 'worn. Jorwor: on 'wla :gwluhuh' dih 'de on 'ye :wlu. On 'wla :gwluhuh' dih, 'de on 'ye 'chehn-' 'kpa.

²⁰ Deh no-eh, :gwlor-nyor⧾-a' 'chehn-' 'kpa-eh :se-eh' :no i, 'de on 'ye 'yi 'sleh-kplen: Nyorsoa-a 'bhorn-a on 'ye-a' no, on 'ye-ih' no.

²¹ :Yee' eh-a' dhih, 'nyi a 'tali: a-a' gu-kplen-: 'dekorn: a-a' deh⧾-zon:⧾ :doru' :dao'-: dih. :Yee' a :ya a-a' 'jeh ya, 'de a 'ye wlu⧾ Nyorsoa po-a 'o a :porluh⧾ ken dih kpon, :en 'beh-dih:-a :en 'ye-a a 'puh-dih:.

²² A-a' :bo-dih:-' a-a' 'jeh dih, a-a' :to-' wlu⧾ :daa :dou'⧾ bo yaa'e, jorwor: deh en 'da-a, eh-: a 'ye no.

²³ Nyor :or 'worn-a wlu⧾ :daa, 'de :or se-a :ka en 'da-a no, :yee' or gweh :ka nyor :or pobo-a 'de 'yela' 'di, 'de :or 'ye-a or-a' 'jeh-a' 'yuba :ka or :ne-a.

²⁴ :Mor or pobo: 'de 'yela' 'di, 'de or 'ye or-a' 'jeh 'ye, :yee' :mor or 'wluh 'o, :yee' 'do :dha :due' 'jeh :dao', or 'ma-dih: bo :ka or no-a :ne-a'.

²⁵ Jorwor: nyor :or pobo-a 'tele' :eh :gweh-a 'kwla, 'de :eh zelie-a nyor⧾, 'de :dhehehn: ka 'di ya, 'de :or kpa-eh 'dlu bo, 'de :or se-a bo 'ma-dih: :ka or no-a eh-a' 'worn-a', 'de :or no-eh, eh mu-eh :no, 'de nyor :dao', or 'ye :bhorlie' 'ye, 'do or-a' noo-deh⧾-a' klehkpeh bo.

²⁶ Nyor :or no-a, :or za Nyorsoa :weheh' deh 'jeh, :yee' or :korn or 'ye or-a' :meo wlu 'ken :korn. :Mor or se-eh no, :yee' or bo-dih or-a' 'jeh 'weh, :yee' or-a' Nyorsoa-deh se deh 'di :ne.

²⁷ Deh :a :Baa' Nyorsoa-a 'da-dih-a or-a' :weheh' :za-eh deh 'jeh, :eh :gweh-a :vlehehn'-', :eh se-a 'klii'-deh 'bhun :ne, eh-: :dhe dih. A :za-dih: 'kwie'-nynuu-: 'dekorn: :dhoba: 'nynor⧾-: :an 'ye-a 'kle. :Yee' a 'dhu a-a' 'jeh :dhororn', 'de 'kmo bo-deh⧾ :ne-' a 'kor-dih:.