:Hiblu' 1 - Kuo :Dele'

Nyorsoa-a' wlu :on :yi-dih:-a or-a' 'Yu-'

¹ :Yee' 'do ti :dhorno'⧾ :en zi-a 'di, Nyorsoa :yi-dih: or-a' wele-eh: :po-nyor⧾-', 'de or :wlu 'de :a :bai'-a' :bai' bo, 'do ti :dhulu'-: 'dekorn: :ka :dhulu'-: 'di.

² Jorwor: ti :daa :en 'koan'-dih:-a :de 'bor-dih-we-eh: :a :ne-a ken :naa dih, or-a' 'Yu, or-: or :yi-dih:, 'de or :wlu 'de :a bo. Or-: or :yi-dih:-', 'de or no 'bluhba-: 'dekorn: yao-: 'de or gan-or, or 'ye deh⧾-a' klehkpeh :korn.

³ Or :to-dih: :a Nyorsoa-a' dhih-a' 'i 'beh-a' 'i, 'de or gweh Nyorsoa-a' nyior-tu. Or-a' wlu :on 'ble-a 'kpih, mo-: or no, 'de deh⧾-a' klehkpeh :en :ne-a, en mu 'dlu bo. 'De or no-eh, 'de Nyorsoa 'ye :gwlor-nyor⧾-a' deh⧾-zon⧾-a' dhih bo 'ma-dih:. :Yeh or no-eh, 'de Nyorsoa 'ma-dih:-a :gwlor-nyor⧾-a' deh⧾-zon⧾-a' dhih bo, :yee' or :dhe dih 'de Nyorsoa 'bli yai', 'do or-a' :dila-son bo, Nyorsoa :or 'ble-a 'kpih 'do deh⧾-a' klehkpeh 'dlu.

Nyorsoa-a' 'Yu-a' dhih-a' 'i 'beh-a'

⁴ Nyorsoa, or-: no-eh, 'de or-a' 'Yu no nyor :klaba' 'do 'enjor-nyor⧾ ken. 'De :ka :ne-a :due' 'di, 'ka-: 'nyne Nyorsoa 'nyi-or, en no 'yi 'beh-a' 'do an-a' 'nyne-a' klehkpeh ken.

⁵ Deh no-eh, Nyorsoa :se-eh' :za 'de or-a'a: 'enjor-nyor⧾-a' nyor :due' bo :sloror', :eh :mor, :Mor no 'an-a: 'Yu. 'De :eh 'wluh-a dha 'zean'-zorn: :daa 'bli, 'mor no :on :Baa'. 'De mor or :se-eh' :za, 'do an-a' nyor 'bhun, :eh :mor, 'Mor-: mu or :Baa' :no, 'de or 'ye 'an-a: 'Yu no :ke.

⁶ Jorwor: :yeh Nyorsoa-a yi-a or-a'a: :zai'-nyor-kpalu-yu 'noror 'bluhba ken :dbo 'da, :yee' or 'da, 'Nyi 'an-a: 'enjor-nyor⧾-a' klehkpeh za-or :weheh'.

⁷ Nyorsoa :za 'enjor-nyor⧾-a' dhih-', or 'dae:, 'On no-eh', 'de 'an-a: 'enjor-nyor⧾ gweh :pobor'. 'De 'on no-eh, 'de mo-: 'dhu-a 'an-a: 'bhoi-nynuu-', on gweh neh-a' :meo.

⁸ Jorwor: Nyorsoa 'dae: 'do or-a'a: 'Yu 'bhun, :Mor :or 'dhu-a Nyorsoa-', :an-a' nyor⧾ wlu 'ken :korn-eh mu dih :nyna, :ka ti-a mu-a 'dlu-' :tehn klehkpeh klehkpeh. :An-a' nyor⧾ wlu 'ken :korn-eh :se-' :bhuli' 'di :ne i.

⁹ :On :ybeh :on 'ye nyor 'ye, or 'ye 'yi 'sleh-deh⧾ no. Eh se :on 'ton :korn, :on 'ye nyor 'ye, or 'ye deh⧾-zon⧾ no. Eh-: :korn dhih, 'mor :or 'dhu-a :an-a' Nyorsoa-', 'de 'on gan :on. 'De 'on 'nyi :on deh-' 'ye-eh: :eh no-eh, 'de :on 'yi-dih:-a 'mona-' dih, :or 'beh-a 'i, :or :zi-a 'o :on 'bei'-a' nor-'.

¹⁰ 'De Nyorsoa 'dae: :neheh' 'de or bo, :Gwlor :baa', :mor no 'bluhba :eh 'wluh-a 'de eh-a' glu 'dhu 'da. 'De :on no :an-a' 'jeh 'yor-eh-a' son, :on no yao.

¹¹ Deh⧾ :daa, en mu ya :gba. Jorwor: :mor :mloror', :an mu dih :nyna. En mu worn :gweh :eh gweh-a paa-tiei 'i.

¹² :An mu-ih 'fean'-: :ka nyor :or 'fean'-a :sleheh'-zon 'i. 'De en 'ye 'i zian-dih: :ka nyor :or zian-dih-a :sleheh' 'i, 'de :or slo-a :dele' neh. Jorwor: :mor :mloror', :ka :on :ne-a, 'ka-: :an mu :ne. 'De :on se 'meh-a' :korn.

¹³ 'De mor Nyorsoa :se-eh' :za 'de or-a'a: 'enjor-nyor⧾-a' nyor :due' bo :sloror', :eh :mor, :Dhe 'o 'an :dila-son bo dih :chio'lo:, 'de 'on 'ye nyor⧾ :on 'nyeh-a :on-' ya :ya, 'de :on 'ye-uh' buh⧾ ken dih tba.

¹⁴ 'Enjor-nyor⧾ no :zulu:⧾ 'suh, :en Nyorsoa dbo-a 'noror nyor⧾ :on :korn :on 'ye-a 'puh bo, 'de :en 'ye-uh'-a' :za-dih:.