2 :Piteh' 1 - Kuo :Dele'

¹ 'Mor Samor' :Piteh' :or no-a :Yusu' 'Klae-a' 'bhoi-yu-: 'dekorn: or-a'a: dboo-nyor-: 'mor 'ye a-uh, a :mor :or 'ble-a dhih 'jeh-' :po-eh: :eh 'kpa-a deh ken, :ka :a-a' neh :ne-a. :A-a' klehkpeh, :a 'ble dhih 'jeh-' :po-eh: :daa 'weh, deh no-eh, :Yusu' 'Klae :or no-a :a-a' Nyorsoa-: 'dekorn: 'puh-dih-nyor-: or no 'yi 'sleh-nyor:.

² 'Nyi mla-: 'dekorn: wlu-' dih 'worn-eh-: en 'kpuhba: ken dih 'do a bo. Deh no-eh, a 'ble Nyorsoa-: 'dekorn: :a-a' :Gwlor :baa' :Yusu'-: an-a' deh-' dih 'worn-eh:.

:Ka 'Klae-a' nyor⧾ 'ye-a' 'kmo :ne-eh no

³ :Yee' :Yusu' 'Klae-a' 'kpih :en 'wluh-a 'de Nyorsoa bo, me-: or no, 'de or 'nyi :a deh⧾-a' klehkpeh, :a :korn :a 'ye-a 'ye, 'de :a 'ye 'kmo :an 'pehn-dih-a Nyorsoa-a' :porluh dih, 'kmo-' :ne-dih:, :eh :yi-dih:-a or-a' deh-' dih 'worn-eh-'. Or 'da :a-uh 'weh, :a 'ye 'for 'ble 'de or-a' dhih-a' 'i 'beh-a'-: 'dekorn: or-a' deh⧾ 'jeh ne-a' no-a'-: 'di.

⁴ Deh⧾ :daa, me-: or :yi-dih:-', 'de or po deh⧾ :klaba'⧾ :en 'kpa-a deh ken, en-' wlu⧾ :dhama'-' 'noror :a bo, 'de en 'ye-eh' no, 'de :a 'ye nyor⧾ 'kor-dih-deh:⧾ :en :ne-a dha yao 'zorn, :en 'wluh-a 'de :gwlor-nyor⧾-a' 'bhororn'-deh⧾-zon⧾ bo, 'de :a 'ye 'o en 'zorn 'wluh, 'de :a 'ye 'for 'ble 'de or-a' Nyorsoa-tu 'di.

⁵ :Yee' eh-a' dhih, :ka a po-eh dhih 'jeh-' :naa, :yee' a po 'de 'kpih, a 'ye 'o eh ken deh⧾ 'jeh ne-a' no-a' po. :Mor a 'ble deh⧾ 'jeh ne-a' no-a', :yee' a po 'o eh ken, deh-' dih 'worn-eh.

⁶ :Mor a 'ble deh-' dih 'worn-eh, :yee' a po 'o eh ken, a-a' 'jeh wlu 'ken :korn-eh, a :ne-' deh-zon no. :Mor a :korn a-a' 'jeh wlu 'ken, :yee' a-a' :sea:-'. :Mor a se sea, :yee' a po 'o eh ken, 'kmo :an 'pehn-dih-a Nyorsoa-a' :porluh dih.

⁷ :Yee' :mor a-a' 'kmo 'pehn-dih Nyorsoa-a' :porluh dih, :yee' a po 'o eh ken, 'Klae :de-di'-boi'-a' :dhih :kma-eh. :Mor a :kma 'Klae :de-di'-boi'-a' dhih, :yee' a po 'o eh ken, nyor⧾-a' klehkpeh-a' :ybeh-eh-'.

⁸ :Mor eh 'dhu a no deh⧾-a' klehkpeh :daa, 'de a 'ye-ih' no, en 'ye 'o 'dlu dih :zi, :yee' en mu-eh :no, a 'ye deh 'i 'si, 'de a 'ye 'bi :dhulu' po, 'de a-a' :Gwlor :baa' :Yusu' 'Klae-a' deh-' dih 'worn-eh 'di.

⁹ Jorwor: nyor-beh: :or se-a deh⧾ :daa no, :yee' 'de or 'yli :kpe-' 'weh, or-a' 'ye 'de nya dih. :Yee' or 'ma-dih: bo 'weh, :ka Nyorsoa worlor:-a or-a' deh⧾-zon:⧾ or no-a :zai'.

¹⁰ :Yee' eh-a' dhih, 'an 'Klae :de-di'-boi'-a:, a vorn :naa, a 'ye 'de 'kpih po, eh 'ye 'o :zai' neh-' :zi, 'de a-a' 'da-a'-: 'dekorn: a-a' gan-a'-: en 'ye dih ku 'do Nyorsoa ybei'. :Yee' :mor eh 'dhu a no deh⧾ :daa, :yee' a :se-' dih 'ga-: i klehkpeh klehkpeh.

¹¹ :Yee' Nyorsoa-a mu a :kpaa' 'i :za vuwor, 'de or 'bli yai', 'do :dha :Yusu' 'Klae :or no-a :a-a' :Gwlor :baa'-: 'dekorn: :a-a' 'puh-dih-nyor-: or :korn-a wlu 'ken, :ka ti-a mu-a 'dlu-' :tehn.

¹² 'An mu a deh⧾ :daa :gwluhuh' bo :po-dih: 'do ti-a' klehkpeh bo, keen' :mloror' a yubo-ih', 'de mor Nyorsoa-a' dhih :en no-a dhih-a' 'yor-eh, on :torne: a-uh, a kpon-ih dih :glii:.

¹³ :Mor 'on :taa 'ye, :yee' eh 'sleh-: 'i, 'on 'ye a deh⧾ :daa :gwluhuh' bo :po-dih:, :ka eh mu-a 'dlu-' :tehn, 'an mu-a 'kmo-' :ne.

¹⁴ 'On yubo-eh', eh :se 'o :gwle i, 'on 'ye 'meh, :ka :a-a' :Gwlor :baa' :Yusu' 'Klae no-a eh-a' ken dih :florn-dih-eh 'de 'on bo.

¹⁵ :Yee' 'an mu 'de 'an 'kpih-a' klehkpeh :po, 'on 'ye-eh no, 'de :mor 'on 'meh, 'de a 'ye deh⧾ :daa 'do a :gwlii' 'ble-dih: 'do ti-a' klehkpeh bo.

Nyor⧾ :on 'ye-a 'Klae-a' dhih-a' 'i 'beh-a' dha

¹⁶ :Yee' ti :a zela-a :a-a' :Gwlor :baa' :Yusu' 'Klae-a' de :yi-ti-: 'dekorn: or-a' 'kpih-: en-' dhih a :gwluhuh', :yee' eh :se worn :nmor-dlan:⧾ :en 'wluh-a 'o :a-a' :porluh⧾ ken, :a :se 'de po 'de a bo. Jorwor: :a-a' 'jeh 'yor-eh-a' 'yli-eh 'ye-eh' :ka or-a' dhih 'beh-a 'i,

¹⁷ 'de or :Baa' :or 'ble-a 'kpih 'do deh⧾-a' klehkpeh 'dlu, :or no-a dhih-a' 'i 'beh-Nyorsoa, or 'nyi-or deh-' 'ye-eh-: 'dekorn: dhih-a' 'i 'beh-a'-: ti wlu 'wluh-a 'de or bo, on no-a, 'An-a: :dhih :kma-yu: 'o, or-: :dhe dih. 'An :porluh 'pehn-: dih 'do or bo.

¹⁸ :A-a' 'jeh 'yor-eh 'worn wlu :daa 'weh :on 'wluh-a 'de Nyorsoa 'bli yai', ti or :ne :a mor-: :a :ne-a 'de gban 'i :ne-tluh 'dlu.

¹⁹ :Yee' deh⧾-a' klehkpeh :daa, me-: no-eh, 'de :a yubo-eh deh 'jeh, :ka deh⧾ Nyorsoa-a' wele-eh: :po-nyor⧾ :za-a-', 'de en no-a dhih-a' 'yor-eh. Eh mu 'yi dih :nmor, a 'ye Nyorsoa-a' wele-eh: :po-nyor⧾-a' wlu⧾ :daa :dou'⧾ bo :to, :ka a no-a 'nape :eh wan-a 'de :kule-' :chio'lo:, 'de zorn :zen-dih:-a 'o yai', eh-a' ya pobo-eh. A :korn a 'ye-uh' :dou'⧾ bo :to :chio'lo:, 'de :Yusu' 'ye 'de yi, :eh gweh-a :ka 'chuh :dhlaen-eh: :eh fan-a zorn bo-mlai', an 'da-dih-a 'Zola'-a no-a fan-a', 'de zorn zen-a.

²⁰ Eh-a' klehkpeh :daa, deh a 'ye-a' yubo:, eh-: 'dhu, nyor se 'beh-dih: or 'ye 'chlee-deh:⧾ :daa Nyorsoa-a' wele-eh: :po-nyor⧾ 'chle-a, or 'ye-ih ken dih zela:, 'de or-a' 'jeh-a' 'kpih 'di, :mor eh 'dhu, Nyorsoa-a' :Zulu se 'o or bo :ne.

²¹ Deh no-eh, deh⧾ Nyorsoa-a' wele-eh: :po-nyor⧾ :za-a-', en se 'o an-a' 'jeh :gwlii' 'wluh 'suh. Jorwor: Gban 'i :ne :Zulu: 'o, mo-: po-ih 'o on :gwlii', 'de on po tubo-wlu:⧾ :daa :en 'wluh-a 'de Nyorsoa bo.