1 :Timehte' 1 - Kuo :Dele'

¹ 'Mor :Poror' :or Nyorsoa :or no-a :a-a' 'puh-dih-nyor-: 'dekorn: :Yusu' 'Klae :or no-a :a-a' :gwlii' :dhe-nyor-: on 'nyi-a 'tele', :or 'ye-a dboo-nyor no, 'mor 'ye :on,

² :Timehte', :mor :or gweh-a 'an 'jeh-a'a: 'yu, 'de 'Klae-a' dhih 'jeh-' :po-eh 'di. Mla-: :wehlih: :korn-eh-: 'dekorn: :porluh-a' dih 'pehn-eh-: 'do :on bo, :en 'wluh-a 'de Nyorsoa :or no-a :a :Baa'-: 'dekorn: :a-a' :Gwlor :baa' :Yusu' 'Klae bo.

Nyor⧾ 'slen 'dhu-eh: 'do nyor⧾ sih-deh:⧾ :torne-eh-a' dhih bo

³ :Yee' 'an 'bhorn :on 'ye 'de 'Ehfesor-gwlor 'di dih :dhe, :ka 'on no-a :an-a' bale-eh, ti 'an mu-a 'Masordo'nia-bluhba ken. Nyor⧾ :noo', mo-: :ne 'de, :an torne nyor⧾ sih-deh⧾. Dhe-uh 'tele' 'i, on 'ye 'bor.

⁴ Zela-uh :gwluhuh', on 'bor an-a' 'jeh 'yor-eh-a' ti :zi-dih-eh, 'do sih :manua: :bla-eh bo, 'dekorn: 'wluh-a-keli: :dhorno'⧾ :en se-a 'dlu-: :gborluh'-: :korn. Deh no-eh, :zaa' :due', or-: en ya 'de. 'De en-' 'worn, nyor⧾-a' no Nyorsoa-a' :koan, :or dhih 'jeh-' :po-eh mu-eh :no, 'de :a 'ye-a' no.

⁵ Deh :korn-a dhih 'an 'nyi-a :on 'tele' :daa, eh-: 'dhu, :a 'ye :ybeh-dih: :dhih 'o, :eh 'wluh-a 'de :porluh: :on :gweh-a :vlehehn'-' bo-: :porluh: :on se-a :an-a' 'jeh zabe :kpon-dih:-: 'dekorn: 'Klae-a' dhih 'jeh-' :po-eh: 'jeh-:.

⁶ Nyor⧾ :noo' :to deh⧾ :daa 'kpuh⧾ ya, 'de on 'bili: 'de :bobo: dhih-a' :polo-eh bo.

⁷ An 'bhorn on 'ye nyor⧾ :Mose'-a' 'tele' :torne-nyor⧾ no. Jorwor: deh⧾ an za-a-', on se-ih 'i yubo:. 'De mor deh⧾ :mor on :taa nyor⧾ torne, 'de an-a' 'neh-dih:-a 'dlu deh 'i, deh⧾ en 'dhu-eh:-', on se-ih 'i yubo:.

⁸ :A yubo-eh', :ka :Mose'-a' 'tele' no-a 'tele' 'jeh, :mor eh 'dhu, :a no-eh 'de :ka 'jeh nor 'di.

⁹ 'De mor :a yubo-eh :ke, :ka eh se-a :no-eh: 'do 'yi 'sleh nyor⧾ bo. Jorwor: eh :no-eh:-' 'do 'tele' :wa-nyor⧾ bo-: nyor⧾ :an bla-dih-a 'gomla worn-: nyor⧾ :an-a' 'nyi-a Nyorsoa deh-' 'ye-eh-: deh⧾-zon:⧾ :no-nyor⧾-: nyor⧾ :an-a' 'ye-a Nyorsoa-a' gban 'i :ne-deh⧾ deh-'-: nyor⧾ :an-a' :za-a Nyorsoa :weheh'-: nyor⧾ :an 'dba-a on 'de-: on :baa'-: 'dekorn: nyor⧾ :an 'dba-a nyor⧾ :noo'-:.

¹⁰ Eh :no-eh:-' 'do nyor⧾ :an korn-a 'tmeor⧾ bo-: nyor⧾-kpalu:⧾ :an po-a on 'bei'-nyor⧾-kpalu⧾ 'nynor⧾-: nyor⧾ :an plo-a nyor⧾ on 'ye-a' 'ge-nynuu no-: nyor⧾ :an 'tmo-a sih-: nyor⧾ :an 'dhu-dih-a nyor⧾ dhih ken dih-: 'dekorn: nyor⧾ :an no-a deh⧾ :nee' :en se-a 'o nyor⧾ deh :torne-eh: 'jeh-a' :gwie 'i :ne-:

¹¹ :eh 'wluh-a 'de Nyorsoa :or :gweh-a 'kwla, or-a' dhih-a' 'i 'beh-a' tubo-wlu:⧾ 'jeh or po-a 'de 'on 'kwa bo.

:Poror' po Nyorsoa-a' 'zio 'do or-a' :wehlih: :korn-eh bo

¹² :Yee' 'on po :a-a' :Gwlor :baa' :Yusu' 'Klae 'zio, :or 'nyi-a 'on 'kpih, 'de :or dhe-a 'on :gwlii', :or :za-a 'on, 'on 'ye-a or-a' :koan no.

¹³ Keen' :mloror', 'on 'kor-dih: or-a' 'nyne, 'de 'an 'ye-dih nyor⧾ 'kle :dee', 'de 'on no deh⧾ 'kor-dih-nyor, jorwor: Nyorsoa 'ye 'an :wehlih:. Deh no-eh, deh⧾ 'an no-a :dee', 'on se-ih 'i yubo:, 'de mor 'on 'see-or dhih 'jeh-' po 'do ti :dao' 'di.

¹⁴ :Yee' :a-a' :Gwlor :baa' po 'on mla :dhulu' bo. 'De or no-eh, 'on 'ye dhih 'jeh-' :po-eh-: 'dekorn: :ybeh-dih-eh-: :en 'wluh-a 'de or bo 'ble.

¹⁵ Dhih :daa, 'an yi-a :za 'da, en no dhih 'jeh. 'De nyor⧾ 'beh-dih: on 'ye-ih' :gwlii' dhe, :en 'dhu-a, :Yusu' 'Klae yi dha yao 'zorn, or 'ye deh⧾-zon:⧾ :no-nyor⧾ 'puh-dih: :on :korn-a 'dlu 'on no-a.

¹⁶ Jorwor: Nyorsoa 'ye 'an :wehlih:. 'De or no-eh, 'de 'mor :or no-a deh⧾-zon:⧾ :no-nyor⧾-a' klehkpeh-a' 'dlu, 'on no 'yi :to-dih-deh 'do :Yusu' 'Klae-a' :porluh-a' dih :kpon-eh: :eh se-a 'dlu-' :jla 'da :korn bo. Eh-: no 'yi :to-dih-deh, 'do nyor⧾ :an mu-or dhih 'jeh-' :po bo, 'de on 'ye 'kmo :sie: :febeh' 'ye.

¹⁷ :Yee' 'nyi 'kmo :sie-keen, :or :se-a 'meheh'-nyor:, 'de :or nyor⧾-a' 'ye-a, :or no-a Nyorsoa :due' 'klein', 'nyi deh-' 'ye-eh-: 'dekorn: dhih-a' 'i 'beh-a'-: :korn 'de or bo, :ka ti-a mu-a 'dlu-' :tehn klehkpeh klehkpeh. 'Ka-: eh 'ye :ne.

¹⁸ :Yee' :Timehte', 'an 'yu, 'tele' :daa, 'an 'nyi-a :on, eh kor dhih Nyorsoa-a' wele-eh: :po-nyor⧾ :za-a-' :dee' see, 'do :an-a' dhih bo 'i. :Mor :on zi 'o en klei', :yee' :an mu vorn-a' 'jeh nor :vorn.

¹⁹ Kpa :an-a' 'Klae-a' dhih 'jeh-' :po-eh-: 'dekorn: :porluh: :on se-a an-a' 'jeh dhih :kpon-dih:-: 'dlu bo. Nyor⧾ :noo', mo-: :se-' an-a' :porluh⧾ :dou'⧾ bo :to. Eh-: no-eh, 'de on 'kor-dih: an-a' 'Klae-a' dhih 'jeh-' :po-eh.

²⁰ Nyor⧾ :dao', an-a' nyor⧾ 'sororn' :wor 'dhu, :Ame'na-: 'dekorn: 'Ehleza'na-:. Mo-: 'on :za 'kwla, 'on po 'de 'ku-a' 'kpih 'kwa, eh 'ye-uh' :torne:, 'de on 'ye Nyorsoa-a' 'nyne-a' 'kor-dih-eh 'bor.