1 'Tehsolo'nika-chlee-deh: 4 - Kuo :Dele'

'Kmo :an 'pehn-dih-a Nyorsoa-a' :porluh dih

¹ :Yee' eh-a' klehkpeh-a' 'dlu-' :jla 'da, :a-a' 'Klae :de-di'-boi'-a:, :a :torne: a-uh :ka a 'ye-a 'kmo :an 'pehn-dih-a Nyorsoa-a' :porluh dih, an-a' :ne-a' no 'weh. Keen', 'ka-: 'o a no 'kmo :ne-eh. :Yee' :a bale a 'weh, 'de :a 'neh a ken, 'de :Gwlor :baa' :Yusu'-a' 'nyne 'di, a 'ye-eh' no, eh 'ye 'o ken dih :zi.

² Deh no-eh, a yubo: deh :a zela: a :gwluhuh' 'weh, a 'ye-a' no. 'Tele' :daa eh 'wluh 'de :Gwlor :baa' :Yusu' bo.

³ Deh Nyorsoa 'bhorn-a a 'ye-a' no, eh-: 'dhu a 'ye :vlehehn'-' :gweh, 'de a 'ye 'tmeor:⧾ :korn-eh dih 'tali: :ke.

⁴ A-a' klehkpeh, a :korn a 'ye a-a' yau-a' wlu 'ken :korn-eh 'chean' :due' :due' 'de :vlehehn'-' :gweh ka 'di-: 'dekorn: a-a' yau-a' deh-' 'ye-eh-: :ke.

⁵ A-a' :porluh⧾-a' :sin-' 'do 'tmeor:⧾ :korn-eh-a' dha, :ka 'kmo bo-nyor:⧾ :on se-a Nyorsoa yubo:, an no-a.

⁶ :Yee' nyor-a' 'bhorn-:-' or 'be-a' 'nynor. :Mor or no-eh, :yee' or-a' 'dlu dih 'vleh-eh: 'o, or no. :Yee' or no deh-zon: 'do or 'bhun :ke. :A zela: a deh :daa :gwluhuh' 'weh see. 'De :a 'dhu a 'slen deh 'jeh, :ka :Gwlor :baa'-a mu-a nyor⧾ :an no-a deh⧾ :dao' 'kle 'ye-eh 'dlu :po.

⁷ Nyorsoa :se-' :a 'da, :a 'ye 'tmeor:⧾ :korn-eh 'kmo-' :ne-dih:. Jorwor: or 'da :a 'weh, :a 'ye :vlehehn'-' :gweh-eh-a' 'kmo-' :ne-dih:.

⁸ :Yee' eh-a' dhih, nyor :or se-a nyor⧾ deh :torne-eh: :daa dih kpon, :yee' eh :se nyor :or :torne-or deh, or-: 'o or :se-' dih kpon :deh. Jorwor: Nyorsoa :or 'nyi-a or-a' Gban 'i :ne :Zulu a-uh, or-: 'o or :se-' dih kpon.

⁹ :Yee' 'on se :korn 'on 'ye a bo 'chle :eh :mor a :ybeh a 'bei' 'Klae-a' dhih 'jeh-' :po-nyor⧾-'. Deh no-eh, Nyorsoa-a' 'jeh 'yor-eh :torne: a-uh 'weh :ka a 'ye-a a 'bei'-a' :ybeh-a' no.

¹⁰ Keen' 'jeh ka, 'ka-: a no. A :ybeh 'Klae :de-di'-boi'-a' klehkpeh :on :ne-a dha 'Masordo'nia-bluhba-a' klehkpeh ken 'weh. :Yee' :a bale a 'weh, :a-a' 'Klae :de-di'-boi'-a:, :yeh a mu-a :no, eh 'ye 'o ken dih :zi.

¹¹ A 'nyi eh :ne 'o a :porluh⧾ ken, a :ne-' :dhlumeh' :doru' :po-eh: 'kmo-' :ne-dih:. A-a' :po-' nyor⧾-a' dhih buh 'di. A no :koan: a 'ye a-a' 'jeh-a' deh 'bhorn, :ka :a no-a a-a' :gwluhuh' zela-eh :zai'.

¹² :Yee' 'de :ka :dao' 'di, a mu-eh :no, 'de nyor⧾ :on se-a 'Klae-a' dhih dhih 'jeh-' po, on 'ye a deh-' 'ye. :Yee' a :se-' nyor⧾ 'dlu :dhe i.

:Gwlor :baa'-a' de :yi-eh:

¹³ :Yee' :a-a' 'Klae :de-di'-boi'-a:, :a :se-' 'bhorn eh 'ye 'de a 'di dih :kpe-dih:, 'do nyor⧾ :on 'meh-a see 'bhun, 'de a :ne-' 'zlu 'do an-a' dhih bo, :ka nyor⧾ :on se-a deh :gwlii' :dhe-eh 'ble, an no-a 'zlu-a' 'do 'meheh'-nyor⧾-a' dhih bo, on no-a on :se-uh' 'ye-: i :neheh'.

¹⁴ :A po-eh' dhih 'jeh :ka :Yusu' 'meh-a, 'de or 'wluh-a 'de nma-dih-deh 'di. :Yee' :ka eh 'dhu-a dhih 'jeh-', :yee' Nyorsoa-a mu 'de nyor⧾ :on po-or dhih 'jeh-', 'de :on 'meh-a, nma-dih-deh 'di :za :ke, 'de or 'ye mo-: :Yusu'-: de :ya 'do or-a' 'jeh bo.

¹⁵ Deh :Gwlor :baa'-a' 'yor-eh :torne: :a-uh, eh-: 'o :a torne a-uh. :A :mor :or mu-a 'kmo-' :ne 'do 'we-eh: :Gwlor :baa'-a mu-a 'de :ya 'di, :a :se-' nyor⧾ :on 'meh-a ybei' :mu i 'de Nyorsoa 'bli yai'.

¹⁶ :Yee' nyor⧾-a mu wlu 'worn-: on 'ye 'wor, on 'ye 'tele' 'nyi, 'de 'enjor: :klaba' :due' 'ye :wlu. Nyor⧾-a mu Nyorsoa-a' :gamu-a' wlu 'worn-:. 'De :gwlor :baa'-a' 'yor-eh 'ye 'de Nyorsoa 'bli yai' 'wluh. :Yee' nyor⧾ :on po-a 'Klae-a' dhih dhih 'jeh-', 'de :on 'meh-a, mo-: :an mu 'de nma-dih-deh 'di 'wluh-: :zai'.

¹⁷ :Yee' :a :mor :or :ne-a 'kmo-', 'de :or po-a 'Klae-a' dhih dhih 'jeh, :yee' on :ne :a mu :dha :due' 'kpa-: 'de 'ni-kpan⧾ 'nyne-', 'de :a 'ye :Gwlor :baa' 'yi 'ya-dih: 'do yao :gwlii'. :Yee' :a mu 'o or bo :ne :ka ti-a mu-a 'dlu :tehn.

¹⁸ :Yee' eh-a' dhih, a no wlu⧾ :daa, a 'ye 'de a 'bei'-a' 'kpih po :due' :due'.