1 'Tehsolo'nika-chlee-deh: 1 - Kuo :Dele'

¹ 'Mor :Poror'-: :Salor'-: 'dekorn: :Timehte'-: :a :mor 'ye a-uh, a :mor :or 'dhu-a 'chore :eh :ne-a 'de 'Tehsolo'nika-gwlor 'di :or :korn-a 'de Nyorsoa :or no-a :a :Baa'-: 'dekorn: :Gwlor :baa' :Yusu' 'Klae-: bo. Mla-: 'dekorn: wlu-' dih 'worn-eh-: 'do a bo.

'Tehsolo'nika-nyor⧾-a' 'kmo-: 'dekorn: an-a' dhih 'jeh-' :po-eh-:

² :A po Nyorsoa-a' 'zio 'weh 'do a-a' klehkpeh-a' dhih bo. :Mor :a :taa 'de or bo wlu, :yee' :a po 'de a-a' 'nyne 'weh.

³ Deh no-eh, :mor :a :taa 'de :a-a' Nyorsoa :or no-a :a :Baa' bo wlu, :yee' :a po 'de a-a' 'nyne 'weh, :ka a no-a :koan: :no-eh 'de a-a' dhih 'jeh-' :po-eh 'di-: 'dekorn: :ka a-a' :ybeh-dih-eh no-a eh-a' no-a' 'de a no-a :koan 'gabaa-: 'dekorn: :ka a-a' deh :gwlii' :dhe-eh: a 'ble-a 'de :a-a' :Gwlor :baa' :Yusu' 'Klae-deh 'di, 'de eh ku-a dih 'gabaa-:.

⁴ :Yee' a :mor :or 'dhu-a :a-a' 'Klae :de-di'-boi'-', :a yubo-eh' :ka Nyorsoa :ybeh-a a-uh, 'de or gan a-uh, a 'ye-a' 'de or bo :korn.

⁵ Deh no-eh, eh :se :a-a' wlu⧾ 'plo :due', :a :se-' no, :a :se-' 'de Nyorsoa-a' tubo-wlu:⧾ 'jeh :ya, 'de a bo. Jorwor: Gban 'i :ne :Zulu-a' 'kpih, me-: :a no. 'De :a :to-dih: a 'i :ka :a no-a dhih-a' 'yor-eh :en :ne-a 'noror tubo-wlu:⧾ 'jeh :daa 'di en-' dhih 'jeh-' :po-eh deh 'jeh. :Yee' ti :a :ne-a 'de a bo, a yubo: 'kmo :a :ne-dih:-a 'kmo 'weh. En-' klehkpeh :daa, :a no-ih' 'do a-a' dhih bo.

⁶ 'Kmo :a :ne-dih:-a 'kmo-: 'dekorn: 'kmo :Gwlor :baa' :ne-dih:-a 'kmo-: mo-: :korn 'gor a zi 'o klei'. Keen' :mloror', nyor⧾ 'ye-dih: a 'kle 'weh 'gabaa, jorwor: a po tubo-wlu:⧾ 'jeh :daa dhih 'jeh 'gboror: 'de 'mona: ka 'di, :or 'wluh-a 'de Gban 'i :ne :Zulu bo.

⁷ :Yee' 'do eh-a' dha, a :mor 'Klae-a' dhih 'jeh-' :po-nyor⧾-a' klehkpeh :on :ne-a 'Masordo'nia-bluhba ken-: 'dekorn: :Ehki'a-bluhba ken-: a :mor an mu ya pobo:.

⁸ Eh :se 'Masordo'nia-: 'dekorn: :Ehki'a-: :due', tubo-wlu:⧾ :en kor-a :Gwlor :baa' 'i, en :se-' :po-dih-eh:, jorwor: a :mor no-eh, 'de en mu deh⧾-' dih. 'De mor a-a' Nyorsoa-a' dhih 'jeh-' :po-eh-a' 'nyne mu deh⧾-a' klehkpeh-' dih 'weh :ke. Deh :neheh' se 'o :ne, :a 'ye 'o :za-dih:.

⁹ Nyor⧾-a' klehkpeh :daa, an za-ih' 'weh :ka a no-a :a-a' dih :kpon-eh, ti :a yi-a a 'ye 'da, 'dekorn: :ka a no-a zuu⧾-a' :weheh' :za-eh dih 'tali-eh:, 'de a yi-a 'noror Nyorsoa bo :or no-a Nyorsoa 'jeh nor, 'de :or no-a 'kmo :ne-Nyorsoa, a 'ye-or :weheh' :za.

¹⁰ 'De a fuo or-a' 'yu :Yusu' 'Klae-a' de :yi-ti ken, or 'ye 'de Nyorsoa 'bli yai' 'wluh. :Yusu' 'Klae :daa, or-: Nyorsoa :za-a: 'de nma-dih-deh 'di, 'de or :za 'o :a Nyorsoa-a' 'chehn-yuba: :or yi-a 'de 'zorn.