Tito 1 - Echilaano Chiyayaya

Paulo álamusa Tito

¹ Nyono Paulo, nyìri muanda wa Ongo, kanji nyìri ndumwa* ya Yesu Kirisito. Ongo ányitumire kwa bandu ba ábaa álondwere mira, chasiya bamwêmerere, baményerere ne'myasi ye'kanangana. Ei myasi, i'ingénde yáasa'bo kunde báata mibere era ìsimise Ongo,

² na kuata emunyiiro we'kubona ekalamo ke'suku ne'mango. Aku kalamo, Ongo i'ùtafula bisha, iwátulanyaa'ko mango ábaa àtasa kubumba ebutala.

³ Ne'bihangi bya Ongo i'Mununusi* wetu ábaa asímire mango byáikaa, era kulosa ebandu eChinwa chai kurengera emyasi era ányiburaa mbu nyindaa náhubanganyisa'bo.

⁴ Tito, woyo u'náanjikira mano maruba. Ùli mwana wanyi wa kanangana kurengera ebuuma bwa tutúsa mwa bwemeresi. Ongo Tata, ne'Mununusi* wetu Yesu Kirisito béndaa bákuahanyira na kukweresa ebôlo!

Emibere ye'mungumwa we'luhu lwa Ongo

⁵ Uményaa kwa nàkurekaa kwa chisimba che'Kerete, chasiya umálirise kulongomanya emyasi era yàshibaa. Mu chira musi, ubíkaa mwe'bangumwa ba bangêmangira eluhu lwa Ongo kukulikana ne'miomba* era nákweresaa.

⁶ Emungumwa we'luhu lwa Ongo, ěmire kuba mundu ola ùtomvikala ku chiro na mwasi mubi. Kanji ěmire kuba mulume ola ùnéte mukasi muuma pwere. Ne'bana bai běmire kuba bemeresi, kanji bàtaataa ngulu ibi, nesi kuba bátengu.

⁷ Emungumwa àli mundu ola wèmangirire emulimo wa Ongo. Bushi no'ku, bitěmire mbu éndaa ômvikala ku'mwasi mubi: atémire kuba mundu we'rume, nesi wakúnde ásibuka fuba, nesi mutamisi, nesi kalasha, nesi mundu wakúhonda bikulo mu njira sa sitakomire.

⁸ Si bimwemire énde áangirira ebandu kubuya, na kusima kunde áira emabuya. Kanji âtaa mianyisa era ikomire na kunde áira myasi era ìtungenene. Abáa mundu mubuya-buya, na kunde áchilanga kwa mabi.

⁹ Kanji ěmire kuba mundu ola usímikire mwa Mwasi we'kanagana ngo'kwa twánakangirisaa'o. Mwa kuira bacha, angénde ásesa ebanji emichima kurengera emyasi ye'kanangana na kunde álosa ba bénjire bámuenza ebwaka kwa bàuwirwe.

Ebakangirisi be'myasi era ìtatungenene

¹⁰ Kubinali! Banene mwa'bu bandu bàtatunda chiro na mundu asibya, kanji bénde bêngeera ebandu kurengera emyasi yabo ye'buha-buha. Banene mubo, bàli eBayuta ba bémerere Yesu Kirisito.

¹¹ Rero, abu boshi úndaa wábika'bo ekasuwe kwa bunu, bushi mwa kukangirisa emyasi era ìtatungenene, bénjire bátuma ebandu boshi mu ngumo siuma, báreka ebwemeresi bwabo. Bénjire báira bacha, chasiya babóne ebuteya mu njira sa sitakomire.

¹² Abu besha Kerete, muuma mwa barebi* babo átetaa mbu: «Besha Kerete, kutengera mira banátula bafusi ba bisha. Kanji banáchitulira nyama ngali, bánaba ngalisi, kanji bánaba ba ndarenza kalyo.»

¹³ Ei myasi ináli ya kanangana. Bushi no'ku, úndaa wábakaliira busese, chasiya basímike kubuya mwa bwemeresi bwe'kanangana.

¹⁴ Baténdaa bákulikira emyasi ye'ngano se'Bayuta nesi kukulikira emiomba* ye'bandu ba bénde bánana emyasi ye'kanangana.

¹⁵ Rero, kwa bandu ba bàkomisibwe*, byoshi binákomisibwe*. Si kwa'ba bàchafukire*, batá na bemeresi, kutáli cha chìkomisibwe*, bushi ebwenge ne'buashi bwabo bwe'kumenya echibi nesi echibuya bìri mwe'singa.

¹⁶ Abu bandu, bénde báchitonga mbu bèshi Ongo, si emyanya yabo yénde yálosa kanangana kwa bàtamwìshi. Kanji bénde bákola ebitakolwa, bàtatunda na mundu asibya, bàtaala na kuira chiro na mwasi mubuya asibya.