Aanlyn Bybel

Baroma 1 - Echilaano Chiyayaya

Paulo álamusa ebemeresi be'Roma

¹ Nyono Paulo, nyìri muanda wa Yesu Kirisito. Ongo ányamaere kuba ndumwa*, kanji ányilondwere chasiya nyínde náhubanganyisa ebandu eMwasi Mubuya-buya.

² Oyu Mwasi Mubuya-buya, Ongo ábaa álaanyise'o mira kurengera ebarebi* bai mwa Maanjiko Mabuya-buya.

³ Oyu Mwasi àhambere era luulu se'Mwana wai, Enawetu Yesu Kirisito. Yesu Kirisito, ábutwaa kwa njira ye'mubiri, mwa chirongo cha mwami Tauti.

⁴ Si kwa njira ye'Muchima Mubuya-buya, Ongo ámuirire kuba Mwana wai na buashi bunene. Áiraa bacha, mango ámwomolaa mwa bafu.

⁵ Kurengera Yesu Kirisito, Ongo ányêresise engahanyi se'kuba ndumwa*, chasiya nyínde nálosa ebandu boshi enjira ye'kumwemerera ne'ye'kunde báira kwa àtechire. Mwa bacha, esina lyai lingénde lyáya ngulu.

⁶ Nenyu mùli mwa'bu bandu, ba Yesu Kirisito âmaere.

⁷ Nábaanjikira muboshi mu mutúla mwa musi we'Roma, mu Ongo atúla asímire, kanji ábamaere chasiya múbe bandu bai babuya-buya. Ongo Tata na Enawetu Yesu Kirisito, béndaa bábaahanyira na kuberesa ebôlo.

Paulo áhonda kuya kutangula ebemeresi be'Roma

⁸ Era muhondo sa byoshi, náteta mbu akoko era mwa Ongo wanyi kurengera Yesu Kirisito bushi nenyu muboshi. Nàtechire bacha, bushi emyasi ye'bwemeresi bwenyu yaíre ngulu mwa butala boshi.

⁹ Mango nénde nába náhubanganya eMwasi Mubuya-buya we'Mwana wa Ongo, nénde nába námukorera ne'muchima wanyi woshi. Na Ongo yeine anêshi kwa náteta myasi ya kanagana. Esuku soshi, kubakengera ku nénde nánabakengera

¹⁰ mwa memo manyi. Kanji nénjire námwěma ákasima, anyíbooreraa enjira ye'kuya kubatangula.

¹¹ Kubinali, náhonda busese nyìbalole'ko, nyìbabalikisise kwa myasi era yátenga era mwe'Muchima Mubuya-buya, chasiya musímike.

¹² Kuli kuteta kwa náhonda tusésanye emichima kurengera ebwemeresi bwetu.

¹³ Banyaketu, náhonda muményerere kwa chira mango, nénjire nálalira kuya kubatangula. Náhonda nyilóle akaba emulimo wanyi nàkolaa mwa kachi-kachi kenyu era éte bifuma ngo'kwa éte'bi mwa kachi-kachi ka ba bàtatula Bayuta. Si kuikira lwarero, nyichéte byângiko.

¹⁴ Binyěmire nyínde náya kukorera ebandu boshi: ebasamba na ba batá basamba, ba basómire na ba bàtasomire.

¹⁵ Echera chi chitúmire náhonda busese nyíye kubahubanganyisa nenyu eMwasi Mubuya-buya, mu mutúla eRoma.

Ebuashi bwe'Mwasi Mubuya-buya

¹⁶ Nyono ndénjire náfa honyi sa kuhubanganya eMwasi Mubuya-buya. Bushi oyu Mwasi, bu buashi Ongo énde ákoresa kwa kununula chira mundu woshi ola wèmerere: eBayuta tanga, chasinda ba bàtatula Bayuta.

¹⁷ Kubinali, eMwasi Mubuya-buya iwénde wálosa kute Ongo énde áira ebandu kuba ba bàtungenene era muhondo sai. Oku kutunganana kwénde kwáalikana kurengera ebwemeresi bweine oshâo. Ebyera bikulikene no'kwa bitúla biánjikirwe mwa Maanjiko Mabuya-buya mbu: «Ola ùtungenene era muhondo sanyi, emibere yai ingénde yêmangira kwa bwemeresi.»

Ongo énde áchijibusa ebakosi be'bibi

¹⁸ Kutengera kwa nguba, Ongo énde álosa kwa àsibukirire ebandu boshi ba bénde báira ebibi, ne'myasi era ìtatungenene. Bushi ei myanya yabo yénde yângika ebandu bàtamenyaa emyasi ye'kanangana.

¹⁹ Kubinali, emyasi era bandu bàngamenya era luulu sa Ongo, itúla ìchilosise kubuya-buya era muhondo sabo, bushi Ongo yeine ábalosise'i changanama.

²⁰ Kutengera ala Ongo ábumbiraa ebutala, emyanya yai era ìtalorekana'ko, kukuteta mbu: ebuashi bwai bwe'suku ne'mango, ne'kuba Ongo kwai, byénde byálorekana'ko kurengera bya ábumbaa. Bushi no'ku, abu bandu batéte njira ya kuchǒkolola kwa bya báiraa.

²¹ Chiro angaba mbu batúla bèshi Ongo, si bàtamutonga nesi kumubura mbu akoko ngo'kwa binemire. Si emianyisa yabo yérire yába kwa myasi ye'buha-buha, ne'michima yabo ye'buuta yérire yánachibera mwa musimya.

²² Bénde báchiremba mbu bàli bandu ba bèshi myasi, si báhubire basire.

²³ Kanji wakúnde bêra Ongo i'utúla'o esuku ne'mango, bera kunde bêra ebihuhanyi bya bíkunganyisibwe kwe'huhi lye'mundu we'kufa, nesi lye'milonge, nesi lye'nyama se'birenge bine, nesi lye'nyama sa sénde sáendera kwa bula.

²⁴ Bushi no'ku, Ongo ábarékereraa bàchâke esinga beine mwa kunde bákulikira ebuhuma-huma bwe'michima yabo, kuikira echihangi beine kwa beine báira myasi ya honyi.

²⁵ Emyasi ye'kanangana era ìtechire era luulu sa Ongo, bénde báibindula kuba ya bisha. Ebindu bya byábumbwaa bi bénde bêra wa kwêra Chibumbi yeine, iwěmire kutongibwa esuku ne'mango. Bibe bacha!

²⁶ Bushi no'ku Ongo ábarekereraa bénde bákulikira ebuhuma-huma bwabo bwe'kubeta ehonyi. Bakasi babo béndee báreka kuonjira ne'balume babo, na báya kubanda ekiri beine kwa beine. Ekuíra bacha, kutakulikene no'kwa byěmire kuba.

²⁷ Ne'balume nabo kuno'ku. Bánende báreka kuonjira na bakasi babo, na kunde báata mianyisa isibu ya kuhonda kubanda ekiri beine kwa beine. Ne'i, iri myasi ya honyi. Mwa kuira bacha, bánere bénde báchinjibusibwa kukulikana ne'i myanya yabo ibi, era yábakula mwa njira era ìtungenene.

²⁸ Abu bandu bábaa batáhonda kumenya Ongo. Era kwire áreka'bo bàkulikire ebwenge bwabo bwe'buha-buha, chasiya bénde báira bya bàtěmire kuira.

²⁹ Mwa michima yabo mutúla mwehwíre chira myasi yoshi era ìtatungenene, ne'mabi, ne'buhuma-huma, ne'bubi. Kanji mutúla mwehwíre emufula, ne'bwichi, ne'mbangano, ne'bwengeere, ne'burenzi. Batúla bandu ba bénde básinga ebanji emyasi era bàtairire.

³⁰ Bénde bâmaana ebanji bulio, batúla barenda ba Ongo, batúla bandu ba kukunza ebanji, batúla bandu be'rume kanji ba kuchilola. Bénde bákoresa enjira soshi mwa kuira emabi, bàtatunda ne'basere babo,

³¹ bàtatusa bwenge, bàtaira cha baláanyaa emundu, bàtatusa chamba, bàtatusa na bonjo.

³² No'ku bànêshi ebunjibusi bwa Ongo kwa ebandu ba bénde báira ei myasi běmire kufa. Si chiro bacha, banáchiri báendekera kuira ei myasi, na kunde bêmeresa ba bénjire báira'i.

Wycliffe Bible Translators, Inc.

Volg ons:

Geborgde skakels

Advertensies