Yudas 1 - Alkitab Porjanjian Baa Ponah Bohasa Dayak Siang

Tontoke ingkan Yudas 1:1-2

¹ Surat cotuh ingkan akuh, Yudas, dulun co molayani Yesus Kristus. Akuh konduang Yokobus. Surat cotuh indan kawan dulun co tonaah, iyohonon kawan dulun co tomasi Mohotara Tama, kawan dulun co tonganduh Mohotara ina hegah jarin tioh Yesus Kristus.

² Akuh bodoa ina Mohotara hopompaluh pio songai ma ikan, ina koadaan me meleh pio, hintang ina komasi hejeng me ico ma co bokon horoholuh botambah.

Bojaga-jaga tohimo kawan ajaran co sala 1:3-16

³ Kawan konduang co tongasih! Kitan samah-samah tonyolamat hintang akuh tuu-tuu bousaha nulih indam me tintun iyoh. Tapi, akuh nongkomo porulu nulih indam me ika ngorohon koporocayaam me. Ma sanioh, akuh nyau ina me tenden bohimat mompotahan koporocayaan to, iyohonon kawan ajaran buah co ocop tomorapot indan kawan dulun tioh Mohotara.

⁴ Awi, oko kawan dulun totentu co aroko tuu-tuu nyono Mohotara. Tonyata, iroh ocop tonih-tonih muntam ponah kolompok me. Iroh mantun Mohotaran to aroko angar majap dulun awi Are pio atoi. Iroh hapo pikiran co sala yoh ina doh boraoi posumpu kawan kojere betin doh co jahat. Iroh mahi kuloi mongaku bahawa Yesus Kristus iyohco kotikas ico Tuhan co bokuasa ma ito. Ingkan sinan, ocop tonulih bahawa iroh angar tomajap.

⁵ Mositi Tuhan majap dulun co jahat. Ikan ocop monau tintun kokon otuh, tapi akuh nyau pokingat ikan leh. Hiah jaman sinan, Tuhan nyolamat bangsa Tioh ingkan tohocipon nyan tana Mesir. Tapi, opaiyoh Are ngolumat co aroko porocaya nyan halo iroh.

⁶ Oko kawan molekat ka co piji tomohukum Tuhan. Kawan molekat taiyoh aroko tuhit ma batas kuasa co ocop tonantu indan doh. Iroh tulak ingkan ika tukui doh. Jadi, iroh tomorantai indan sokotahi-tahieh. Tuhan nahan iroh nyan ika co pindong lau dapot Ondo Mohotara momutus dulun co bujur hintang co sala daai.

⁷ Kawan dulun nyan kota Sodom hintang Gomora kawun kawan kota nyan sokitar eh isan iyoh ka. Iroh umpi dosa hokoruh. Iroh posumpu kawan kojere beti co aroko pantas. Jadi, iroh tomohukum, rahat tonyiksa ma apui co aroko picop sokotahi-tahieh. Kojadian cioh jarin poringatan indan kokon dulun bahawa Tuhan mohukum dulun jahat.

⁸ Oluco isanioh, kawan dulun totentu yoh aroko umbot umpi kojahat. Iroh mantun bahawa iroh oko nupi. Bodasar ma nupi cioh, iroh tenden umpi kojahat ma betin doh. Iroh mohina kuasan Mohotara hintang mohina kokon co bokuasa nyan sorga.

⁹ Mikael iyohco pomimpin molekat, tapi are mahi aroko mohina isan iroh. Hiah waktu, are hojawap ma Lacan Setan tintun ontun Musa, Mikael aroko mangap arop eh oko kuasa ika mohukum Lacan Setan ma mohina. Seen, Mikael mantun, “Olueh Tuhan leh angar mohukum iko!”

¹⁰ Tapi kawan dulun totentu taiyoh mohina kawan aang co aroko doh paham. Iroh baya ngumba kojere atoi co jahat samah isan ocin dangas co aroko boakar. Kawan aang taiyoh co umpi iroh lumat.

¹¹ Tuhan angar mohukum iroh! Tului, cara bolum doh jahat samah isan Kain ingkan jaman sinan. Iroh herak umpi kawan aang co sala ina doh haba duit samah isan Bileam. Iroh isan Korah ka awi iroh momboruntak naleh Mohotara hintang kawan pomimpin co tomili Mohotara. Iroh angar tongolumat samah isan are ka.

¹² Ikan nguan kawan pesta ika poleha ikan hopasi dongam co bokon. Tapi, ponah kawan pesta taiyoh, kawan dulun totentu taiyoh isan bintik luse co nyawuh ikan. Tului, iroh aroko haan bobolai kuman. Iroh baya menting arop doh tarop. Iroh arelu oko gunaieh samah isan hawun ngohium tonapi bahi co nyihin leh arelu pokoce ucan. Atawa samah isan kawan batang bua co aroko mua kotika sorang eh, kawan puun bua co ocop tonuruk dapot akat eh dapot bujur-bujur matoi.

¹³ Iroh samah isan umbak bahai co mehen putak co luse, iyohonon alogawi jahat doh co sobulih eh umpi iroh mohaan. Iroh isan kawan potondu co pusit ingkan jalur eh. Jadi kawan dulun taiyoh angar tomohukum sokotahi-tahieh nyan ika co pindong lau co ocop tonyodia indan doh.

¹⁴ Henok, koturunan kopitu ingkan Adam, ocop mara ingkan sinan bahawa iroh angar tomohukum. Hieeh, “Porhatiehboh! Tuhan angar dombut ma bokujan-kujan molekat-Eh.

¹⁵ Are angar umpi koputusan tintun kokon dulun, omeboh co bujur hintang omeboh co sala. Are angar mohukum kokon dulun co nguan alogawi jahat. Are angar mohukum kokon dulun co pokusit antun co jahat co naleh Are.”

¹⁶ Kawan dulun taiyoh horoholuh kolomumut, herak hokanyap-kanyap kosolaan dulun. Iroh horoholuh ngumba kojere beti co jahat. Iroh bolecak nara arop. Tapi iroh mahi hotara dongan ina haba kohujung indan arop doh leh.

Yudas nyomangat dulun ika tenden horoholuh porocaya ma Yesus 1:17-23

¹⁷ Tapi, ikan, kawan konduangkuh co tongasih, ikan sobulih mingkat ome co batuh ocop tomantun ma ikan pian kawan rasul Yesus Kristus, Tuhan co bokuasa ma ito.

¹⁸ Hien kawan rasul taiyoh, “Nuntuh ahir jaman, angar oko kawan dulun co herak polea-lea ikan. Kawan dulun taiyoh hopompahui ngumba kojere atoi co jahat.”

¹⁹ Kawan dulun taiyoh herak umpi ikan aroko boraoi hokohico. Iroh aroko ngumba Roh Mohotara, tapi ngumba kawan kojere kolunon.

²⁰ Tapi, ikan, kawan konduang kuh co tongasih, bousahaboh ina me botambah borohon porocaya ma ajaran co bujur-bujur ingkan Mohotara. Bodoaboh ma kuasan Roh Mohotara.

²¹ Tuhan to, Yesus Kristus, angar poleha komasi hejeng ma ito, iyohonon Are angar mihi ito kobolum sumong kototahieh nyan sorga. Samir me nganto moharap iyoh, ikan sobulih tenden bolum ponah asin Mohotara.

²² Polehaboh komasi hejeng indan kawan dulun co arinai porocaya ma koborohon.

²³ Dohopboh kawan dulun taiyoh ina doh hegah tonyolamat ingkan apui. Poleha ka boh komasi hejeng ma kawan dulun co bokon ka, tapi ma nyama co nyook ka. Aroh dapot ikan umba umpi dosa. Ikan sobulih ngodolee kokon alogawi jahat taiyoh.

Kawan antun tontiput Yudas ponah surat eh 1:24-25

²⁴ Mohotara co kotikas-tikas eh, bokuasa monjaga ikan ina me aroko nahak ponah dosa. Are bokuasa mehen ikan hia toharep-Eh co tohormat ponah koadaan me borasih ingkan dosa. Hiah waktu iyoh, ikan mahi angar korinah jorih jerah.

²⁵ Mohotara nyolamat ito molalui Yesus Kristus, Tuhan co bokuasa ma ito. Mohotaraboh co pantas tonara to, arelu oko co lian nanding Are, Are boh co korinah bokuasa ingkan sinan anin, makitu hintang dapot sokotahi-tahieh. Amin!