Titus 1 - Alkitab Porjanjian Baa Ponah Bohasa Dayak Siang

Paulus mihi tontoke indan Titus 1:1-4

^1-4 Indan Titus: co tuu-tuu ku angap isan anak kuh leh awi ito porocaya ma Yesus. Surat ingkan akuh, Paulus. Kristus Yesus hintang Mohotara co nyoruhan akuh jarin rasul-Eh. Akuh mahi tonyoruhan ika majar ajaran co buah ina kawan dulun co tomili Mohotara ma kobolum co sumong kototahi, co ocop tomonjanji Eh ingkan sorinai dunia tomoncipta. Mohotara ponyolamat to, aroko tonai ngoncunih. Hiyah waktu co ocop tomonentu Eh, Mohotara ocop mihi Antun Eh molalui Tarung Pio co tomorcaya Eh ma akuh ika ku momboritaeh. Akuh bodoa ina Mohotara co Taman to hintang Kristus Yesus, Ponyolamat to porahan kopioi-Eh ma iko hintang mihi kongolandah kongolami indam mu.

Kawan sarat ika jarin kawan ponotua 1:5-16

⁵ Akuh ocop naat iko nyan pulo Kreta ina iko lian mombereh co incah porulu tongomereh. Iko sobulih mili kawan ponotua ika momimpin sika jomaat nyan kawan kota nyan pulo Kreta. Iko sobulih mili ponotua sosuai ma kawan potunjuk tatuh co ocop ihing kuh ma iko:

⁶ Ponotua sobulih bolum aroh hocala. Are sobulih ico oruh eh hintang sotia ma eh. Kawan anak eh mahi sobulih porocaya ma Yesus. Kawan anak eh sobulih bolum ma cara co pio. Aroh dapot dongan doh boraoi nyala iroh awi iroh bolum aroh sonunuh atawa awi iroh bolum aroh tuhit.

⁷ Pongawas jomaat bogawi mongurus lopo Mohotara. Poko tului iyoh, are sobulih bolum aroh hocala. Are aroh boraoi bolecak. Are aroh ponyangit atawa pongorih. Are aroh boraoi herak hojat hakeng atawa pongalam ma duit.

⁸ Tapi, are ma koramah bosodia norima tomuoi hintang herak umpi aang co pio. Are sobulih bijaksana, bolum bujur harus nyan tohimo Mohotara, aroh umpi dosa, hintang hegah noro arop eh.

⁹ Are mahi sobulih kuan tuu porocaya ma Tarung Pio co tomara to indai eh, iyohonon ajaran co buah hintang patut tomorocaya. Are sobulih tahan borohon porocaya ma ajaran taiyoh ina are mampu nosehat hintang mihi somangat indan dongai ika bolum sosuai ma ajaran co buah yoh. Are sobulih tahan borohon porocaya ina are mahi mampu nunjuk eh ma dulun co naleh ajaran cioh bahawa iroh sala.

¹⁰ Aang taiyoh penting awi oko orong dulun Kreta co aroh kolu tomatur, husus eh kawan dulun co sorinai eh borogama Yahudi. Iroh hopander tintun kawan aang co mohampa. Iroh nyuwah monyasat dongan.

¹¹ Iko sobulih ngumbot iroh. Aroh moholu iroh majar kawan aang co sobulih eh aroh tomajar. Awi ajaran doh ocop umpi orong koluarga hancur. Iroh nipu dulun ma ajaran doh baya ina iroh haba duit.

¹² Sipat kawan dulun Kreta yoh piji tomantun pian nabi dulun Kreta leh. Hien nabi cioh, “Kokon ponduduk pulo Kreta hopompahui pongoncunih. Iroh isan ocin louk co dangas. Iroh mongkan bogawi, baya jere kuman leh.”

¹³ Antun nabi cioh mula bujur! Jadi, kawan dulun Kreta co ocop tonyasat sobulih tonopoh. Tegas boh nopoh iroh ina koporocayaan doh sosuai ma ajaran co buah tintun kawan antun Tuhan Yesus.

¹⁴ Nopohbat iroh ina doh umbot momporhati kesah suwan dulun Yahudi. Nopoh ka iroh ina doh aroh umba dulun co kuloi ajaran co buah.

¹⁵ Kokon aranaang borasih indan kawan dulun co atoieh borasih. Tapi, indan dulun co pikiraieh ceet hintang co aroh porocaya, arelu oko co borasih. Awi pikiran hintang atoi doh ocop ceet.

¹⁶ Iroh mantun bahawa iroh nyono Mohotara. Tapi alogawin doh monunjuk bahawa iroh aroh nyono Mohotara. Mohotara luon ma iroh. Iroh aroh tuhit ma Are. Iroh aroh sangup nguan ome bewe aang co pio.