Roma 1 - Alkitab Porjanjian Baa Ponah Bohasa Dayak Siang

Tontoke ingkan Paulus 1:1-7

¹ Surat cotuh ingkan akuh, Paulus, dulun co molayan Kristus Yesus. Akuh tonaah ika jarin rasul, hintang tonyoruhan husus eh ika momborita Tarung Pio ingkan Mohotara.

² Nyan jaman sinan, Mohotara ocop bojanji tintun Tarung Pio cioh molalui kawan nabi-Eh nain co tonulih ponah Surat Borasih.

^3-4 Tarung Pio yoh tintun Anak-Eh, iyohonon Yesus Kristus, Tuhan co bokuasa ma ito. Yesus tonganak socara kolunon iyohco koturunan ingkan Laca Daud. Tapi, Yesus mahi iyohco Dulun Co Aroko Bodosa ingkan Mohotara. Awi, hiah waktu Are bolum hopuli ingkan pompatoi, Mohotara mombuktieh bahawa Yesus iyohco Anak-Eh co bokuasa.

⁵ Mohotara mahi porahan koboraoi-Eh ma akuh. Iyohonon Yesus mili akuh ika jarin rasul co mowakili Are. Are mihi tugas ma akuh ika mombimbing kawan dulun ingkan kokon bangsa ina doh porocaya hintang tuhit ma-Eh.

^6-7 Tomasuk ikan mahi co nukui nyan kota Roma. Ikan mahi ocop tonaah ina jarin tioh Yesus Kristus. Surat cotuh indan kokon ikan nyan kota Roma co tomasi Mohotara hintang tonaah ina jarin dulun Tioh Mohohotara. Akuh bodoa ina Mohotara Tama hintang Yesus Kristus, Tuhan to porahan koboraoi-Eh ma ikan. Akuh bodoa ina Mohotara hintang Yesus mihi kongolandah kongolami indam me.

Paulus jere hia kota Roma 1:8-15

⁸ Potama-tama, akuh mucap sukur ma Mohotarang kuh tului Yesus Kristus ma kokon ikan. Tului, dulun nyan omoh-omoh nyan ngolauh dunia ngoneh bahawa ikan porocaya ma Yesus.

⁹ Mohotara iyohco saksi kuh bahawa akuh hopompahui mingkat ikan ponah doa kuh. Areboh Mohotara co tomolayan kuh ma kokuan tuu atoi kuh ika momborita Tarung Pio tintun Anak-Eh.

¹⁰ Akuh mahi bodoa bahawa Mohotara mihi kosempatan ina makitu akuh lian nyari ikan, amun iyoh sosuai ma kojere-Eh.

¹¹ Awi akuh jere lau hosopopak ma ikan ina akuh lian mihi aang co pio co ihin pian Roh Mohotara indam me hintang umpi koporocayaam me sasar borohon.

¹² Maksut kuh, waktu akuh halo ikan, ito samah-samah lian tongorohon. Iyohonon, atoi kuh angar tongorohon awi kito ikan tuu-tuu porocaya ma Yesus. Sanioh ka, atoi me angar tongorohon tului koporocayaang kuh.

¹³ Kawan konduang, akuh nyau ina me monau bahawa akuh ocop derek ngewak ika nyari ikan, tapi dapot makitu horoholuh oko holangan. Akuh nyau dombut ina daai polayanan kuh nyan halo ikan lian bohasir samah isan co tojadi nyan halo kawan dulun co bokon ma Yahudi nyan kawan ika co bokon.

¹⁴ Akuh nongkomo wajip molayan kokon dulun, iyohonon dulun Yunani atawa dulun ingkan kawan bangsa bokon, dulun co bopondidikan atawa co aroh.

¹⁵ Iyohboh tuluieh akuh jere momborita Tarung Pio hia ikan co nukui nyan Roma.

Tarung Pio oko kuasai ika nyolamat dulun 1:16-17

¹⁶ Akuh aroko mohaan momborita Tarung Pio yoh tului kuasan Mohotara bogawi molalui Tarung Pio cioh ika nyolamat sika dulun co porocaya, portama-tama dulun Yahudi, tapi ka dulun ingkan bangsa bokon.

¹⁷ Awi, ponah Tarung Pio yoh, Mohotara porahan caraeh kolunon lian jarin bujur nyan tohimo-Eh, iyohonon ma porocaya ma Yesus, hintang horoholuh porocaya dapot soropai. Nain antun cotuh co tonulih nyan Surat Borasih: “Kawan dulun co porocaya angar jarin bujur nyan tohimo Mohotara, maka iroh angar ngohaba kobolum co tuu-tuu.”

Kokon dulun bodosa hintang patut norima hukuman ingkan Mohotara 1:18–3:20 Koadaan dulun bokon ma Yahudi 1:18-32

¹⁸ Tapi ingkan sorga Mohotara mahi porahan angit-Eh ma kokon dulun co bodosa hintang umpi aang co jahat. Awi, kojahatan mohalang kolunon nyono ajaran co buah.

¹⁹ Awi sobujur eh, Mohotara ocop porahan ma kolunon ome co lian tomonau tintun Are,

²⁰ iyohonon bahawa Are iyohco Mohotara hintang Are bokuasa indan sokotahi-tahieh. Kawan sipat Mohotara yoh aroko lian tonoto ma mata, tapi ingkan dunia tuh tomoncipta, kolunon hegah momaham iyoh molalui kokon aranaang co tomoncipta-Eh. Jadi, kolunon aroko empun alasan ika aroko nyono kawan sipat Mohotara yoh.

²¹ Iroh monau tintun Mohotara, tapi iroh aroko mihi hormat ma Are sobagai Mohotara. Iroh mahi aroko bosukur ma-Eh. Malah seen, pikiran doh jarin mohampa. Atoi doh uong lau dapot aroko boraoi paham kojere Mohotara.

²² Iroh mongaku korinah boakar pikir podahar iroh uong.

²³ Iroh aroko nyembah Mohotara co bolum sumong kototahieh, tapi nyembah kawan kopatung co tonampa deon tampa kolunon co boraoi matoi, beleu, ocin opat paai, ocin co nyole.

²⁴ Poko tului iyoh, Mohotara moholu iroh tonguasa pian kawan kojere atoi doh co ceet. Jadi, iroh nyangit nguan kawan aang co ceet ma betin doh.

²⁵ Hangki porocaya Mohotara co bujur, iroh porocaya kawan aang co aroko bujur. Iroh nyembah hintang molayan kawan aang co tomoncipta hangki Mohotara co moncipta kokon aranaang yoh. Baya Areboh co sobulih eh tonara sumong kototahieh. Amin!

²⁶ Tului iyoh, Mohotara moholu iroh tonguasa pian kawan kojere betin doh co ceet. Iroh co bawe aroko hokoruh ma bakah isan co wajar, tapi iroh hokoruh ma bawe bokon.

²⁷ Sanioh ka, iroh co bakah aroko hokoruh ma bawe isan co wajar, tapi iroh jere hokoruh ma samah bakah. Kawan bakah umpi alogawi co nyongkohaan ma samah bakah. Jadi, Mohotara maleh iroh ma hukuman sotimpar ma kawan alogawin doh co jahat yoh.

²⁸ Awi iroh aroko nongkomo porulu nyono Mohotara, maka Mohotara moholu pikiran doh jarin rusak. Jadi, iroh nguan kawan aang co aroko pantas.

²⁹ Iroh aroko bolum bujur nyan tohimo Mohotara. Atoi doh jahat hintang pongalam. Iroh dolee hintang nongkomo bosingon ma dongan doh. Iroh horoholuh nyau hokohojat atawa ngompatoi dongan doh. Iroh nipu hintang dendam.

³⁰ Iroh posebar kesah unih hintang poceet dongan doh. Iroh ngodolee Mohotara. Iroh pongasar, cakah, hintang bolecak. Iroh pintar nganyap cara baa ika umpi kojahat. Iroh aroko tuhit ma dulun ongko,

³¹ aroko boakar, hintang aroko lian tomorcaya. Iroh aroko pio songan doh atawa aroko komasi hejeng ma dulun bokon.

³² Monurut porentah Mohotara, kokon dulun co bolum isan iyoh patut tomohukum matoi. Oluco iroh ocop monau iyoh, iroh tenden nguan kawan aang co jahat yoh. Malah iroh sotuju amun dulun nguan eh.