Pilipi 1 - Alkitab Porjanjian Baa Ponah Bohasa Dayak Siang

Tontoke ingkan Paulus 1:1-2

¹ Surat cotuh ingkan akuh, Paulus hintang Timotius. Kaih dulun co bogawi molayani Kristus Yesus. Surat cotuh indan kokon dulun husus tioh Mohotara nyan kota Pilipi co hokohico ponah Kristus Yesus, tomasuk kokon ponatua hintang diakon jomaat.

² Mudahan Mohotara Taman to hintang Tuhan Yesus Kristus mihi aang co pio hinut hintang kongolandah kongolami indam me.

Paulus bosukur hintang bodoa indan jomaat nyan Pilipi 1:3-11

³ Sika akuh mingkat ikan, akuh mucap sukur ma Mohotarang kuh.

⁴ Sika akuh bodoa indan kokom me, akuh horoholuh bodoa ma kojorih.

⁵ Akuh bosukur hintang jorih jerah isan iyoh awi ingkan kosulak ikan porocaya dapot makitu ikan bogawi mondukung akuh ina Tarung Pio lian tomomborita.

⁶ Mohotara ocop molai gawi co pio ponah ikan. Akuh yakin Are angar horoholuh nguan iyoh dapot umbot nyan ondo Kristus Yesus dombut hopuli.

⁷ Mula patut akuh bopikir isan iyoh tintun ikan awi akuh korinah mongasihi ikan. Tului, ikan horoholuh dohop akuh ponah polayanan kuh, iyohonon polayanan co ihin Tuhan ma akuh awi Are kolu porahan kopion atoi-Eh ma akuh. Hiah waktu akuh oko ponah seper, hiah waktu akuh mombela Tarung Pio tohimo dulun co naleh eh, hiah waktu akuh mombukti Tarung Pio cioh bujur, ikan horoholuh dohop akuh ponah polayanan cioh.

⁸ Mohotara monau bahawa ome co tomantun kuh tuh bujur: Akuh korinah mongasihi ikan samah isan Yesus mongasihi ikan.

⁹ Tuhboh doa kuh indam me: Mudahan ikan sasar mongasihi Mohotara hintang dulun bokon hintang sasar monau hintang paham ome co bujur

¹⁰ dapot ikan boraoi mili ome co poko pio. Ma sanioh, kobolum me angar borasih ingkan dosa. Ikan aroko angar toposala nyan ondo Kristus dombut hopuli.

¹¹ Ingkan cara kobolum me co buah yoh, kokoieh baya Yesus Kristus co lian umpi ikan nguan aang taiyoh. Maka Mohotara angar tonara hintang tomohormat.

Oluco Paulus nyan seper, Tarung Pio tenden tomomborita 1:12-26

¹² Kawan konduang, mula akuh buah bopira kosusah. Tapi, akuh nyau ikan monau bahawa kawan aang tatuh tojadi ina meleh orong dulun ngoneh hintang porocaya ma Tarung Pio.

¹³ Jadi, alasan akuh tomokuntam ponah seper ocop jelas indan kokon dulun nyan intoi, tomasuk kokon tontara co monjaga ika kuh tonahan ponah istana laca tuh. Kokon doh monau bahawa akuh tomokuntam ponah seper tului akuh molayan Kristus.

¹⁴ Bokon ma iyoh, waktu akuh nyan seper, akuh jarin cuntu indan kawan konduang to co porocaya ma Tuhan Yesus. Pokongorong ingkan iroh jarin sasar bohanyi momborita Tarung Pio. Iroh aroko takut porapot Antun Mohotara yoh.

¹⁵ Mula oko dulun co momborita tintun Kristus tului atoi doh bosingon. Iroh nyau ina dulun ngumba iroh hangki akuh. Tapi oko ka dulun co momborita tintun Kristus ingkan atoi co borasih.

¹⁶ Iroh monau bahawa Mohotara mili akuh ika mombela Tarung Pio tohimo dulun co naleh eh. Jadi, iroh nyau momborita tintun Kristus tului iroh mongasihi Mohotara hintang akuh.

¹⁷ Tapi kawan dulun co atoieh bosingon yoh, arelu oko tujuan co pio. Iroh baya nyau menting arop doh leh. Iroh nyompan alogawin doh yoh angar umpi koadaan kuh ponah seper meleh soranta.

¹⁸ Tapi aroko ome-ome! Oluco dulun empun tujuan ome bewe, ingkan atoi co bujur atawa sala, co penting iroh momborita tintun Kristus. Tului iroh umpi iyoh, maka akuh jorih jerah. Akuh mahi angar tenden jorih jerah,

¹⁹ tului akuh ocop monau bahawa nyan kojekaieh akuh angar tomombebas tului kawan doa me indangkuh hintang Roh Yesus Kristus dohop akuh.

²⁰ Akuh korinah jere hintang moharap bahawa akuh aroko umpi ome bewe co umpi akuh jarin mohaan nyan tohimo Tuhan. Tapi akuh boharap akuh angar jarin bohanyi makitu samah isan akuh horoholuh bohanyi sorinaieh. Ma sanioh, amun akuh matoi atawa bolum, Kristus angar tomohormat ma ome bewe co tojadi ma beting kuh.

²¹ Awi, indang kuh, amun akuh bolum, akuh bolum indan Kristus. Amun akuh matoi, akuh bohujung.

²² Tapi, amun akuh bolum nyan dunia tuh, polayanan kuh angar korinah boguna. Jadi, akuh aroko monau comoh co tomili kuh, bolum atawa matoi.

²³ Akuh hapit tului koduo aang cioh! Akuh jere naat dunia tuh paluh nukui halo Kristus. Mula iyoh meleh pio indang kuh.

²⁴ Tapi ikan meleh porulu akuh tenden nukui nyan dunia tuh.

²⁵ Jadi, akuh yakin tintun otuh: Akuh angar tenden nukui nyan dunia tuh halo ikan ina me sasar borohon porocaya hintang sasar jorih jerah tului iyoh.

²⁶ Maka, hiah waktu akuh hopuli hia ikan daai, ikan angar nongkomo sasar banga awi Kristus Yesus umpi ina iyoh lian tojadi.

Nosehat ina tenden botahan tohimo dulun co naleh iroh 1:27-30

²⁷ Ome bewe co tojadi ma akuh, co penting iyohco ikan bolum ma cara co patut, sosuai ma Tarung Pio tintun Kristus. Ma sanioh, amun akuh lian dombut hosopopak ma ikan atawa akuh aroko lian dombut hintang akuh baya ngoneh tintun ikan, maka akuh angar monau bahawa ikan tenden borohon porocaya. Akuh angar monau ikan hokohico atoi naleh kawan dulun co aroko porocaya Tarung Pio yoh.

²⁸ Aroh takut tohimo kawan dulun co naleh ikan isan iyoh. Awi iyoh co jarin ciri indan doh bahawa iroh angar lumat. Cioh mahi jarin ciri indam me bahawa ikan angar tonyolamat. Kokoieh yoh ingkan Mohotara.

²⁹ Awi, Mohotara ocop mihi kosempatan ma ikan aroko baya ika porocaya ma Kristus, tapi mahi ika mondorita tului iyoh.

³⁰ Iyohonon samah isan co ocop me kito tojadi ma akuh hintang samah isan co koneh me tojadi ma akuh makitu.