Pilemon 1 - Alkitab Porjanjian Baa Ponah Bohasa Dayak Siang

Tontoke indan Pilemon ingkan Paulus 1:1-3

¹ Surat cotuh ingkan akuh, Paulus. Akuh tomonjara tului akuh molayani Kristus Yesus. Tontoke ka ingkan Timotius, konduang to. Indan Pilemon co tongasih kuh. Konduang co ico gawi molayani Tuhan.

² Indan Appia ka, konduang to co bawe, hintang Arkipus co bogawi bohimat molayani Tuhan halo kaih. Surat cotuh ka indan kokon jomaat co hokumpur nyan lopo mu, Pilemon.

³ Akuh bodoa ina Mohotara co Taman to hintang Tuhan Yesus Kristus porahan kopion atoi-Eh indam mu, hintang ka mihi kongolandah kongolami indam mu.

Paulus bosukur awi Pilemon porocaya ma Yesus hintang hopasi dulun bokon 1:4-7

⁴ Sika akuh bodoa indam mu, akuh bosukur ma Mohotarang kuh.

⁵ Akuh bosukur tului akuh ngoneh bahawa iko tuu-tuu porocaya ma Tuhan Yesus hintang iko mahi hopasi kokon dulun husus tioh Mohotara.

⁶ Akuh bodoa ina hubungan haet mu ma dongam co porocaya oko hasir otuh: Iko lian monau tintun kokon aang co pio hinut co ito empui nyan ponah Kristus.

⁷ Konduang kuh! Iko ocop mohibur atoi kawan dulun co husus tioh Mohotara. Tului asim mu yoh, maka korinah kojorih kuh hintang atoi kuh botambah somangat.

Paulus nyawot ina Pilemon norima Onesimus ma kopio 1:8-22

⁸ Poko tului iyoh, akuh nyau nyawot iko nguan ome co sobulih tonguanmu. Sobujur eh, akuh boraoi morentah iko nguan ome co sobulih mu umpi awi akuh mahi porocaya ma Kristus.

⁹ Tapi, meleh pio akuh nyawot iko nguan iyoh awi akuh masi iko konduang. Akuh ocop ongko moh kole makitu dahat tonahan ponah seper tului akuh molayani Kristus Yesus.

¹⁰ Sawot kuh tuh tintun Onesimus. Hiah waktu akuh nyan ponah seper tuh, are jarin isan anak takuh leh awi akuh dohop are ika jarin porocaya ma Yesus.

¹¹ Batuh, mula are iyohco cipon mu co aroko boguna. Tapi, makitu are jarin korinah boguna indam mu hintang indang kuh ka.

¹² Akuh korinah hopasi are, tapi makitu akuh nyuhu are hopuli hia iko.

¹³ Sobujur eh akuh jere noot are umba akuh jarin kanti iko, ina are boraoi mombantu akuh, kotahin akuh tonahan ponah seper tuh tului momborita Tarung Pio ingkan Mohotara.

¹⁴ Tapi, akuh aroko kolu umpi iyoh amun arinai mara iko houn hintang iko sotuju. Akuh aroko kolu momaksa iko. Akuh nyau iko umpi aang co pio yoh tului kojere mu leh, aroko tului topaksa.

¹⁵ Mungkin are tomisah ingkan iko indan sopondehan, ina iko lian norima are indan sokotahi-tahieh.

¹⁶ Maksut kuh, are aroko baya sobagai cipon mu. Are meleh hangki iyoh. Makitu, are iyohco konduang co tongasih to. Akuh ocop mongasihi are. Daai iko mahi angar hopasi are meleh hangki iyoh kole, iyoh socara kolunon atawa awi ikan hokonduang ponah Tuhan.

¹⁷ Jadi, amun iko mangap akuh konduang ponah Tuhan, norimaboh Onesimus hopuli samah isan iko norima akuh leh.

¹⁸ Amun are sala atawa tohutang ma iko, olu akuhboh co nangung kokoieh yoh.

¹⁹ Akuh, Paulus, nulih otuh ma silung kuh leh ika monjamin iyoh: “Akuh angar molunas eh.” (Tapi, aroh solingo iko tohutang ma akuh, iyohonon kobolum mu co baa ponah Yesus Kristus.)

²⁰ Iyoh, konduang kuh! Sawotkuh iko jarin boguna indang kuh nyan ponah Tuhan. Mohiburboh atoikuh nyan ponah Kristus.

²¹ Akuh nulih surat cotuh awi akuh yakin iko angar tuhit. Akuh monau iko angar nguan meleh hangki onon kole.

²² Bokon maiyoh, dohop nyodia bukung indang kuh nyan lopo mu, awi akuh porocaya Mohotara mongabur doa kokon kawan konduang hintang mehen akuh hopuli hia ikan.

Kawan antun tontiput Paulus ponah surat eh 1:23-25

²³ Tontoke ingkan Epapras co oko samah-samah ma akuh nyan seper tului are molayani Kristus Yesus.

²⁴ Tontoke ka ingkan Markus, Aristarkus, Demas hintang Lukas, iyohonon kawan konduang co ico gawi ma akuh ika momborita Tarung Pio.

²⁵ Akuh bodoa ina Tuhan Yesus Kristus santar mihi aang co pio hinut indam me.