Matius 1 - Alkitab Porjanjian Baa Ponah Bohasa Dayak Siang

Daptar tatu hiang Yesus, Laca Co Tomonjanji Mohotara co tonisi Kristus 1:1-17

¹ Otuhboh daptar tatu hiang Yesus. Yesus iyohco koturunan Laca Daud, hintang koturunan Abraham. Santuhboh daptar eh:

² Abraham iyohco taman Ishak; Ishak non iyohco taman Yakup; Yakup tuh iyohco taman Yehuda hintang kawan konduang kuhung eh;

³ Yehuda empun duo anak iyohonon Peres doruo Jerah. (Tinan doruo non iyohco Tamar). Peres iyohco taman Hejron; Hejron tuh iyohco taman Ram;

⁴ Ram non taman Aminadap; Aminadap iyohco taman Nahason; Nahason yoh taman Salmon;

⁵ Salmon non iyohco taman Boas. (Tinan Boas iyohco Rahap.) Boas iyohco taman Obed. (Tinan Obed iyohco Rut.) Obed tuh iyohco taman Isai;

⁶ Isai tuhboh co taman Laca Daud. Daud tuh iyohco taman Salomo. (Tinan Salomo iyohco Batseba, iyohonon oruh Uria sorinai kawin ma Daud.)

⁷ Salomo iyohco taman Rehabeam; Rehabeam tuhboh co taman Abia; Abia iyohco taman Asa;

⁸ Asa iyohco taman Yosapat; Yosapat iyohco taman Yoram; Yoram tuh iyohco taman Usia;

⁹ Usia empun anak iyohonon Yotam; Yotam tuh iyohco taman Ahas; Ahas tuhboh co taman Hiskia;

¹⁰ Hiskia iyohco taman Manase; Manase iyohco taman Amon; Amon empun anak co araieh Yosia;

¹¹ Yosia nonboh co taman Yekonya iroh hokonduang kuhung. Hiah waktu cioh orong dulun Yahudi jarin tonawan jaman ojat paluh tomehen hia negri Babel.

¹² Opah dulun Yahudi tomehen hia Babel, Yekonya empun anak co arai eh Sealtiel; Sealtiel iyohco taman Jerubabel;

¹³ Jerubabel tuh iyohco taman Abihud; Abihud non taman Elyakim; Elyakim iyohco taman Asor;

¹⁴ Asor iyohco taman Sadok; Sadok tuh taman Akim; Akim iyohco taman Eliud;

¹⁵ Eliud taman Eleasar; Anak Eleasar iyohco Matan; Matan tuh iyohco taman Yakub;

¹⁶ Yakub cotuhboh co taman Yusup. Yusup cioh co banan Maria co nganak Yesus, Laca co tonisi ‘Kristus’.

¹⁷ Jadi, oko opat balas turunan ingkan Abraham dapot Daud. Oko opat balas turunan ka ingkan Daud dapot hiah waktu dulun Yahudi jarin tonawan jaman ojat co tomehen hia negri Babel. Hintang oko opat balas turunan kole ingkan jaman towanan cioh dapot korombut Kristus.

Yesus, iyohonon Laca Co Tomonjanji Mohotara tonganak 1:18-25

¹⁸ Sorinai Yesus Kristus tonganak, tojadi isan otuh: nyan kotika cioh tinan Yesus iyohco Maria, botunangan ma Yusup. Houn ma iroh kawin, tonyata Maria ocop botohi. Iyoh tojadi awi tului kuasan Roh Mohotara.

¹⁹ Tapi Yusup tunangan Maria yoh iyohco dulun co bolum bujur nyan tohimo Mohotara. Are mahi aroh kolu nyongkohaan Maria nyan muka umum. Poko tului iyoh, are jere mutus hubungai ma Maria socara tonih-tonih.

²⁰ Tapi waktu Yusup rahat momikir aang cioh, dombut molekat Tuhan Mohotara hiaeh ponah nupi. Molekat cioh mantun, “Yusup, koturunan Laca Daud, aroh takut monu Maria jarin oruhmu. Tului, kuasan Roh Mohotara umpi Maria jarin botohi daja conon.

²¹ Maria angar nganak ico anak bakah. Iko sobulih ngaran Are Yesus, awi Are angar nyolamat umat-Eh ingkan kawan dosan doh.”

²² Kokon aang taiyoh tojadi ina antun Tuhan Mohotara jarin nyata. Nyan jaman sinan oko nabi co nulih antun Mohotara non:

²³ “Porhatiboh! Ico lehoi tindoh angar jarin botohi, paluh nganak ico longa bakah. Iroh angar ngaran Are, Imanuel.” (Ara co Imanuel yoh co artieh ‘Mohotara somin to’.)

²⁴ Jadi, Yusup monyun ingkan koponiruieh paluh nguan ome co tomorentah molekat Tuhan cioh maeh. Are monu Maria jarin oruh eh.

²⁵ Tapi Yusup aroh hokobuah ma Maria dapot Maria nganak Daja cioh. Opah Daja cioh tonganak, Yusup ngaran-Eh, Yesus.