Markus 3 - Alkitab Porjanjian Baa Ponah Bohasa Dayak Siang

Yesus pomambuh dulun nyan ondo Sabat 3:1-6

¹ Yesus hopuli kole hia lopo ika sombayang. Nyan intin oko ico beti dulun co siluieh matoi silaieh.

² Kawan dulun Parisi hosoroli Yesus, nyau noto amun Are pomambuh dulun cioh. Monurut iroh, iyoh tomasuk alogawi co aroko boraoi tonguan nyan ondo Sabat. Jadi, daai iroh boraoi nondah Are.

³ Yesus mantun ma dulun cioh co siluieh matoi silai, “Haas, tonjok nyan intoi tohun kawan dulun tatuh!”

⁴ Paluh, Yesus mantun ma kawan dulun Parisi, “Ome co boraoi to umpi nyan ondo Sabat, umpi aang co pio atawa umpi kojahat; nyolamat dulun atawa ngompatoieh?” Tapi iroh tonih leh.

⁵ Yesus jorung tului atoi doh makeng. Ma angit, Are nolangon koliling hia kawan dulun nyan intin. Paluh, hie-Eh ma dulun cioh co siluieh matoi silai, “Nyoro silum!” Kotika dulun cioh nyoro siluieh, are pio.

⁶ Maka kawan dulun Parisi naat lopo ika sombayang cioh, holuh nyua borunding ma pira-pira dulun pondukung Herodes, ika ngompatoi Yesus.

Orong dulun ingkan kawan ika co ocu dombut hia Yesus 3:7-12

⁷ Yesus hintang kawan murid-Eh naat ika cioh hintang tulak mahah danau Galilea. Orong dulun ingkan propinsi Galilea ngumba iroh. Oko ka dulun ingkan propinsi Yudea,

⁸ ingkan kota Yerusalem, ingkan derah Idumea, ingkan hila tosok ondo sungoi Yordan, ingkan derah sokitar kota Tirus hintang Sidon. Uras doh dombut hia Yesus awi iroh ngoneh tintun kokon co ocop tongompiai.

⁹ Are nyuhu kawan murid-Eh nyodia jukung indai-Eh ina Are aroko hotorenye pian dulun orong yoh.

¹⁰ Tului, Are ocop pomambuh sanioh kuhat dulun, dapot uras dulun co hotoro hotorenye bousaha ngoroni Are ina ngoncamak Are.

¹¹ Hiah kawan roh jahat taiyoh kito Yesus, iroh lansung potonturok nyan tohimo-Eh. Kawan roh jahat noriak, “Ikoboh Anak Mohotara!”

¹² Tapi ma kotegas Yesus morentah iroh ina aroh mara dulun bahawa Are Anak Mohotara.

Yesus mili duo balas rasul-Eh 3:13-19

¹³ Yesus nukat hia tungkui lungkuh paluh naah kawan dulun co nyau tomili-Eh. Jadi, iroh dombut hia-Eh.

¹⁴ Are mili duo balas dulun ika horoholuh ngumba Are. Duo balas dulun tatuh tonisi-Eh ‘rasul’. Are nyoruhan iroh ika momborita Tarung Pio

¹⁵ hintang mihi kuasa indan doh ika musir kawan roh jahat.

¹⁶ Duo balas dulun co tomili-Eh iyohco: Simon (co pian Yesus araieh Petrus),

¹⁷ Yokobus (anak Sebedeus) hintang konduang eh Yohanes. (Doruo hokonduang tuh tongompian Yesus aran Boanerges, artieh kawan anak duhung.)

¹⁸ Solanjut eh oko Andreas, Pilipus, Bartolomeus, Matius, Tomas, Yokobus (anak Alpeus), Tadeus, Simon (dulun Selot),

¹⁹ hintang Yudas Iskariot (co opaiyoh nyarah Yesus ma kawan dulun co naleh-Eh).

Yesus tonondah hapo kuasan Lacan Setan 3:20-30

²⁰ Yesus muntam ico lopo. Tapi orong dulun dombut kole bokumpur nyan intin. Jadi, Yesus hintang kawan murid-Eh aroko kojuan kuman.

²¹ Kawan dulun mantun, “Are ocop bobujon!” Kotika koluarga-Eh ngoneh iyoh, iroh tulak ika monu Are.

²² Kawan guru agama Yahudi co dombut ingkan Yerusalem mantun, “Are tonguasa pian Lacan Setan! Lacan Setan yoh co mihi kuasa indai-Eh ika musir kawan roh jahat.”

²³ Tapi Yesus naah iroh, paluh mantun ma iroh hapo tindung. Hie-Eh, “Aroko bodai roh jahat musir roh jahat co bokon!

²⁴ Amun ico korojaan topacah ponah kawan golongan co hobomusuh, mositi korojaan cioh angar lumat.

²⁵ Amun anggota koluarga hobomusuh, mositi koluarga cioh angar hancur.

²⁶ Sanioh ka nyan ponah korojaan Setan. Amun nyan ponah korojaan Lacan Setan tobagi-bagi hintang hobomusuh, korojaan cioh aroko lian botahan hintang mositi angar lanyap.

²⁷ Amun oko dulun nyau muntam lopo dulun co kuat ina morampas harta bandaeh, mositi are sobulih mowot dulun co kuat cioh houn. Hanyar are lian morampuk lopo cioh.

²⁸ Ngoneh ehyoh! Sika dulun co bodosa atawa mohina, dulun cioh boraoi tomampun.

²⁹ Tapi dulun co mohina Roh Mohotara, dulun cioh aroko piji angar tomampun. Dosa cioh umpi dulun sala sokotahi-tahieh.”

³⁰ Yesus mantun isanioh awi iroh mohina Are ma antun bahawa Are tonguasa roh jahat.

Koluarga Yesus co kotuueh 3:31-35

³¹ Opah iyoh tinai hintang kawan konduang Yesus dombut. Iroh nundui nyan luar hintang nyuhu dulun naah Yesus.

³² Hiah waktu cioh, oko orong dulun tuot toliut-Eh. Iroh mantun ma-Eh, “Pa, tinam-Mu hintang kawan konduang-Mu oko nyan luar, nyau nyopopak Iko.”

³³ Tapi Yesus mantun, “Omeboh tinang-Kuh? Omeboh kawan konduang-Kuh?”

³⁴ Yesus nolangon kawan dulun co tuot toliut-Eh. Hie-Eh, “Kawan dulun tatuhboh iyohco tinang-Kuh hintang kawan konduang-Kuh!

³⁵ Kokon dulun co nguan ome co tongojere Mohotara. Iroh iyohco konduang-Kuh co bakah, konduang-Kuh co bawe hintang tinang-Kuh.”