Kolose 1 - Alkitab Porjanjian Baa Ponah Bohasa Dayak Siang

Tontoke ingkan Paulus 1:1-2

^1-2 Indan kawan konduang co husus tioh Mohotara nyan kota Kolose co tenden aroko borubah porocaya ma Kristus. Surat cotuh ingkan akuh, Paulus. Akuh tonaah ina jarin rasul Kristus Yesus tului iyoh kojere Mohotara. Tontoke ka ingkan Timotius, konduang to co mahi porocaya. Akuh bosukur ma Mohotara co Taman to porahan kopioi hintang mihi kongolandah kongolami indam me.

Paulus bodoa indan jomaat nyan Kolose 1:3-14

³ Tiap kali kaih bodoa indam me, kaih botorima kasih ma Mohotara. Are iyohco Tama ingkan Tuhan co bokuasa ma ito, iyohonon Yesus Kristus.

⁴ Kaih bosukur awi kaih ocop ngoneh bahawa ikan porocaya ma Yesus, Laca Co Tomonjanji Mohotara, iyohonon laca co tonisi ka ‘Kristus’. Kaih mahi bosukur awi koneh kaih bahawa ikan mongasihi kokon umat-Eh.

⁵ Ikan porocaya hintang mongasihi tului ikan yakin moharap kokon co tonyodia Mohotara indam me nyan sorga. Ikan ocop ngoneh tintun iyoh ponah Tarung Pio co buah

⁶ co ocop tomorapot indam me. Tarung Pio cioh porombut aang co pio indan kawan dulun hintang horoholuh tosebar hia ngolauh dunia. Isan iyohboh ka co tojadi nyan halo ikan, ingkan waktu ikan ngoneh Tarung Pio yoh paluh paham koboraoi Mohotara co sobujur eh

⁷ Ikan monau kokon iyoh ingkan Epapras, konduang co tongasihi kaih. Are iyohco jolaha pio ponah gawi molayan Kristus. Are molayan nyan halo ikan ma kosotia.

⁸ Paluh, are mara ma kaih bahawa kuasa ingkan Mohotara, ikan lian hopomasi.

⁹ Poko tului iyoh, ingkan kaih ngoneh tintun ikan, kaih horoholuh bodoa indam me. Kaih nyawot ina Mohotara umpi ikan boakar pikir hintang mampu paham kawan aang co rohani. Ma cara cioh, ikan hegah monau kojere-Eh.

¹⁰ Amun ikan monau iyoh ikan hegah bolum ma cara hopompahui ngonyorih Tuhan Yesus. Kokon alogawi pio co tongompiam me angar oko hasir co pio. Ikan mahi angar sasar monau tintun Mohotara hintang sasar nyono Are.

¹¹ Kaih mahi bodoa ina Mohotara porohon ikan ma kuasai-Eh co korinah bohimat lau. Ma isanioh, ikan hegah tenden borohon hintang bosabar nohimo kokon macam pondoritaan.

¹² Ikan hegah nguan iyoh ma kojorih jerah hintang botorima kasih ma Mohotara Tama. Are co umpi ikan patut haba tonga ingkan kokon co tonyodia-Eh. Iyohonon, kokon co tonyodia-Eh nyan Korojaan-Eh co sompolongah indan dulun umat-Eh.

¹³ Batuh, ito nyan pinda kuasan jahat. Tapi Are molapas ito ingkan iyoh. Are umpi ito jarin anggota ponah Korojaan Anak-Eh co tongasih-Eh.

¹⁴ Anak-Eh, Yesus, monangung hukuman dosan to, ina dosan to tomongampun.

Yesus Kristus co poko bokuasa ma kokon aranaang 1:15-23

¹⁵ Yesus Kristus iyohco sorupa kojere hintang sipat Mohotara. Oluco kolunon aroko boraoi kito Mohotara, tapi kolunon lian nyono Are molalui Yesus Kristus. Kristus co poko sulak hintang co poko penting ingkan kokon aranaang co tonampa.

¹⁶ Awi, kokon aranaang tonampa pian Are, iyohonon kokon aranaang nyan sorga hintang nyan pinda ondo, kokon aranaang co kitan hintang co aroko kitan, tomasuk kokon kuasa, korojaan, pomorintah. Kokon aranaang tomoncipta molalui Are hintang indan Are.

¹⁷ Are ocop oko sorinai kokon aranaang tomoncipta. Kokon aranaang tenden oko nyan ikaeh tului Are.

¹⁸ Are momimpin kokon jomaat-Eh samah isan kuhung bokuasa ma kokon beti. Are sumer kobolum baa co tomihi ma jomaat yoh. Are jarin portama co bolum hopuli ingkan pompatoi. Maka, Are leh co jarin poko penting ma kokon aranaang.

¹⁹ Awi, kokon sipat hintang kuasan Mohotara oko nyan ponah Kristus. Mohotara leh co ngonyere iyoh.

²⁰ Mohotara mahi ngonyere ina kokon aranaang boraoi hopuli pio bohubungan ma Are. Iyohonon, kokon aranaang nyan pinda ondo hintang nyan sorga. Mohotara nguan iyoh ma daha Kristus co pusit hiah waktu Kristus matoi nyan kaju sompolaki. Jadi, molalui Kristus kokon aranaang boraoi hopuli pio hubungan ma Mohotara.

²¹ Batuh ikan mula bolum ocu ingkan Mohotara. Ikan iyohco musuh Mohotara ponah atoi hintang pikiran me. Awi, alogawim me mahi jahat.

²² Tapi Kristus monangung hukuman dosam me yoh hiah waktu Are matoi nyan sompolaki Ma cara cioh, Mohotara ocop umpi ikan bodamai hopuli ma Are. Are nguan iyoh ina daai, nyan waktu ikan nohimo Are ika tomohakim, ikan aroko boraoi tomposala. Are angar mongangap ikan borasih, aroko dosa.

²³ Iyoh angar tojadi asar ikan tenden porocaya ma Yesus ma koborohon. Aroh dapot ikan umbot porocaya. Ikan sobulih aroh borubah yakin boharap bahawa Mohotara mondakan kokon co tomonjanji-Eh ponah Tarung Pio. Mula ikan ocop ngoneh Tarung Pio yoh. Tarung Pio cioh ocop tomomborita hia kawan dulun nyan ngolauh dunia. Akuh tuh, Paulus, ocop jarin dulun co molayani co momborita Tarung Pio yoh.

Paulus lera nohimo pondoritaan ika momborita Tarung Pio 1:24–2:5

²⁴ Makitu, akuh jorih jerah bahawa akuh boraoi mondorita indan kopentingan me. Akuh momonuhi pondoritaan Kristus co incah sobulih tomondorita. Akuh mondorita socara jasmani ika kopentingan betin Kristus, iyohonon kokon jomaat-Eh.

²⁵ Mohotara momporocaya akuh ma tugas molayan jomaat-Eh. Are nyuhu akuh ika porapot hia ikan socara cicip kokon Antun ingkan Are,

²⁶ iyohonon roncana-Are co aroko tomonau kolunon. Sinan ingkan Mohotara moncipta dunia tuh, arelu oko kolunon co monau roncana-Eh yoh. Tapi makitu, Are nompototo iyoh ma kawan dulun co husus tioh.

²⁷ Mohotara nyau mara ma iroh bahawa roncana-Eh korinah bohimat lau indan kawan bangsa bokon ma Yahudi. Tuhboh roncana-Eh: Kristus boraoi bolum nyan ponah arop me dulun bokon ma Yahudi. Borarti, ikan lian yakin moharap bahawa ikan angar norima kohormatan ingkan Mohotara.

²⁸ Kristusboh co tomomborita kaih hiah waktu kaih hapo kokon akar pikir ika pokingat hintang majar sika dulun. Kaih nguan iyoh ina kaih lian mehen sika dulun hia Mohotara ponah koadaan somporaka awi hokohico ma Kristus.

²⁹ Akuh korinah bojuang indan tujuan cioh. Akuh bojuang ma kokon tonaga ingkan Kristus co bogawi ponah arop kuh ma korinah kuasa.