Ibrani 1 - Alkitab Porjanjian Baa Ponah Bohasa Dayak Siang

Mohotara mantun ma ito molalui Anak-Eh 1:1-4

¹ Nyan jaman sinan, Mohotara hopander ma tatu hiang to molalui kawan Nabi. Mohotara derek mantun ma iroh hapo bobagai macam cara.

² Tapi, nyan kawan ondo torahir tuh, Mohotara hopander ma ito molalui Anak-Eh. Mohotara ocop natap Anak-Eh bohak empun kokon aranaang. Molalui Are, Mohotara moncipta dunia.

³ Are kopandau komuliaan Mohotara. Areboh gamar co nyata ingkan betin Mohotara leh. Kokon aranaang tenden botahan awi antun-Eh co bokuasa. Opah Are matoi ina kolunon tongorasih ingkan kawan dosan doh, paluh Are nukat hia sorga hintang tuot nyan ika co tohormat nyan topit kontoun Mohotara co Poko Bokuasa.

⁴ Jadi, Are mias meleh tohormat hangki kawan molekat. Are ihin aran co ocu meleh tohormat hangki aran co ihin indan doh.

Anak Mohotara meleh penting hangki kawan molekat 1:5-14

⁵ Ito monau iyoh tului Mohotara aroko piji mantun santuh ma ico molekat mahi, “Iko iyohco Anak-Kuh. Ngondaii tuh Akuh ocop porahan bahawa Akuboh Tamam-Mu.” Mohotara mahi aroko piji mantun santuh tintun ico molekat, “Akuh angar jarin Tamai-Eh, hintang Are angar jarin Anak-Kuh.”

⁶ Tapi, nyan kotika Mohotara nyoruhan Anak tutuh-Eh hia dunia tuh, Mohotara mantun, “Kokon Molekat Mohotara sobulih nyembah Are.”

⁷ Mohotara mantun santuh tintun kawan molekat, “Mohotara umpi kawan molekat-Eh jarin bahi, kawan polayan-Eh jarin ori apui.”

⁸ Tapi Mohotara mantun santuh tintun Anak-Eh, “Iko, yoh Mohotara, momorintah nyan tungkui korusi korojaan-Mu sokotahi-tahieh. Iko momorintah ma kosucing nyan ponah Korojaan-Mu.

⁹ Iko jorih amun dulun umpi co bujur, tapi Iko aroko herak amun dulun naleh kawan porentah-Mu. Iyohboh tuluieh Mohotara, Mohotaram-Mu, nitik minyak nyan tungkui Iko sobagai ciri Are mohormat Iko meleh hangki kawan jolaham-Mu. Hormat cioh umpi Iko jorih jerah.”

¹⁰ Mohotara mahi mantun santuh tintun Anak-Eh, “Hiah kosulak eh, yoh Tuhan, Iko moncipta tana danum. Iko moncipta langit ma silum-Mu leh.

¹¹ Kokoieh yoh angar borahir, tapi Iko tenden oko sokotahi-tahieh. Langit hintang tana danum tuh angar jarin samah isan lembon co tomuun.

¹² Iko angar nikon dunia samah isan jubah tonikon. Iko angar nganti dunia tuh samah isan dulun nganti lembon. Tapi Iko tenden samah sumong kototahieh. Iko aroko angar borahir.”

¹³ Mohotara mahi mantun santuh ma Anak-Eh, aroh ma kawan molekat-Eh, “Tuotboh nyan ika co tohormat nyan topit kontoung-Kuh. Tuotbat nyan intoi dapot Akuh umpi kawan musuh-Mu nyook ma kuasam-Mu.”

¹⁴ Kokon molekat iyohonon kawan roh co molayan Mohotara. Mohotara nyoruhan iroh ina dohop kawan dulun co angar tonyolamat pian Mohotara.