Epesus 1 - Alkitab Porjanjian Baa Ponah Bohasa Dayak Siang

Tontoke ingkan Paulus 1:1-2

¹ Surat cotuh ingkan akuh, Paulus. Akuh tonaah ika jarin rasul Kristus Yesus awi iyoh kojere Mohotara. Surat cotuh indan kokon dulun umat husus tioh Mohotara nyan kota Epesus, iyohonon kawan dulun co porocaya ma Kristus Yesus.

² Akuh bodoa mudahan Mohotara Taman to hintang Tuhan Yesus Kristus porahan kopion atoi ma ikan hintang umpi kobolum me ngolandah hintang ngolami.

Ito co porocaya ma Kristus haba orong aang co pio hinut 1:3-14

³ Topotaraboh Mohotara hintang Tama ingkan Yesus Kristus, Tuhan co bokuasa ma ito. Mohotara ocop mihi indan to kokon aang co pio hinut ingkan sorga ponah Kristus.

⁴ Awi, sorinai Mohotara moncipta dunia tuh, Are ocop mili ito jarin umat-Eh ponah Kristus. Tujuan-Eh ina to jarin borasih, arelu oko dosa nyan tohimo-Eh.

⁵ Mohotara mongasihi ito. Jadi, ingkan kosulak, Are mili ito ika jarin kawan anak-Eh tului alokuan Yesus Kristus. Mohotara nguan uras iyoh awi iyoh sosuai ma kojere-Eh hintang ngonjorih atoi-Eh.

⁶ Are nguan iyoh ina to nara kopion atoi-Eh co toporahan-Eh indan to, iyohonon ma cara nyarah Anak-Eh co tongasih-Eh.

⁷ Hiah waktu Anak-Eh matoi nyan sompolaki, Are nahur ma daha-Eh ika polampas ito ingkan hukuman dosa. Jadi, nyan ponah Anak-Eh, maka Mohotara mampun dosan to. Mohotara nguan kokon iyoh tului kopion atoi-Eh co korinah kahai.

⁸ Mohotara mihi kopion atoi-Eh yoh indan to ma hapo akar pikir hintang pomahaman.

⁹ Awi, Mohotara ocop mara ma ito roncana-Eh co sinan aroko tomonau kolunon. Ingkan kosulak, Mohotara ocop nantueh bahawa roncana-Eh angar tongompian molalui Kristus. Roncana-Eh yoh sosuai ma kojere-Eh hintang ngonjorih atoi-Eh.

¹⁰ Tuhboh roncana Mohotara cioh: Nyan kotika co ocop tonantu-Eh, Are angar nguan kokon aang nyan sorga hintang nyan pindaondo jarin ico hintang Kristus bokuasa ma kokoieh.

¹¹ Mohotara nguan kokon aranaang sosuai ma kojere-Eh hintang koputusan-Eh leh. Ingkan kosulak, Are ocop oko tujuan ika mili kaih. Jadi, nyan ponah Kristus, Mohotara umpi kaih jarin umat-Eh.

¹² Ma isanioh kaih co meleh houn boharap ma Kristus lian nara Are tului kuasai-Eh.

¹³ Sanioh ka ma ikan. Ikan ocop ngoneh Tarung Pio co buah dapot ikan porocaya ma Kristus hintang tonyolamat. Nyan ponah Are, Mohotara mihi ciri bahawa ikan jarin umat-Eh ka, iyohonon Are mihi Roh-Eh indam me ka sosuai ma janji-Eh sorinaieh.

¹⁴ Pihi Roh-Eh indan to iyohco jaminan bahawa Are angar horoholuh mihi indan to kokon co tomonjanji-Eh, sukun kojekaieh ito co jarin umat Tioh tongolampas ingkan dosa. Tului iyoh, Mohotara patut tonara awi Are tohormat.

Paulus bodoa indan dulun co porocaya 1:15-23

¹⁵ Tului iyoh boh, opah akuh ngoneh bahawa ikan porocaya ma Tuhan Yesus hintang ikan mongasihi kokon dulun umat husus tioh Mohotara,

¹⁶ akuh aroko umbot bosukur hintang bodoa indamme.

¹⁷ Akuh bodoa hia Mohotara Tuhan to Yesus Kristus, Mohotara Tama co tohormat, ina Are mihi Roh-Eh indam me co umpi ikan boakar pikir hintang nyono Are sasar jalom kole.

¹⁸ Akuh bodoa Mohotara mukap atoi me ina me tuu-tuu paham kokon co lian tongoharap me ingkan Mohotara awi Are ocop naah ikan jarin umat-Eh. Akuh bodoa ina me monau korinah kuhat aang co pio hinut co angar Mohotara mihi indam me, sobagai kawan dulun husus Tioh.

¹⁹ Akuh bodoa ka ina me monau bahawa kuasai-Eh korinah kahai, iyohonon kuasai-Eh co hapai-Eh indan to co porocaya. Kuasa cioh samah ma kuasa

²⁰ co hapai-Eh ika umpi Kristus bolum hopuli ingkan pompatoi, samah ma kuasa co hapai-Eh ika mihi kodudukan indan Kristus nyan ika co tohormat nyan topit kontoui-Eh nyan sorga.

²¹ Are umpi Kristus meleh bokuasa hangki kokon kuasa bokon, iyohonon kokon pomimpin, kokon pomorintahan, kokon laca, kokon dulun penting. Kristus meleh bokuasa hangki kokoieh aroh baya makitu nyan dunia tuh, tapi ka indan sokotahi-tahieh.

²² Mohotara ocop umpi kokon aranaang nyook nyan pinda kuasan Kristus. Are ocop mihi Kristus indan kokon dulun porocaya sobagai Tuhan co bokuasa ma kokon aranaang. Kristus isan Kuhung,

²³ hintang ito co porocaya isan beti-Eh. Are nyomporaka ito, iyohonon Are co nyomporaka kokon aranaang.