San Judas 1 - Ti Biblia (1973)

Dagiti tao a di agraem iti Dios.

¹ Ni Judas, adipen ni Jesu-Cristo, ket cabsat ni Santiago, isuratna cadagiti managan ay-ayaten iti Dios Ama ket maaywanan a maipaay ken Jesu-Cristo:

² Caasi ken talna ken ayat umaduda coma cadacayo.

³ Ay-ayatec, idinto nga icabilco ti amin a kinaregtac nga agsurat cadacayo iti maipapan iti pannacaisalacantayo a sapasap napilitac nga agsurat cadacayo, a balacadancayo tapno makidangadangcayo a sibibileg gapu iti pammati a naminpinsan a naited cadagiti sasanto.

⁴ Ta adda dadduma a tattao a simrecda a di nadnadlaw dagidiay sigud a nacaisuratan ti maipaay itoy a pannacadusa, nadangkes a tattao a pagbalinenda a derrep ti parabur ti Diostayo, ket paglicudanda ti cacaisuna a Mannursuro ken Apotayo, a Jesu-Cristo.

⁵ Tarigagayac ngarud nga ipalagip cadacayo, idinto nga ammoyon amin a ti Apo, idinto nga inaonna ti maysa nga Ili idiay daga ti Egipto, calpasanna pinucawna dagiti saan a namati.

⁶ Ket dagiti angel a saanda a tinaginayon daydi nacaicasigudanda a casasaad, no di ket pinanawanda daydi umisu a pagyananda, incabilna ida cadagiti agnanayon a pannacabalud, iti yan ti sipnget, agingga iti panangocom ti naindaclan nga aldaw.

⁷ Cas met iti Sodoma ken Gomorra, ken dagiti ciudad iti caparangetda, idinto a cas cadagitoy, nga inyawatda ti bagida iti pannakiabig, ken idinto a simmorotda iti naisingayan a lasag, a maicabilda a cas pagwadan nga aglaclac-am iti dusa ti apuy nga agnanayon.

⁸ Ket, casta met dagitoy cadagiti dardarepdepda ket rugitanda ti lasag, ket umsienda ti agturay, ken agbassawangda cadagiti natan-oc.

⁹ Ngem ni Miguel nga arcangel, idi a nakibacal iti diablo, ket nakisussusic iti maipapan iti bagi ni Moises, saanna a naitured ti nagipato a sitatabbaaw, no di ket kinunana: Ti Apo tubngarennaca coma.

¹⁰ Ngem dagitoy agtabbaawda iti uray aniaman a dida maawatan; ket ti nacaisigudanda a cas cadagiti ananimal nga awan nakemda, cadagitoy agrupsada.

¹¹ Asida pay ta nagnada iti dalan ni Cain, ket nagdarasudusda iti nacallilawan ni Balaam, gapu iti maysa a gonggona, ket nadadaelda iti panagsupring ni Core.

¹² Dagitoy a tao isuda dagiti batbato a nalemmeng cadagiti pagdadayaanyo iti ayat, a no makidayada cadacayo, makipanganda nga awanan bain; ul-ulep nga awan danumda, nga itayab dagiti angin; caycayo nga awan bungada iti panagapit, a naminduada a natay, ken naparut a siraramut.

¹³ Daldal-luyon a nadawel ti baybay, nga ilabutabda dagiti pacababainanda met laeng; bitbituen nga agal-la-al-la, isuda a nacaisaganaan ti ngisit iti kinasipnget nga agnanayon.

¹⁴ Ket cadagitoy met impadto ni Enoc, daydi maicapito nanipud ken Adam, a kinunana: Adtoy nga immay ti Apo, a cuyugen dagiti linaclacsa a sasantona,

¹⁵ Tapno aramidenna ti panangocom cadagiti isu-amin, ken mangipanecnec cadagiti amin a managdacdakes iti dagup dagiti gapuananda a dakes, nga inaramidda iti kinamanagtabbaawda, ken dagiti isu-amin a bassawang kencuana a sinao dagiti managbasol a nadangkes.

¹⁶ Dagitoy isuda dagiti managtanabutob, naagal, a sursurotenda dagiti dakes a tarigagayda (ket ti ngiwatda saoenna dagiti sao a naparammag) a iparparangda ti pammasablogda cadagiti tattao gapu iti magonggonada.

Camaudianan a bagbagana.

¹⁷ Ngem dacayo, cacabsat, lagipenyo dagidi sasao nga insaoda idi damo dagiti apostol ni Apo tayo a Jesu-Cristo:

¹⁸ Nga kinunada cadacayo: Iti camaudianan nga tiempo addanto mangrabrabngis a sumursurot cadagiti nadangkes a tarigagayda.

¹⁹ Dagitoy isuda dagiti agaramid iti panagsisina, naderrepda, ket awananda ti Espiritu.

²⁰ Ngem dacayo, cacabsat, rumang-aycayo iti nasantoan unay a pammatiyo, nga agcarcararagcayo iti Espiritu Santo.

²¹ Agtaengcayo iti panagayat iti Dios, a namnamaenyo ti asi ni Apotayo a Jesu-Cristo, a maipaay iti biag nga agnanayon.

²² Caasianyo dagiti dadduma, nga addada iti panagduadua;

²³ Ket isalacanyo dagiti, dadduma, nga yadayuyo ida iti apuy: dagiti dadduma caasianyo ida a siaamac; carugityo uray ti pagan-anay a marugitan iti lasag.

²⁴ Ket iti daydiay mannacabalin a mangigaga cadacayo iti pannacaitibcolyo, ken mangidatag cadacayo nga awan pakapilawanyo iti sangoanan ti dayagna a buyugen ti naglaus a rag-o.

²⁵ Iti maymaysa a Dios, a Manangisalacan cadatayo gapu ken Jesu-Cristo nga Apotayo, adda coma ti kinadayaw, kinadayag, ken kinaturay ken ti pannacabalin idi punganay, ita ken iti agnanayon nga awan inggana; Amen.