Ujughuo 1 - Sumu Yedi ya Isa Masiya 1906 Kitamo 1897 Malumbo 1905

¹ Ujughuo wakwe Yesu Kristo, egho Izuwa emwingie awawonje wazoro wakwe, vindu visina huwo kuoka afuhi: akatuma akawonja hena malaika wakwe ha mzoro wakwe Yohana;

² eye eng’olie mburi ya kiteto kyakwe Izuwa, na ya mburi ya Yesu Kristo, ya vyose eviwonie.

³ Etasiwa ula esoma, na wala wesikia viteto vya wuroti, na wevigura vindu vitamiwe uko: amu magheri afuhi.

⁴ Yohana hena makanisa mafungate meoho Asia: Mvono henyu na luworo, kufuma hakwe ula eoho na eokie na eneza; na kufuma Ngoma jila fungate jioho msongorana wa kiikayo kyakwe:

⁵ na kufuma Yesu Kristo, shahidi mwitikiji, mbele wa wefwie, na mwitorie wafumwa wa masanga. Hakwe etukundie, na etuchunguie ghati ya ng’oki jetu hena sakame yakwe:

⁶ akatuosha ufumwa, wakohani hena Izuwa wakwe na Wawee: hakwe kirumi na kuitoria ndarasi na ndarasi. Amen.

⁷ Yoa, eza na majumbi: na ijiso lose linembona, na wala wemsomie: ne mbare jose ja masanga jinemwiyia. Ni huwo, Amen.

⁸ Nimi Alfa na Omega, eteta Mzuri Izuwa, eye eoho na eokie na eneza, Mwenye‐zinya.

⁹ Mi Yohana, mdwenyu na mshanga na unywi ghati ya wasi na ufumwa na lugumirio ghati ya Yesu, niokie ghati ya kidara kila kiitangwa Patmos, hena kiteto kyakwe Izuwa na mburi ya Yesu.

¹⁰ Niokie ghati ya Ngoma hena musi wa Mzuri, nikasikia nyuma yangu ighonda ibaha,

¹¹ sa la lughunda, likiteta, Kila ukiwona, kitame na chuo, urekiingija hena makanisa mafungate: hena Efeso, na hena Smurna, na hena Pergamo, na hena Thuatira, na hena Sardi, na hena Filadelfia, na hena Laodikea.

¹² Nikagharuka niwone ighonda litetie nami. Nikiidiwa kugharuka nikawona taa fungate ja thahabu;

¹³ na ghati na ghati ya taa mwe efwanana na mwana wa mundu, edokie suke mtano na kughu, na echungiwe mbafuni na ngana ya thahabu.

¹⁴ Na mtwi wakwe na nyui jakwe jikaoka nyewa sa suffu nyewa, sa Kiboo: meso makwe makaoka sa luwerewere lwa moto;

¹⁵ na maghu makwe sa usango usingiwe, sawundu uzerrijwe ghati ya moto‐wa‐mwaaria; na ighonda lakwe sa ighonda la mbombe nyingi.

¹⁶ Mkononi hakwe ha kuume akaoka na ndondo fungate; muhandi ukaehe wa kutema mbai jose ukafuma ghati ya itumbu lakwe: wusho wakwe wukaoka sa nzano ikiwaa na zinya yakwe.

¹⁷ Nikinambone, nikagwa maghuni hakwe sa mundu efwie. Akaniwikia mkono wakwe wa kuume, ekiteta, Usiituke; nimi wa kuwoka na wa kuidiwika, na Mwenye‐moo;

¹⁸ Nikaoka nifwie, na yoa nioho na moo ndarasi, Amen; na nina funguo ja kifwa na Ahera.

¹⁹ Hena lwa iyo vitame vila uviwonie, na vindu vioho, na vindu vineoka ikwade.

²⁰ Mbiso ya ndondo fungate ujiwonie mkononi hangu ha kuume, najo taa fungate ja thahabu. Jila ndondo fungate ni malaika wa makanisa mafungate: najo taa fungate ni makanisa mafungate.