JOHN 1 - Akthar Trongirhna (BSI)

Akringtrong

¹ Kulkung nata Trongkha louamsa, che Trongkha Ringpu soh inruuia louamsa, che Trongkha Ringpu sa.

² Amah in kulkunga Ringpu soh louamjousa;

³ Poot anaamte amah apaalla inseemkirsa, inseempot anaamte amah jaonoh a inkhatkho inseemnoh.

⁴ Amahninga ringna louam, ringna chuva mii turel avaarna veisa.

⁵ Akvaar in inthim kaara amvaar, che anthim in akvaarta cheknoh.

⁶ Ringpu tingnata amthlah akming John ta an ong mii khat louam.

⁷ Amah in akvaarta sakhi aveinatu thlengsa, mah chuvah mii naamte in amah apaalla malot ancheknatu.

⁸ Amah atakvah akvaar khanoh, chuta akvaar khata asonnatu amah in thlengsa.

⁹ Mii naamteta amvaarnatu akchim akvaarkha tukleiramma thlengsa.

¹⁰ Amahvah tukleiramma louam, che tukleiramta amah apaalla aseempei, chuta tukleiram in amahta romnoh.

¹¹ Amah ataktal in thlengsa, chuta amah amiiei in amahta loulounoh ei.

¹² Chuta amah akminga malot a amahta aklou mii naamteta, Ringpu asa anveinatu amah in tuui amlannei;

¹³ Tunangkhat in amahninga akpok eiva, thiitingna khonoh nohle ruungtingna khonoh nohle mii in amdon tingna khonoh chuta Ringpu tingnasa.

¹⁴ Trongin ruung hukveisa, che malungsi leh akchim in ksip a ikaar a amsa; Pa tingna paarthra vei Asa kupa khalekru tingna apaarthrata imuhpei.

¹⁵ (John in mahmiita sakhi malanna onga ason, “Keiin ksonkha mahmii isa, kei kmaa a akthleng mii in keichunga kliin, alamva kei kiamnoh maa a amahvah louamsa.”)

¹⁶ Amah ningna aksip malungsi nata malungsi apumte inih naamte in iphahpei.

¹⁷ Alamva trongsuurkha Moses apaalla amlanpei, che malungsi leh akchimva Jisu Khrista apaalla thlengsa.

¹⁸ Tukhat inkho Ringpu ta loumuhnoh ei; Asa kupa khop in amuhning, Ringpu tingna khalekru vei Asa kupa apasoh annai amahta amrompei.

Aklup John vaa Trongraan

¹⁹ Judi ei thiimpu leh Levi eita Jerusalem nata mathlah a, “Nangi tucheme?” ta amiruilai John in aloumasang sakhisa.

²⁰ Amah in indah tlohnoh, chuta seenga phoonga asonei, “Keiva Khrista noh ang.”

²¹ Che amahta anrui, “Chuleva nangva tucheme? Elaiah cheme?” Che amah in asonei, “Keiva amahnoh ang.” “Ringraan cheme?” Amah in amsangei, “Amahnoh ang.”

²² Chunna amahta anson, “Nangi tucheme? Kannih kankuunga kanimsangro alamva kannihta kanimthlahmii ankuunga kansonnatu. Nangva tunangang nitihme?”

²³ John in ason, “Keiva rapril kaara an onghou miikhasang, ringraan Isaiah in asonnanga, ‘Akpu vaa lamkha mathluunve.’ ”

²⁴ Ipek anmahva Pharisi ankuungnata amithlah ei.

²⁵ Che amahta anrui, “Chule nangva Khrista khonoh chele, Elaiah khonoh chele mahche ringraan khonoh chele, nilup eikha jarelname?”

²⁶ John in amsang, “Keiin tuiia kiluppeichou, chuta nannih in nanromnoh nankaar a inkhat ngirra am,

²⁷ kei kiknua akthleng miivaa akehkhraang arui majakho keiva kimtik amnoh ang.”

²⁸ Mah anaamte i John in alupna Jordon araal Bethani a suuksa.

Ringpu vaa Sadam

²⁹ Akhuvar a Jisu in amahkuunga thleng amuh a amah in ason, “Anve, Ringpu vaa Sadam, tuklairamna alehta akloukha!

³⁰ Mahmii isa keiin kisonkha, ‘Kei kiknua akthleng mii ivah keichunga akliin, alamva amahvah kei kmaa a louamsa.’

³¹ Kei kitak in amahta romnoh ang; chuta mairella keiin tuiia aklup thlengsang, mah chuvah amah atakta Israel ankuunga aphoongnatu.”

³² Che John in sakhi malanna ason, “Keiin ringramna Li ukthru nanga atrumche amah achunga am kimuh.

³³ Kei kitak in amahta romnoh ang; chuta lupnatu keita kamthlah amah in keisonang, ‘Li in trumma achunga am nimuhna miital khanna nannihta Akseeng Li a naniluptu.’

³⁴ Kei kitak in muh a sakhi kamlanchou mah chuvah mah i Ringpu vaa Asa kupasa.”

Jisu vaa Matsahrem Aroiei

³⁵ Akhuvar a John in aroi innihsoh ngirra amjou;

³⁶ Jisu in asehlai amahta anna ason, “Anve, Ringpu vaa Sadam!”

³⁷ Mah in asonta aroi innih in antheih, che anmah in Jisu aknuta anjuihpei.

³⁸ Jisu in anheilai, amah aknuta anjuih amuh a ankuunga asonei, “Nannih in jangta nanjonme?” Amahkuunga anson, “Rabbi” (arthava Lulok), “Nang ramma amcheme?”

³⁹ Anmah kuunga asonei, “Thlenga anve.” Anmah in thlenga ramma ammeta anmuhpei; che mahni chunna amahsoh amjousei, alamva mahchu pung somvak tlasa.

⁴⁰ John atrong rungaia Jisu aknujuih mii innih inkhatva Simon, Pitar che anaokupa Andriu veisa.

⁴¹ Amah in matsah a amah ute Simon ta aktuuk a amahninga ason, “Inih in Miisa iktuukpei” (arthava Khrista).

⁴² Amahta Jisu kuunga athlenpei. Jisu in amahta anna ason, “Nangva John vaa asa kupa Simon che. Nangta Keiphas kiong uche (arthava Pitar).”

Jisu in Philip leh Nathanael ta Aong

⁴³ Akhuvar a Jisu in Kalili a asehnatu arilla ngirsa. Che Philip ta aktuuk a amahkuunga ason, “Kei kiknu keijuihro.”

⁴⁴ Philip vaa Andriu leh Pitar an amna khuuboom Bethsaida na.

⁴⁵ Philip in Nathanel antuukpia akuunga ason, “Moses trongthuunna injih mahche ringraan in amijih, Najareth na Joseph asa kupa Jisu kantuukpei.”

⁴⁶ Nathanel in amahta ason, “Najareth nata aktlei akthra inthruhsame?” Philip in amahta ason, “Thlenga anro.”

⁴⁷ Nathanel in Jisu kuunga thlengta amuh a, amahta ason, “Anro, taktak a Israel mii, akuunga aril chimnoh amnoh.”

⁴⁸ Nathanel in Jisu ta ason, “Keita khatloh a nakrom angme?” Jisu in amsang, “Philip in nangta nak ongnoh maa a nangin thotthing athuuia niamkha kimuhche.”

⁴⁹ Nathanel in amsang, “Rabbi, nangva Ringpu Asa kupache! Nangva Israel ei kurungche.”

⁵⁰ Jisu in akuunga amsang, “Keiin nangta thotthing athuuia kimuhche ta nikuunga kisonrelna namlotme? Maichung ralla anrolthlou nangin nimuh umang.”

⁵¹ Chela amahta ason, “Keiin nangta taktak a kisonche, nangin ringram inhoonga Ringpu vaa ringroi eiin miiva Asa kupa chunga trum kal nimuhtu.”