Yoel 1 - ASII LAKDAP Bible (BSI)

¹ Arka Tatiwe bomtsi Pethuel se Joel ma riisham bom maq atiichongki:

Chu-akham Thum Raüta Mungmaiqse Hoqto

² O, welabi lei, ara bomtsi ara tairong laq, Juda mungti tarü raq ara tiitsang tairong laq! Namshiq pat na akha ramdong chhiwan lan shea? Kiimaq namwetiim pat niimin akha ramdong chhiwan tiishea?

³ Namsetiim ma ara tsütsa ara chongkuq ronglaq, Kiimaq namsetiim riimin tsangsetiim maq michong kuq laq, Kiimaq namsaütiim riimin tsangsetiim ma michong kuq laq,

⁴ Atanphaqti kuprii raq jamlai wa tiichongtaq, kriika abok wanti kuprii raq phaqto. Abok wanti kuprii raq jamlai wa tiichongtaq, kriika adoqti kuprii raq phaqto, adoqti kuprii raq jamlai wa tiichongtaq, kriika arang chong maq tiipotlii phaqti kuprii raq phaqto.

⁵ Tiido ronglaq, cherop tsampiiti lei, lanta hoqtrang rong laq. Chechok tsampiiti lei agilülü hoqtrang ronglaq. Namchekhap kra miitu hoqtrang ronglaq, jamkhano ngukla ümchaü sanha nyanglu maü she.

⁶ Jamkhano ngukla imung arka, pongmungti re awa ikha kiraütiishe khatwanto. Ningkun ajong rewe pahea she saüto. Tsangwi ka hangsi kaüwi ikha, Tsangwi ka hangsi wi ikha sihea.

⁷ Tsangshiq raq nashiq spiq tsiro tiisiirai phaqbaiqto. Kiimaq iphupmup ro min achong maq wiita phaqbaiqto. Phupmup chongkü ako thun kra wiita she jungkito.

⁸ Hoqtrang ronglaq junrii wahüse, awese apaiq waitiwe kra tsaiki raüjaq hoqtlaq ikha, wunthaü riinaü khea samlanta, majo hoqsiq rong laq.

⁹ Tatiwe jam na wongrai honglu nai spiqtai honglu, kewan chang min ahüshe. Kriikha na Tatiwe jaqshamti ramwebi hoqtrang tlo.

¹⁰ Wakram thun kriimin thumthumshe thento, ahüshe. Wakram thun kiimin aho anyi walishe. Jamkhano ngukla tü nai tsam ri athum she. Che ri ahüshe, shinriiqriiq, spiq petsi tsai min ahüshe.

¹¹ Wakshamseati lei, tiirai ronglaq, Spiqtsiro shamti lei, aho asii trang ronglaq. Bunwong rü nai jaili rü thentaq kra miitu, wak wa tü atsam wiita thentaq kra miitu, hoqtrang ronglaq.

¹² Spiqraü tsung thun wiita shinriiqriiq. Phupmup tsi thun wiita roktito. Pomegrenet tsi, taitsi tsi, apel tsi, petsiro angu wiita shinriiqriiq shinkito. Krai mren maiqse tsantsii na chochi ahü. Khamrai rükitlaq ikha shinriiqriiq she sükito.

Mra Tiidii Wan Miitu Achujaü

¹³ Ramwebi lei, wunthaü riinaü khea sam lanta hoqtrang ronglaq, namshiq berongwacha na jaqshamti ramwebi lei, hoqtrang ronglaq! Warong ra Shomjam mong na Shiikeawe kolibi lei rawa minru! makphai khüshang hoq lanta, mra tiidii wan achujaü ronglaq! Ümchaü sanha, namshiq Shiikeawe jam na, wongrai honglu nai spiq tai honglu ke chang min ahüshe.

¹⁴ Amang maq achujaü wan miitu aming kuq ronglaq. Lanta mungmaiqse ka adam na thung ronglaq! Juda mungti welabi thun wiita adam na riitam ronglaq. Namshiq Tatiwe Shiikeawe Shomjam na, riitam wan ronglaq. Lanta Tati jaq wa aholülü maq tiitai jaü ronglaq.

¹⁵ Alei! Tatiwe ranaiq saütlo she! Tati Ajong Shiikeawe raq, mangjong maiqse shiithen baiq wan akhing saüwato she. Kra ranaiq thenjen wan akhing ka, pinthum phiiptsi chang sitlo!

¹⁶ Nammaklii rashra niili tü atsam wiita shiithen baiq wanto she. Nashiq Shiikeawe Shomjam niimin chochi ahüshe.

¹⁷ Alai thun min hiqmong na shinkito. Tsamtiip niimin tsam ahüshe. Tsamtum thun min shaqmiishe.

¹⁸ Jamnyamsekong aram raq wiita tsaiwanto. Aphaq chang nyiimjaq min ahüshe! Skukong min ram raq thumto, adungchang nyiimlung rü ahü she!

¹⁹ Tatiwe lei, ngi ümman na hoqsii tiikang, nyamse rüm chang sang rü ahüshe. Pechong wiirü min ahü she. Wa maq wiita chaq baiqto.

²⁰ Ümman na rumngamse thun wiita, aho anyi riichanchan hoqtrang tlo. Rum wa khamraisetiim thun wiita, shinriiqriiq she rükito. Rum na nyiimjaq aphaq chang ahü she.