Titus 1 - ASII LAKDAP Bible (BSI)

¹ Ngi, Paul, Shiikeawe jaqshise kiimaq Jesuq Khristo kiimwe raq waiq tiikang. Ngi ka tsea wanto raüta tiiwato Shiikeawe raq atsea wan asenginok kamasham kra khrumke wa miitu. Kiimaq tsangshiq ka nashiqnok kamasham lamphan na shrinkuqtlaq tengtlaq bomtsi kra tiisapke wan lan na shunshea wan miitu.

² Arka pattup pat-sa rilung ma ran tiikai kra thaq na seng raüta chong tlo. Shiikeawe ka rot mak phan, apaiq raq nashiq ma ara mikuqha nguta kiqkham kuqto, rapha hiqwa min mishaq niiphü dongdii,

³ kiimaq akhing riikhaqli na apaiq raq kra apaiq tsütsa bomtsi na tiichhikuqto. Riita ara Tsütsa ara chongke arang ka ngi ma kiinong kuqto. Kiimaq ngi raq ara bomtsi ka Shiikeawe nashiq Chhiitiwe aming maq chii riim lata chongkuq tiikang.

⁴ Ngi raq, Titas ma waiqtiikang, apaiq ka ngi ma kamasham na i se shaq. Ara kamasham arka nainai wiita ma taro hupsam. Shiikea Awe raq kiimaq nashiq Chhiiti Khristo Jesuq raq ümniika kaphap shat kiimaq hansang maq mithülaq.

Phungtu Sheati Maiqlare Rong Arai

⁵ Ngi raq ümniika Kret wang na jaqsham tlot thü miitu baiqthü kang. Ümniiraq kra jaqsham atiinyi wan chang thun sitlaq kra, tlotli sham laq. Chelatek na phungtu liiti, maiqlare tsea laüta, shiikap laq. Ngi raq ümniima tsii chongkuq pha thun ira tsan na samhea tiitsangshat maq silaq.

⁶ Phungtu liiti maiqla weshi she nguta sitlaq kriika, phanrap na chiisan maiqse ashi dea nguta siti riichang. Maiqla nguta sitlaq kriika tsang-nyung min ashili riichang. Asetiim kiimin Phungmaiqsetiim siisaq riichang. Asetiim ka anyungwe wokhong na siti riichang. Tsangshiq raq anyungwe bom tlea raa mak.

⁷ Phungtu sheati maiqla weshi she nguta sitlaq kriika, Shiikeawe jaqsham tawun howanti nguta sitlo. Kriikha maq, apaiq khum na jamlai phan mrong mra si min maimak. Apaiq tsan na ashkong tsii si raa mak. Apaiq ka mokhiq kai min khiq raa mak. Apaiq ka cherop ja raa mak. Atsan khiq raüla, jasam piqsii pheraiti ka raa mak. Atsan na kampho ma sükha tsii min rüm raa mak.

⁸ Apaiq ka, wanwe shiiliti riichang. Kiimaq jamlai wa ahea sitlaq, kra phan jaq shamti riichang. Apaiq ka phanrap anin raüta sitiwe riichang. Mitting maiqse ashi riichang. Apaiq ka, akhum Shiikeawe ma kiinong raüta siti riichang. Kiimaq phanrap na athuk atsom shiiting shrai raüta, shiiku wan wan maq sitiwe riichang.

⁹ Apaiq ka kamtsantsii tri raütu ka, aphaq na wishat maq siti we riichang. Apaiq ka akha siraütiq, ahea lamphan kra ahea wiq maq mishrin kuq lot. Kiimaq, juwa ajiq lam phan tlaq, kriiti miimin, apaiq raq tsangshiq shut tlaq, kra lam ka mitru chongkuq lot.

¹⁰ Ara jamkhano chongtiikang ngukla, Phungmaiqsetiim phong na maiq pahea asi, akhek ka Jehudinok wa Phung na shang wantiiti phong na sitlo. Tsangshiq raq ara chongtiikai tingting kamasham bomtsi tri raütu arka, ajiq lam na chongkuq tlo. Tsangshiq raq athohan poi ka lang raa tlo nguta shrinkuq tlo. Akha ajiq lam na shrinkuq raüta, Phungmaiqse kamtsantsii ka tiiphing phiim tlo.

¹¹ Tsangshiq raq ajiq traho bom chongkuq tlaq kra, ümniiraq atiiwin riilaq. Tsangshiq raq lamjiq bom chongke wan kha maq, Phungmaiqse maiqta pahea, kamtsantsii ka tiipheng baiq hoto. Tsangshiq raq kra chongkuq mak chang, ajiq tri chongkuq tlo. Kriika tsangshiq maiqmii wokpo miitu, kampho lap ma nguta chongkuq tlo.

^12-13 Kretnok manphan ka asi dongdii. Kretnok wa shammi weshi raq, tsangshiq nok miitu akha chongthüto, “Kret wang na siti ka, tsangshiq chongwa phara, arot akiq phan dongdii. Tsangshiq ka roknin riishin phan dongdii. Kiimaq shakaq sükha phan dongdii.” Riita ara maiqmii tiichong phaq bomtsi tlü chong tlaq arka, tengteng dea. Arkha maq, ümniiraq kra arot shrabi ka atsi dada maq asea laüta tsii chongkuq laq. Krai mren, tsangshiq raq tsii mihumlaq. Raüta riikhaqli, Phungmaiqse kamtsantsii tri raütu kiijaq jaqkhon tiipha tiipha raüta misilaq.

¹⁴ Ümchaü sanha, tsangshiq Jehudinok manphan ajiq raütu kriika, akom raüta raqkam niishe mitiikü baiq laq. Kra manphan raüpot tu kriika, maiqse nübok maq adong. Arka Tengteng bomtsi kra lang makti nübok maq adong manphan.

¹⁵ Juwa tiima tsantsii asii maq sitlaq, kriiti miitu ka phanrap asii siisaq. Shatmaq ümriiti tiima tsantsii wa, ngarai raq atiisheshi baiq wishe, kiimaq krai mren, tsangshiq raq tengtlaq bomtsi ma kam mak maq sitlaq, kriiti miitu ka phanrap phanrii ka, ashe ashi siisaq. Tsangshiq miika apii ashan chang siisaq. Jamkhano ngukla, tsangshiq khutsai nai tsangshiq tsaiji ka, ngarai raq wiita atiishe shi baiq kun she.

¹⁶ Tsangshiq raq Shiikeawe ka saptiikai nguta tiitsaki rai tlo. Shatmaq, tsangshiq rilung na jaqsham tlaq kra riika, tsangshiq ka arot wetiim dea ngutli she, saqseng hakhi khoti kuq tlo. Tsangshiq ka Shiikeawe maklii na maiqphai asi, ashe sitlo. Tsangshiq ka Shiikeawe kiq khiiti. Tsangshiq ka jaqsham ahea shamti ka riimak she.