RUTHA 1 - ASII LAKDAP Bible (BSI)

Elimelekh Nai Ajamtitiim Ka Mob Mung Na Laühoto

¹ Phowebi raq Israil mung lang tlaq pat na, lakshi ram jonghea dongto. Ramdong kha na Juda wang wa Bethlehem chela na siti maiqwe ashi ka tsangnyung rai asenai kra sheaho raüta, Mob mung na sikai laühoto.

² Kriiwe mang ka Elimelekh. Tsangnyung mang ka Naomi. Tsangse maiqwese nai mang ka Maqlon nai Chilion. Tsangshiq ka Ephrath weraü wa. Kiimaq tsangshiq ka Juda wang na Bethlehem chela na siti. Tsangshiq ka Mob mung na laüho raüta kiina heashi sikai nguta kihoto.

³ Tsangshiq kiina sishon na, Naomi tawe Elimelekh ka tsaikito. Tsangwe tsaikai jai manti-nyung Naomi ka apaiq honhonse li she asenai rai sito.

⁴ Asenai raq Mob sheare Orpaq nai Rut lamto. Tsangshiq ka awe tsaijai wiiroqshi tin sijai na,

⁵ tsangnai siphu wenai Mahlon nai Chilion kiimin tsaiki nongto. Krai mren manti-nyung Naomi ka nanse nanjong, awese raq jamkho baiqthütaq kiikha, ase nai riimin hali anyung ka baiqthüto.

Naomi Nai Rut Ka Bethlehem Na Jangwanto

⁶ Kra jai maq heashi sijai na Tatiwe raq asengi Israilnok ma achu shiiman kuq raüta tsangshiq ka arong awin she sitlo nguta Naomi raq tsütsa ka Mob mung maq taito. Krai mren, Naomi ka anamnyung nai rai kongshi maq Mob mung kiiwa, tsangmung na wawan she tiijemeto.

⁷ Kra kaisea walam thapthi wantaq krai mren she, apaiq ka tsangshiq sichang hiqshong kiiwa anam-nyung nai rai Juda mung na jang wan nong lam niishe awarai riito.

⁸ Kiijiishe, Naomi raq anam-nyung nai ma tsii akha chongkuqto. “Namnai ka nam-nyungwe jam niili she jangho ronglaq. Namnai raq ngi ma kiimaq atsai amaati miitu jamkhiiwa lungwii tsantsii tiichhi kuq lan, kiikhiisii, Tatiwe riimin namnai ma shiiman kechu mitiijang kuq.

⁹ Kiimaq Tatiwe raq namnai wiita ma ashong anga chang jam awak kli samhea mitiihong tha kuq laq. Namnai wiita ma maiqmii we ase anye tiihum kuq raü jiidea ahea.” Kra tsii chongkuqtaq krai mren she, Naomi raq tsangnai ma kiimriiphea bompan theaphi shup raüta, warong liijo nguta bom pan bomto. Kiijiishe tsangnai ka jümii hoqtranghoto.

¹⁰ Kiimaq apaiq bom ka akhiishe treto, “Riimak, kiikha wiq wiq ka naq ngukiq. Nai nai raq ümniika miimthümai. Nainai ka ümniirai ümjai phan phan, ümta ümwii pha na kongshi miwa hai.”

¹¹ Kiijiishe Naomi raq, “Isenai, namnai ka nam-nyungwe jam na jangwa chang dongdii miraq,” nguta tsangnai bom ka treto. “Namnai ka ngi rai jaram wadam wa? Ngi ka noshii-nyung ma jangshi mijaki lot ha sha? Lata, namnai wa miitu isetiim maiqwe sere ka mihumki lot ha sha?

¹² Ngi ka ümchaü wikaü she! Maiq ma tiithongshi waki lot mang she. Bom shiiton ngu i, ngi ka ümchaü rawa arjiili maiq ma wawan nongha jiimin, lata isetiim ka hum wan nongha jiimin,

¹³ namnai riika tsangshiq ka maiqlamcho na saüli, maiq ma wahü maq mikhe lot han sha? Maiq ahinti ma wawan man sha mirhan? Riimak, isenai lei, kriika hongmak. Tatiwe raq ngi ma chamchao jonghea tiisaüto. Ngi ka namnai miitu pinthum riiwea tsihea.”

¹⁴ Kra riibom raüta tsangtsam ka tiithongshi ri hali hoqtrangto. Raütiishe Orphaq riika anyaichhi-nyung theaphi na awashe jo nguta shupthü raüta, apaiq ka anyungwe jam niishe jang wanto.

¹⁵ Kiijiishe Naomi raq, “Liilaq, ümnochhi-nyung kra liimaüta. Apaiq ka anyungwe jam niishe jang wanto. Kiimaq apaiq raq shomnoq tlaq shiikeawe pha niishe jang wan nongto. Ümchaü ümniimin apaiq rai ümnyungwe jam niili she jang wan laq.”

¹⁶ Shatmaq, Rut raq apaiq bom ka akha treto: “Ngi ka naqthu liiqkiq! Ijai naq phankiq nguta kiimin naq ngukiq! ümnaq ümbano wa tlaü, kiijaq ngi min miwaha; ümnaq ümbano lam jap wan tlaü, kiijaq ngi min mijap wan ha. Ümphan ümmaq ka iphan imaq miraq; üm Shiikeawe ka i Shiikeawe she miraq.

¹⁷ Ümnaq ümbano mitsai haü; kiijaq ngi min mitsai ha. Ümnaq lapchang ka imaa lapchang miraq. Ngi raq ümnaq baiqthüha jiila, Tatiwe raq ngi ma mra mikuq laq, i miisaq thum raütiq, üm wokhong wa mitiiphea lot!”

¹⁸ Naomi raq Rut ka apaiq jaq na riiwiiq tlii maq tiipaq jaq kai kra chhi raütiishe, apaiq raq anam-nyung ka tiiwin mak she riito.

¹⁹ Krai mren, tsangnai ka Bethlehem chela na saüli she wawanto. Tsangnai saü wan kiita, chelati nokmaiqse wiitarü ka chojong chise she riitam wanto. Kiimaq jechakre thun riika, “Riita, notsam arka Naomi irdea sha?” nguta bom wito.

²⁰ Kra tai raütiishe, Naomi raq treto, “Namshiq raq ngi ka Naomi nguta naq ngu rongkiq. Maraq ngutli she hea rong laq. Ningkun Ajong Shiikeawe raq irilung ka akhap akhiq miishe tiijato.

²¹ Ngi ka chiithe jaqram jaqri riikang. Shatmaq, Shiikeawe raq kaükhea la-ngea tiija baiqto. Naomi ngutiimin jaram wa mihea han? Tatiwe raq ngi ma, chamchao sangrai jonghea tiisaüto.”

²² Riita ija, ara chongtiikai akha, Naomi ka anam-nyung Mob shea Rut ka shea raüta, Mob mung wa jang wanto. Tsangnai ka jaili han phaho akhing na Bethlehem na saü wato.