Romans 1 - ASII LAKDAP Bible (BSI)

¹ Ngi Paul, Khristo Jesuq dise, kiimaq kiimwe ma tingsang athiiq raüta atsea wan, kiimaq Shiikeawe raq apaiq Tsütsa Ahea trahoke miitu ashong wan we raq waiq tiikang.

² Ara Tsütsa Ahea arka, man na rapha hiq wa niiphü dongdii, Shiikeawe raq maiqse ma mikuq ha, nguta kiqkham kongphiq akha kewi she dongdii. Arka Shiikeawe apaiq raq, shammibi lümaq bom ka tiichongkuq thüto. Kra chong wantaq kiqkham bomtsi ka, Asii Bomtsi na aheawiq maq waiqthü raüta thü wantlo.

³ Ara chongtiikai Tsütsa Ahea arka, Shiikeawe Se nashiq Tati Jesuq Khristo rilung manphan awaiq wan. Hanngam lamphan maq, apaiq ka Dawit saüse phan khum na pokito.

⁴ Kiimaq apaiq wenyi khum kriika, asii Shiikeawe Se. Apaiq ka asii Shiikeawe Se dea nguta tiichhike wan miitu, Shiikeawe raq apaiq ka amaa wa ningkun jonghea maq tiidong wanto.

⁵ Apaiq lümaq, Shiikeawe raq ngi ma ara kiimwe jaqsham rahea phan arshe, kiimaq jonghea arshe, kuq wanto. Ara jaqsham arka, aram ari jaqsham. Arka Jesuq Khristo mang tiijong wan miitu. Ara i jaqsham ara lümaq, mangjong maiqse tlotli ka, Shiikeawe ma tiikam wan miitu, ara jaqsham ara kuq wanto. Raüta, apaiq ma kamwanti thun maiqse angu ka, apaiq wokhong na misi wan laq nguta akuq wan.

⁶ Ara Tsütsa Ahea arka, namshiq Rom chela na siti miitu min. Shiikeawe raq namshiq min Jesuq puk na nyap wan tlo ronglaq, nguta hea wan tlo.

⁷ Riita, ara chongkuq tiikang arai mren, ngi raq namshiq tarü Rom na sitibi ma, ara lak ara waiq tiikang. Shiikeawe raq namshiq ka dang na lakshiipo alak ikha lungwii tlo. Raüta, namshiq ka apaiq raq asengi miitu riichom hea wanto she. Shiikeawe, Na we, kiimaq Tati Jesuq Khristo raq namshiq ka kaphap shat kiimaq hansang maq mithülaq.

Kechutum Achu Jaü

⁸ Apha na ngi raq namshiq tarü miitu, rokhu na Shiikeawe ma kechutum tiikang. Arka namshiq raq, Jesuq ma kamwan lan kra tsütsa ka ümchaü mangjong maiqse tlotli riishe tai wan tlo ngo kha maq kechutum tiikang.

⁹ Ngi raq ara chongkuq tiikang arka, tengto dea nguta hakhi keti ka Shiikeawe asi. Shiikeawe ka ngi raq, i tsan i mongjii wiita kiinong kuq lata, Ase manphan Tsütsa Ahea bomtsi ka, nanok ma chongkuq tiikang kra lümaq, ngi raq shomnoq wan tiikang. Ngi raq achu jaü tiikang akhingtek na,

¹⁰ namshiq miitu min achu jaükuq tiikang kriika Shiikeawe raq asap. Ngi raq Shiikeawe ma tiitai wan kla, apaiq raq ahea nguta thimi tlaq jiika, ümchaü lak niika, ngi namshiq phana haisea wadam miitu, akhing mikuq ahiq nguta riichopi tiikang.

¹¹ Ngi raq namshiq rai sham riichhi tlo ha jiilei, nguta i tsan na atsi maq sitiikang. Namshiq rai riihum lata, namshiq ka kamasham na choke wan, achu shiiman kran kuqwa hajaq, namshiq wenyi lam phan na ningkun tiijong wan ma nguta tiima tiikang.

¹² Riita, bom chong tiikang arka, namshiq miimin liip, kiimaq ngi miimin liip miraq. Namshiq kamtsantsii ka, ngi lümaq mima wan. Kiimaq i kamtsantsii ka namshiq lümaq mima wan. Nashiq ka riithü riithü laita, adam maq jonglu wan chang ahata.

¹³ I phu i notiim lei, namshiq raq ara tsan na tiitsang shat sham, ngi ka namshiq phana waha jaq, nguta ümtinkhan wa tiima wan tiikang. Shatmaq, phanshi raq pathoho raütli, ümchaü atin aloq niishe saü rai wantaq. Pongnok phan maiqse phong wa, Phung na tiishang wan tiikang kiikhiisii hali, namshiq phong wiimin, Phung na tiishang wan tlo hajaq nguta, tsinngin tiikang.

¹⁴ Ara jamkhano chongtiikang ngukla, Shiikeawe raq ngi ma, maiqse angu hupli ma Tsütsa Ahea kra chongke miitu holai ka tiihokuqto. Phaqchi maiqse miimin kiimaq tawesang miimin. Lak atsinti miimin, kiimaq lak tsinmak, makchukti miimin.

¹⁵ Ara chongkuq tiikang arai mren, ngi ka namshiq Rom na siti miimin, Tsütsa Ahea ara chongke wa miitu, kheshat maq sitiikang.

Tsütsa Ahea Na Ningkun Asi

¹⁶ Ngi ka Tsütsa Ahea bomtsi ka nanok ma chongke miitu jeasi mang. Jamkhano ngukla ara Tsütsa Ahea bomtsi na ningkun asi kiimaq kiima kam lata, tsankhun maq sitiikang. Maiqse angu wa, jurwa Jesuq ma kamtlaq, kriiti thun kunli ka, ngarai mong wa tiichhii wan miitu ningkun ka Tsütsa Ahea bomtsi na sitlo. Arka, apha na Jehudinok ma chongkuqto. Kiimaq kra jai maq, Pongnok phan maiqse miishe chongkuqtlo.

¹⁷ Jamkhano Tsütsa Ahea na ningkun asi ngukla, Tsütsa Ahea na ngarai maiqse ka, Asii Shiikeawe raq apaiq rai wehea ma jamkho shram wan tlaq, kra lamphan ka tiichhi kuq tlo. Ara Shiikeawe rai wehea shram wan tlaq arka, apha maq riita atiisup na saüli, maiqse raq Shiikeawe ma kamtsantsii thü tlaq, hiqkhu phi kra miili dü wan chang nguta chong tlo. Arka asii bomtsi na chongtlaq, kra phan phan hongtlo. Asii bomtsi na akha chongtlo, “Jurwa Shiikeawe ma kam tlaq, kriiti ka Shiikeawe raq apaiq rai wehea miishe tiija wantlo. Raüta kamtsantsii lümaq atra misi wan.”

Maiqse Aja Ashut Siisaq

¹⁸ Maiqse raq ümtinkhan wa ngarai tang wan tlaq, kiimaq abi-ati jaqsham ümchuwa sham wan tlaq, raüta tsangshiq abi jaqsham kriimaq, Shiikeawe rai mang riisap wan chang tengteng lamphan sitlaq kra, tang ta baiq wan tlaq, arthun arkha na, Shiikeawe tsankhiq ka, ramungtan maq tiichhikuq wanto she.

¹⁹ Arka Shiikeawe raq apaiq rai, mang riisap wan miitu lam ka, tankeje taümaq, maiqse raq jiqphiq wantlo. Tsangshiq raq Shiikeawe ka juwa, kriika sapshat shat taü maq, shut rai wantlo. Ara tamlamlam maq, ngarai tang wan tlaq arkha na, Shiikeawe raq tsangshiq ka tsasha tlo.

²⁰ Shiikeawe raq ra nai hiq ara tiiq wanli miiphat, maiqse raq mak maq chhilot mai chang apaiq pü-alii pattup pat-sa ningkun rüm tlaq nai apaiq asii rong arai rüm tlaq kriika maiqse angu tarü raq chhi shat. Ara chongtiikai Shiikeawe pü-alü nai apaiq rong arai rüm tlaq kriika Shiikeawe raq phansang wantaq thun ümchu wa sitlaq kriijaq chhi tiikai. Arkha maq, ara chhi shatshat taü maq maiqse ümchu riiwa ngarai tang tlaqti ka, ahangkai chang lamlu ka ahü she!

²¹ Tsangshiq raq Shiikeawe ka asi dea nguta asap. Shatmaq, tsangshiq raq Shiikeawe ma shreng manto, apaiq rii dongdii sitlaq, kra kuq wan mak maq sitlo. Kiimaq apaiq ma kechu tumke wan min ahü maq sitlo. Kra rü na khoti, tsangshiq tiima tsantsii ka, ajiq aphiq siisaq li, kiimaq tsangshiq khutsai ka shaqmii miili sitlo.

²² Tsangshiq ka atsii wiq maiqsetiim sitiikai nguta tiitsaki tlo. Shatmaq, tsangshiq ka angikong.

²³ Thummak miq mak atra Shiikeawe ka shomnoq rii na, tsangshiq riika maiqse raq, jaq maq ahai hun, athumkai chang phan maiq sumla, wushi sumla, ngamsaü ngiqse sumla thun, kra khoti shomnoq tlo.

²⁴ Ara chong tiikai, maiqse ka Shiikeawe wokhong na siwan romak, angi ma jakai kha niishe, Shiikeawe raq tsangshiq ka tsangshiq, ashe ashi phan jamlai wa tsangshiq raq ro tlaq, kra ashe ashi ramho kharü mong niili she tiishaü kuqbaiqto. Krai mren, tsangshiq ka tsangshiq maiqmii nai maiqmii liipan na jeasi miari lishe, riinyat shat raü raüta sitlo.

²⁵ Arkha niishe tiina, tsangshiq raq Shiikeawe lamphan sap wan chang tengteng bomtsi kriika, no niishe tsuqbaiq raüta, arot akiq lam she phan tlo. Tsangshiq raq Shiikeawe ka shomnoq raüta, apaiq wokhong na siwan rii na, apaiq raq aphansang thun kra khoti shomnoqtlo. Maiqse riika akha riikli jiimin, Shiikeawe khushüli mijong laq! Amen.

²⁶ Tsangshiq raq akha ngarai klo tlaq arkha miishe, Shiikeawe raq tsangshiq ka, maiqjea asi hon atsii kharü miishe tiikha baiqto. Arkha maq, jechakre raq dongdii min, jechak jamkhii sichang wa, kiikha ka singa mak; jechak nai jechak liipan na sethoq ja ngarai tangtlo.

²⁷ Kra niq riri sii hali, maiqwere thun raq kiimin, jechak nai maiqwe liipan na riilungwii lam ka baiq thü raüta, maiqwe nai maiqwe liipan na, maiqjea asi hon atsii riinyat riishat sitlo. Maiqwe nai maiqwe liipan na, akha maiqjea asi riinyat shat raüta sitlo. Kiimaq arthun, ashut klo tlaq arkha na, Shiikeawe sintsang ka tsangshiq khu thaq na sitlo.

²⁸ Tsangshiq raq, riikhaqli Shiikeawe tiima tsantsii ka, tsangshiq tsan na thü mak maq, shishe tlaq kriikha niishe, apaiq raq tsangshiq ka ashe ashi tsantsii walü tlaq kra miili she likuq baiqto. Kra likuq baiqtaq kriika, tsangshiq raq sham mak chang phan thun wiita misham laq, nguta ngo maq likuq baiqto.

²⁹ Tsangshiq tsan among ka phusu tsii, tha kaü tsii, sükha tsii, kiimaq atiibi baiq wan tsii riili she ama sitlo. Tsangshiq tsan among ka, arshulii tsii, sho tsii lumtsii, arlongliiq tsii, laopha tsii, kiimaq maiq chong sia tsii riili she ama sitlo. Tsangshiq ka shapshaü miqshii panli.

³⁰ Kiimaq tsangshiq nai tsangshiq liipan na arshaphaq, tsangshiq ka Shiikeawe makki na, kai maiqsai asi sitlo. Kiimaq tsangshiq ka ji maq nishishi tsii rümti; Tsangshiq ka ashkong li, kiimaq tiishom mra li; tsangshiq riika, abi lam ka apa klo wan wan roli sitlo. Tsangshiq raq anyung awe bom ka tai mak.

³¹ Tsangshiq tsantsii ka ama. Tsangshiq raq maiqmii kiqkham ka tiiku wan mak. Kiimaq tsangshiq raq, nanok ma lungwii tsantsii thü mak.

³² Tsangshiq raq Shiikeawe tri na, akha ngarai tang wantibi ka, atsai lam mirhum nguta chong tlo nguta kiimin asap. Kra sapshat shat taü maq dongdii min, tsangshiq raq ngarai thun kra tang wan ruq miili sitlo. Kli min riimak; nanok ahinti raq ngarai klo tlaq, kriimin asom li riidam tlo.