PHOWEBI 1 - ASII LAKDAP Bible (BSI)

Juda Phan Nai Simeon Phan Raq Adonibejek Chela Khat Raüta Jiiwanto

¹ Joshua tsaikai jai maq Israilnok raq Tatiwe ma waito, “Naishiq maiqphan phong arwa, ümriiti phan riiwa Kanannok mung ka kongkhu mikhat pha wan?”

² Kiijiishe Tatiwe raq treto, “Juda phan raq kongkhu khatho chang. Ngi raq tsangshiq ma Kanan mung peng wan miitu arang kuqtiikang.”

³ Kiijiishe Juda phan raq Simeon phan ma nguto, “Namshiq ka naishiq rai kongshi mung chumkuqtaq kiina warong i. Nashiq adam maq Kanannok ka khat rong i. Kra laitiishe naishiq ka namshiq rai namshiq rii hiqshong chumkuqtaq kiina miwa kai.” Krai mren Simeon phan ka,

⁴ Juda phan rai rekhat wa adam maq wawanto. Krai mren, Tatiwe raq tsangshiq ma Kanannok nai Perijaiqnok ka tiikhat raüta tiitangto. Krai mren tsangshiq raq Bejek chela wa rewenok ka hingroqshi jiipbaiqto.

⁵ Tsangshiq raq Adonibejek ka kiijaq humto. Raüta apaiq ka khatto.

⁶ Apaiq ka kiiwa juhoto. Shatmaq tsangshiq raq apaiq ka joho raüta lapto. Raüta ajaq shikaü shilawe wiinai kra nai ahokshikaü shilawe wiinai kra chumbaiqto.

⁷ Adonibejek raq nguto, “Hokham weroqmiishi tsang jaqshi shilawe thun kra nai tsangshiq hokshi shilawe thun kra ngi raq tapbaiq kang. Tsangshiq raq inüchho seaphan hiq na atrok ha kra riichom tsunsiq raüta sito. Ngi raq tsangshiq jamkho haihü kang kriishe Shiikeawe raq ngi ka haihiito.” Apaiq ka Jerusalem na shea wanto. Kiijaq apaiq ka tsaito.

Juda Phan Raq Jerusalem Nai Hebron Chela Ka Khat Raüta Jiiwanto

⁸ Juda phan raq Jerusalem ka khatto. Raüta jiiwanto. Tsangshiq raq kiiwa maiq thun ka wiita tsatbaiqto. Raüta chela ka wa maq chaqbaiqto.

⁹ Arjai miishe tsangshiq ka Kanannok ku akin tonglong wang na siti, kiimaq kinjiji thun wang na siti, kiimaq shemai nü na shinram shinriiq wang na siti thun kriishe khat wanto.

¹⁰ Tsangshiq ka Hebron chela na siti Kanannok kriishe khat wanto. Man na Hebron chela ka Kiriath Arba chela nguta ngutlo. Kiijaq tsangshiq raq Sheshal weraü, Ahiman weraü, kiimaq Talmai weraü phan thun kra khatto. Raüta tangto.

Othniel Raq Debir Chela Ka khat Raüta Jiiwanto

¹¹ Kriimiishe Juda phan ka Debir chela ka khatkai kihoto. Kra akhing na Debir chela ka Kiriath Sephar nguta ngutlo.

¹² Kiimaq tsangshiq phong wa maiq weshi Kelib raq asengi ma akha nguto, “Jurwa Kiriath Sephar kra khat raüta jiiwan jiiq, kriiti ma ngi raq ise Aksa kra mitiiwaha.”

¹³ Kelib ma anowe Kenej se Othniel raq Kiriath Sephar chela ka khat raüta jiiwanto. Kiimaq akiq khamkuqtaq kra phanphan Kelib raq ase jechakse Aksa ka Othniel ma tiiwato.

¹⁴ Achak lam ranaiq na Othniel raq tsangnyung ma, awe jaq wa wak phu bashi jaü laq nguta chongto. Krai mren, apaiq ka kumtoq kaü raikhü kiiwa satkito. Kiijiishe Kelib raq apaiq ma jamlai jaüro wa nguta waito.

¹⁵ Kiijiishe ase raq treto, “Ngi ma khamchum wiijam ratlo. Ümniiraq ngi ma kuq laü wakram kriika shinram shinriiq binjü ba na chato.” Krai mren, Kelib raq ase ma lamthaq nü khamtsiim raisetiim kra nai lamkiq nü wa khamtsiim raisetiim kra kuqto.

Juda Phan Nai Benjamin Phan Raq Rekhat Tangto

¹⁶ Mosheq huchhi ka Kenaiq phan. Tsangshiq ka Juda phan rai kongshi maq Jeriko maq, kriika Sirichong ro chela ngutlo, kriimaq Juda mung na Arad chela maq shemai nü wang kiina shinram shinriiq binjü kiina kihoto. Raüta kra binjü kiijaq Amalakaiqnok rai adam na shong wanto.

¹⁷ Juda phan ka Simeon phan rai kongshi maq kiraüta, Jephath chela na siti Kanannok ka khatto raüta tangto. Tsangshiq raq chela thaq na mansonto, raüta chela ka shiithen baiqto. Raüta kra chela ka Horma nguta mangto.

^18-19 Tatiwe raq Juda phan ka khrum kuqto. Krai mren, tsangshiq raq ku akin tonglong wang ka jiiwanto. Shatmaq tsangshiq raq Gaja chela, Ashkelon chela, lo, Ekron chela thun ka, kiimaq kriithun tro binjü na maiqhiqshong thun ka jiiwan lot mak dea riito. Arnok thun Khamjong kii wang binjü na siti jaq niika, jin kumrang leng asi riito. Kra ningkhan Juda phan raq tsangshiqnok ka jobaiq lot mak riito.

²⁰ Mosheq raq aming kuq thütaq kra phan phan, Hebron chela ka Kelib ma kuqto. Kelib raq kra chela wa Anak saüsetiim wetsam jobaiqto.

²¹ Shatmaq Benjamin phan raq Jerusalem chela na siti Jebusaiqnok ka jobaiqlot mak dea riito. Kriikha na Jebusaiqnok ka ümchaü niitaq Benjamin phan rai adam niili sitlo.

Ephraim Phan Nai Manase Phan Raq Bethel Chela Jiiwanto

^22-23 Ephraim phan nai Manase phan raq Bethel chela ka longto. Kra akhing na Bethel mang ka Luj riito. Tatiwe raq tsangshiq ka khrumto. Tsangshiq raq chela kra sisin kaiti siwebi tiikito.

²⁴ Siwebi raq kra chela tho na maiq weshi ka chela maq ahin nü na kaiho chhito. Raüta apaiq ma, “Naishiq ma chela mong na nyapwa chang lam ka chongkuq laq. Kra haüla, naishiq raq ümniika tsatmai mirkai,” nguta bomhuk ka waito.

²⁵ Krai mren, kriiwe raq tsangshiq ma lam ka tiichhikuqto. Krai mren, Ephraim phan nai Manase phan raq kra chela wa maiq thun ka wiita tiithumpak jiipbaiqto. Shatmaq arwe nai apaiq jamtitiim ka tsatmak tiiwongto.

²⁶ Apaiq ka jai maq, Hitaiqnok mung na laü wanto. Raüta kiijaq chela ashi teito. Raüta kra chela ka Luj nguta mangto. Kra chela mang ka ümchaü min Luj ngutli ngutlo.

Israilnok Raq Maiq Jobaiqlot Mak Dea Chela Thun Mang

²⁷ Manase phan raq Beth Shan chela, Tanakh chela, Dor chela, Ibleam chela, Megiddo chela, kriimaq arthun tro binjü wa chela aransetiim na siti Kanannok ka jobaiqlot mak dea riito. Kra Kanannok ka ümchaü min Israilnok rai adam niili sitlo.

²⁸ Ümtiikiiwa Israilnok ka ningkun aheng sitlaq, kra bala ka tsangshiq raq Kanannok ka, tsangshiq jaq tiisham jamshatlo. Li jiimin tsangshiq raq Kanannok ka jobaiqlot mak dea riito.

²⁹ Kiimaq Ephraim phan riimin Gejar chela na siti Kanannok ka jobaiqlot mak dea riito. Krai mren, Kanannok ka ümchaü niitaq tsangshiq raili sidamtlo.

³⁰ Kiimaq Jebulun phan riimin Kitron chela nai Nahalal chela na siti ka jobaiqlot mak dea riito. Krai mren, ümchaü niitaq Kanannok ka tsangshiq raili sidamtlo. Kiimaq tsangshiq ka Israilnok raq di ikha jaq tiisham jamshato.

³¹ Kiimaq Ashar phan riimin Ako chela, Sidon chela, Ahlab chela, Akhjib chela, Helbah chela, Aphek chela, kiimaq Rehob chela na siti Kanannok ka jobaiqlot mak dea riito.

³² Kriikha na, Ashar phan ka nokti Kanannok raili she adam na sito. Jamkhano ngukla tsangshiq raq Kanannok ka jobaiqlot mak dea riito.

³³ Kiimaq Naphtali phan riimin Beth Shemesh chela nai Bethanath chela na siti ka jobaiqlot mak dea riito. Krai mren, Naphtali phan ka nokti Kanannok raili she siwan damto. Shatmaq Israilnok raq tsangshiq ka di ikha jaq tiisham jamshato.

³⁴ Kiimaq Amoraiqnok raq Dan phan ka ku akin tonglong wang kiina jobaiqto. Kiimaq tsangshiq raq Israilnok ka hiqthung tan wang kiina tiiki mak ningtangto.

³⁵ Amoraiqnok ka Aijalon chela, Shaalbim chela, kiimaq Heres Pum chela na siruqli she siwanto. Shatmaq Ephraim phan nai Manase phan raq tsangshiq ka tsangshiq wokhong na thüto. Raüta tsangshiq miitu di ikha jaq tiisham shiinüm shato.

³⁶ Edomnok hiq rai ka Sela maq shekhu nü nü na rai wan raüta, Akrabbim Kinchit maq rai wanto.