Philippians 1 - ASII LAKDAP Bible (BSI)

¹ Ngi, Paul kiimaq Timothi rai, Khristo Jesuq jaqshi senai raq-- Shiikeawe sengi Philipia na siti tlotli ma, Khristo Jesuq rai pumshi hanshi maq siwanti ma, phungtu shrabi nai akhrumtibi rai tlop saq maq:

² Nawe Shiikeawe kiimaq Tati Jesuq Khristo raq namshiq ka kaphap shatmaq kiimaq khusang maq mirümlaq.

Paul Raq Philipia Na Siti Miitu Achu Jaütlo

³ Ngi raq namshiq miitu, i tsan na tiima tiikang akhingtek na, Shiikeawe ma pinthum kechutum kuq tiikang.

⁴ Kiimaq, ngi raq namshiq tarü miitu, achu jaü kuq tiikang akhingtek na, kai chojong chise maq jaükuq tiikang.

⁵ Ara jamkhano chochi tiikang ngukla, namshiq raq ngi rai Tsütsa Ahea chongke wan jaqsham na, apha maq riita ümchaü niitaq saüli, sham kuq dam tlan.

⁶ Krai mren, Shiikeawe raq namshiq rilung na, ara jaqsham ahea shampha wantaq arka, Khristo Jesuq saükai Ranaiq na saüli, apaiq jaq thiq kra kunli mitiinyi wan dongdii nguta, tsankhun maq sitiikang.

⁷ Namshiq ka wranaiqshe, i mong jü na sitlan! Ngi raq namshiq miitu, akha tiima tiikang arka athuk atsom jaqsham. Namshiq ka ngi rai reraüshi maq, Shiikeawe raq ngi ma tiitsangdada Tsütsa Ahea chongke wan jaqsham kuqtaq ara, riisha sham dam tlan. Namshiq ka man na, ngi jam tiibanbi ahü maq, Tsütsa Ahea ara, achaq awaq maq, chongkuq lata, arang apha maq tiicham wankang, kra akhing niimin, ngi rai reraü shi maq silan. Kiimaq ümchaü, ngi phaqtek mong na sitiikang niimin, ngi rai reraüshi maq chap dam tlan.

⁸ Shiikeawe ka i hakhi. Ngi raq chongtiikang arka tengteng. Ngi raq namshiq miitu, i tsan mong na tsaühea maq, riiwea wan tiikang arka, Khristo Jesuq apaiq tsan mong wa, adong lungwiitsii walü kra nyai tlo.

⁹ Ngi raq Shiikeawe jaq wa, achu jaütiikang, namshiq liipan na lungwiitsii rüm tlan kra, apa tsi wan ruq maq, midong man laq. Kiimaq riikhaqli phaqchi tu ka sap lanta, taksma kappe maq, phanrap ahea abi sitlaq kra, shin lanta si ronglaq.

¹⁰ Kiikha sihan jiila, namshiq ma jamlai wa ahea pinthum, kra tsea wan lanta milang han. Kra riihan jiitiq, Khristo Ranaiq na, namshiq khum na ashe ashi jam min ahü miraq. Namdü na jamlai shutphit min ahü, siirairai hea miraq.

¹¹ Krai mren, namshiq rilung ka, Jesuq Khristo pülii ahea awa rong arai ngu tu petsi chong ikha miraq. Kra chongtiikai petsi tu kriika, Khristo riitiq dongdii tiitsi ngo chang. Kra maiqse raq chhi raüta, Shiikeawe khushü mitiijong. Raüta, Shiikeawe klishe mishomra wan.

Maiqse Atra Sitiikai Ka Jesuq Jaqsham Wan Miitu Sitiikai

¹² Ngi raq namshiq ma chongke rotiikang ka ara: Ngi ma jamlai mra wa pintaq, kriiraq Tsütsa Ahea jaqsham kli tiinyii wanto.

¹³ Arkha maq, Roman hokham we jamkheti phenlanok nai maiq ahinti tarü raq, ngi ümchaü phaqtek na sitiikang arka, Khristo jaqshi ma jatiikang kriikha na dea, ngutiishe sap wanto.

¹⁴ Ngi phaqtek na shaq kha maq, Phungmaiqse phunainotiim apako raq, Tati ma kamtsantsii thü wan tlaq kra, kamtsantsii rang ka apha riiwan tlo. Kiimaq tsangshiq ka hai mak maq, Tsütsa Ahea kra chongke shiichaq wan tlo.

¹⁵ Kiitiina, maiq wiijamti phunobi riika, i jaqsham jong tlaq kra, lüm haijaq nguta, tsangshiq khunniitsi ma, Jesuq Tsütsa kra chongkuq tlo. Kiimaq tsangshiq ka, ngi rai riikhii wan tlo. Kiimaq, maiq wiijamti raq riiwe kla, tsantsii ahea rüm raü tiidea, ngi ma khrum kewan lam maq nguta, Tsütsa Ahea kra chongkuq tlo.

¹⁶ Tsangshiq raq ara sham tlaq arka, lungwii raütiidea sham tlo. Ara jamkhano chongtiikang ngukla, Shiikeawe raq Tsütsa Ahea chongke wan jaqsham arka, ngi miidea kuqto nguta asap.

¹⁷ Shatmaq, maiq wiijamti raq, Khristo tsütsa chongkuq tlaq kriika, tsangshiq tiima tsantsii abi maq chongkuq tlo. Tsangshiq riika, maiqmii khushü tiijong miitu chong kuq tlo. Kiimaq, tsangshiq riika, ngi ara phaqtek na sitiikang kra thaq niimin, ngi ma apa chamchao tiisaü kuq haijaq ahea nguta, tiima raüta chongkuq tlo.

¹⁸ Li jiimin, jam raa mak! Ngi ka chochikhiq li sitiikang. Ahea tiima raüta chongkuq klo; abi tiima raüta chong kuq klo. Khristo tsütsa riili barap binrii na minyam wan. Kriikha maq, ngi ka chochi wan ruq miili misi ha.

¹⁹ Ara jamkhano ngutiikang ngukla, namshiq raq ngi miitu achu jaü kuq tlan kra lümaq, kiimaq Khristo Asii Wenyi raq khrum kuqtlaq kra lümaq, ngi ka phaqtek mong wa mitiidong kuq nguta kam tiikang.

²⁰ Ngi raq riiwe kla, ara Shiikeawe minshiiq tiikang arka, ümtiikiimin nungpaq mang maq misham ha, nguta i tsan na tsihea maq, kiimaq tsaühea maq hang lata, sitiikang. Arka wranaiq she, kiimaq akhek ka ümchaü akha akhing na, i tsan tiijong shat maq sitiikang. Lata, atra sikang lo, kiimaq amaa sikang lo, i khum ara lümaq, maiqse raq Khristo khushü jonglu kra sap raüla hongjiiq nguta sitiikang.

²¹ Riita, ngi ma rilung ka jamlai wa? Kriika Khristoli she. Kriikha maq, ngi ka tsaikiha jiika, ngi ma liip jonghea.

²² Shatmaq, rilung alu siha jiika, sham akai ajong sham chang dea asi shaqli. Riita, riikhaqli ka tsang mang shaqli. Ara anai arwa ümriiti tsea wan chang wa riijiiq.

²³ Ümchaü i rilung arka, ara tiima anai raq riinyea tlo. Ngi raq kla, ara han-ngam rilung arka baiqthü lata wawan ro tiikang. Lata, Khristo rai siwan ro tiikang. Kra riiwe ka ngi ma pinthum ahea.

²⁴ Shatmiitiq, namshiq khrumke wan miitu, atrali siha jiika ahea pinthum.

²⁵ Ngi riika riikhaqli asap ha. Ngi ka alu misiha. Ngi ka namshiq wiitarü rai misiha. Namshiq tiijong luwan miitu, kiimaq namshiq rai kamasham na chochi dam miitu misi ha.

²⁶ Krai mren, ümtiikiiwa ngi namshiq rai tiithongshi hali mirhum wan nongha, kiitiikaq, namshiq ka ngi miitu, ümchaü arthaq niimin apa, Jesuq Khristo mang na mikhoqriiq han.

²⁷ Riita, ümchaü namshiq ma akhek pinthum ka, namshiq rilung ka Khristo Tsütsa na jamkhiiwa chong tlaq, kra phanphan singa chang. Krai mren, ngi ka namshiq liiwa wakang lo, kiimaq walap mang lo, li jiimin, ngi raq namshiq ka miitung ashi niili, pharang rang maq chap tlo nguta mitaiha. Kiimaq kra rekhu ashi jaqsham kra ningkhan li, reraüshi maq, Tsütsa Ahea chongke wan jaqsham na misi wan han.

²⁸ Namshiq jaqtibi miika naqhai rongkiq. Jang wrap she srea nola ma ja lanta si ronglaq. Riita, arka tsangshiq ma hakhi ashi miraq. Tsangshiq riika tangmak miraq, namshiq riidea mitang han nguta misap. Jamkhano ngukla, namshiq rekhat ka Shiikeawe raq mitiitang kuq.

²⁹ Ara jamkhano chongtiikang ngukla, Shiikeawe raq namshiq ma thek tlaq Khristo shiililii jaqsham kuq wantaq kriika, apaiq ma kamwan lamlam li ka riimak. Shatmaq, apaiq miitu chamchao wan kiimin adam na kuqto.

³⁰ Riita ümchaü namshiq ka ngi rai adam chamchao dam tlan krai mren, ümchaü ka namshiq raq ngi rai reraü shi miishe rekhat wan dam tlan. Arka man na namshiq raq, ngi ka rekhat chhi lan irli. Riita, ümchaü namshiq raq tsütsa ka taitlan, ngi raq kra rekhat ka ümchaü min khat wan ruq li khat tiikang nguta. Kra taitlan rekhat ka, ümchaü min khat wan ruq khat tiikang.