Philemon 1 - ASII LAKDAP Bible (BSI)

¹ Ngi, Paul, Khristo Jesuq miitu phaqtek na siti we kiimaq naphuno we Timothi raq-- Naphunowe kiimaq kongshi maq jaqshamdamti Philemon ma,

² kiimaq ümjam na riitam tlaq phungtuti ma, kiimaq nanyino nyung Apphia ma, kiimaq jaqsham damti phenlawe Arkipas ma:

³ Na We Shiikeawe kiimaq Tati Jesuq Khristo raq, namshiq ka kaphap shat kiimaq hansang maq mithülaq.

Philemon Lungwiitsii Nai Akamtsantsii

⁴ Lungwii phuno we Philemon lei, ngi raq achu jaü tiikangtek na, Shiikeawe ma ümniimiitu pinthum kechu tum tiikang. Kiimaq achu jaü kuq wan tiikang.

⁵ Ümniiraq Shiikeawe sengi ka kai lungwii tlaü, kiimaq tsangshiq ka khrum kuq tlaü nguta tai tiikang. Kiimaq, ümniiraq Tati Jesuq ma pinthum kam tlaü nguta tai lalata, ngi raq Shiikeawe ma kechu tum tiikang.

⁶ Ngi raq i tsan na atsi maq achu jaü tiikang arka, nashiq liipan na, Phungmaiqse rintii riilungwii tsantsii rüm tiikai arka, atsaü maq misi laq. Raüta, nashiq ma Khristo lümaq achu shiiman ümtinkhan wa sitlaq kra, nashiq ma mikuq laq nguta achu jaü tiikang.

⁷ Lungwii phuno we lei, ümniiraq phunaino phungmaiqsetiim lungwii tlaü kra chhi lalata, ngi ka kai khoqriiq tiikang! Kiimaq ara chhi lalata, i tsaiji ka kongtam puqshi she jong wan tlo. Ümjaq sham ahea kra chhi raüta, Shiikeawe sengi tarü chochi tlo.

Onesimas Miitu Tiipaiqnea Bom

⁸ Riita, ümniiraq Shiikeawe sengi ka kai lungwii tlaü ngutri ngi raq asapha she. Kiimaq ngi ka Khristo na, ümniima aphujong nguta sitiikang. Arkha maq, ngi raq ümniima bom ka, akha riiliijo, nguta kankop mang maq, thusaqli chongke ka kham tiikang.

⁹ Li jiimin la, ngi raq ümnaq lungwii tiikang kha maq, ümniima amingke la na, atiipaiqnea lam miili she bom tiikang. Ngi ka Khristo Jesuq kiimwe. Kiimaq ümchaü min la, ngi ka Khristo apaiq mang na, phaqtek mong na sitiikang.

¹⁰ Riita, ija, ümchaü min la, ngi raq ümniima bom poshi se tiitai wan chang asi. Arka Onesimas miitu. Onesimas ka ngi ma Khristo na i se shaq she jakito. Ngi ka phaqtek na sitiikang bala, apaiq ma awe jong she jawan kang.

¹¹ Man na, akhing ashi na, Onesimas ka ümniima akhek rariq chang jam min ahü ikhli siwanto. Apaiq miinu min ahü ikhli siwanto. Shatmaq, ümchaü sanha, ümnii miimin, kiimaq ngi miimin, apaiq ka maiqse wiqwiq ashi she.

¹² Riita, ija ümchaü min la, ngi raq apaiq ka ümpha niishe tiijang wan tiikang. Apaiq tiiwa tiikang arka, ngi raq ümniima, i tsan i mongpo panke khan tai tlo.

¹³ Lamshi miika, ngi raq apaiq ka, ngi raili ajaq tiisiruq rotiikang. Ngi ka ara Tsütsa Ahea jaqsham kha na, phaqtek na shaqtlaq liipan na, ümniiraq ngi khrumke la na, apaiq raq ngi mikhrum laq nguta tiima ashi ka sitlo.

¹⁴ Shatmiitiq, ngi raq ümniika ngi khrumke raa ma nguta, jaqla maq athaürea ikha ka romang. Kra rü na, ümniiraq maiqmii tlungwii laüta, khrumkuq tlaü we ka, maklii na athuk atsom. Kriikha maq, ngi nü maq ümniima athaü rea ikhiika chong mang. Ümniiriimin, ahea dea nguta trehü miika, jamlai min klo romang.

¹⁵ Jursap, apaiq ka, ümwokhong wa heashi miitu chii na kihotaq kriika, ümwokhong na pattup siwan miitu kihoto sham nguta tiima tiikang.

¹⁶ Apaiq ka ümchaü sanha, ümniima dise lam lamli ka riimak she. Apaiq ka Khristo na ümno shaq she jawanto. Kiimaq apaiq ka ngi ma maiqshaq pinthum ashi! Kiimaq ümniimiishe tiq ka jawa michong i! Ümniimiika awongsii dise ashi she. Kiimaq Tati mang na, ümno shaq she jawanto!

¹⁷ Riita, ija ara chongtiikang arai mren, ümchaü sanha, ümniiraq ngi ka ümniirai reraüshi maq, Tati jaq sham damti we kongti nguta shreng tlaü krai mren, ngi ümjam na saü wa hajaq jamkho mitao haü, kiikha apaiq ka ümjam na ahea wiq maq tiijang tao wan nong laq.

¹⁸ Kiimaq, apaiq raq ümtsan tiibitaq nai khü akha tang thütaq, asi jiila, kra thun ka i kha miishe tiijalaq.

¹⁹ Ara ngi Paul raq, i jaq maq waiq lata, tiiho wan tiikang ara: Mikuqha ngutiikang kriika mikuqha dongdii. (Ümniiraq ümkhum kiimin ngi ma apkuqli chang khan, ngi raq ümniika tiichhan chhi wan kangli jiimin, ümniiraq ngi ma jamphan holai wa mitiiho haü, kriika ngi raq thum thum mitham kuqha.)

²⁰ Riita, phuno we lei! Ngi raq ngohea shaqshaq chongtiikang, ümjaq wa ngi raq, Tati mang na phanshi ra aliip jaü rotiikang. Khristo mang na, phuno we lei, i tsaiji ara tiijongkuq wan phiina. Kiimaq ngi ara tiichochi wan phiina!

²¹ Ngi riika asap ha na. Ümniiraq i kiq ka tlea maü maq, ara lak na waiq kang arthaq niimin, achan lin miklo haü nguta kamto maq sitiikang.

²² Kiimahali, ngi japwa chang khok ri, ashi tiije laüta thüli laq. Ngi ka namshiq phana riihum wa miitu, namshiq raq achu jaü tlan kriika, Shiikeawe raq mitre nguta kam tiikang.

Bomshat Salam

²³ Ngi rai Jesuq khristo mang maq, phaqtek na siti we, Epaphras raq namshiq ma salam tiiso tlo.

²⁴ Kiimahali, reraüshi maq Shiikeawe jaqsham damtibi Makaq, Aristarkas, Demas kiimaq Lukaq riimin tsangtsam tarü raq salam tiitai tlo.

²⁵ Tati Jesuq Khristo kaphap ka namshiq tarü rai misilaq.