Obadia 1 - ASII LAKDAP Bible (BSI)

¹ Arka Ajong Thaq Na Ajong Pinthum Tatiwe raq Edom mungti miitu shammiwe Obadia ma atiichhikuq riisham bomchong. Tatiwe raq atsasoqti weshi mangjong hiq thun na tiikito. Naishiq raq apaiq tsütsa ka akha taikai: “Chap rong laq, singmung maiqse lei! Edom mung kra khatki rong i!”

Tatiwe Raq Edom Mung Mishthenbaiq

² Tatiwe raq Edom mung ma ngutlo, “Ngi raq ümningkun ka atiijom mirbaiqha. Maiq wiita raq ümniika misaisi.

³ Ümshiikong tsii raq ümnaq laobaiqto. Üm chela nyungchong ka raqkhakhu na atei. Ümjam ka kinkhu thaq na tei laü. Kra ningkhan ümnaq tiingo tlaü, ‘Ngi ka juwero mitiideabaiq lot?’

⁴ Ümniiraq ümjam ka ratsan se na, liihawe chü ikha hailaü jiimin, ra na raiqsaiq phong na apaq ikha, li jiimin, ngi raq ümniika mitiidea hit baiqha.

⁵ “Rawa na ahukkong maiqjam na nyapwa raüla, tsangshiq ma jamlai wa rongra tlaq kli hukhotlo. Maiq raq spiqtsi panki raüla, tsangshiq raq aso ka tiichongthü ruq riitlo. Shatmaq ümjaqti raq ümniika, botkhulai rai shottlii tiithen baiqto.

⁶ Esau saüsetiim, üm tsiiqtum ka, run wanto she.

⁷ Ümkongtinok thun raq, ümnaq laobaiqto. Tsangshiq raq ümniika ümmung wa jobaiqto she. Ümniirai wehea mungti raq, ümchaü ümnaq longto. Raüta ümniika tangto. Raüta ümhiqshong jiiwanto. Ümniirai dung pinshi na seati raq, Ümnaq tiidea chang thiikho thuto, Tsangshiq raq ümnaq ngutlo, ‘Apaiq khonglaq phaqchi ira ümbano?’

⁸ Tatiwe raq ngutlo, “Ngi raq Edom tiichamchao ranaiq, ngi raq tsangshiq maiqse thun ka, mishthenbaiqha. Lata tsangshiq taksu tsii ka, wiita mitiimobaiqha.

⁹ Teman chela nolabi thun, phiipraq mitsai. Kiimaq Edom mungti sreabi, wiita re raq mijiipbaiq.

Edom Mungti Kha Tsihea

¹⁰ “Jamkhano ngukla ümniiraq, Jakob saüse thun ka khat laüta, jiipbaiq laü. Ümniika mitiijiipbaiq, raüta pattup miitu jea mingaü haü.

¹¹ Ümniika kra ranaiq pong na chapki laü, Re raq tsangshiq chela kilam chong, bukbaiq wanta ranaiq na. Ümniika wanwe nam miimin, abi silaü. Jerusalem wa tsiiqtum run laüta, hophaq wan laü, namshiq liipan na, riiphea phaq lan.

¹² Namshiq raq süram rai man chang wa, Ümphunonok Juda mungti thenjen wantaq kra chhi lanta, chochi wan man chang chochi wan lan, namshiq khoqriiq man chang chochi dam lan, Tsangshiq then wan chhilanta, namshiq ka naisiq man chang wa,

¹³ Namshiq isenginok chela mong na, nyapwa man chang nyap wan lan, tsangshiq tsaija chhunja chamchao na, namshiq raq slaislii riiwan lan. Lantea tsangshiq chamchao ranaiq, tsangshiq tsiiq tum tsuq wan lan.

¹⁴ Namshiq lamhumrap maq khelanta, re jaq mong wa dongho raüta, khum tiikhe apin wan wa, lap lanta rewe ma kiinong kuq wan lan.

Shiikeawe Raq Maiq Munghinti Kha Mipho

¹⁵ “Ngi Tatiwe raq mangjong tlotli, kha pho ma akhing ka aje she, Edom lei, namshiq raq jamlai wa haihii lan, kra namshiq min mitiichamchao. Namshiq raq maiq ma jamlai wa klo lan, kra namshiq miishe mitham kuq.

¹⁶ Isengi raq akhapwiq chamchao kok nyangto, ihiqlam asii ba maq. Shatmaq kra tro na siti maiq mung tlotli raq, kriithaq na aheng khaphea chamchao kok minyang, Tsangshiq raq kra nyang raüta, wiita mithumki.

Israil Mung Raq Rekhat Mitang

¹⁷ “Shatmaq Jajon hiqlam na wiijam mitiipaü wan, kiimaq kriika asii hiq ba she miraq. Kriika Jakob sengi raq milap wan. Kriika tsangshiq tachong hiqshong.

¹⁸ Jakob sengi nai Joseph sengi ka, walütu ikha minyai wan. Tsangshiq raq Esau sengi ka, tsamkü phong chaq tlaq ikha michaq baiq wan. Isaü saüse phan wiika alai ala, jammin tiichong mak miraq. Arka Ngi Tatiwe raq ngutiikang.

¹⁹ “Juda mung wa shemai nüti raq, Edom munghiq jiiwan raüta misiq wan. Shenyap nü wangti kinjiji na shongti raq, Philistainnok hiq mijii wan. Raüta misiq wan. Israilnok riika Ephraimnok wang nai Samaria wang kra, jiiwan raüta misiq wan. Benjamin phan riika Gilead wang kra jii, raüta misiq wan.

²⁰ Israil mung shekhu nü mungti pongmung na, munglu shumwi asiwati maiqmii mung na mijang wan. Raüta Phonesia wang ka, shekhu nü na Jarephath chela na saüli khat wan raüta mijii wan. Raüta misiq wan. Jerusalemti Sardis mung na munglu shumwi asiwati ka, ajang mirwan. Raüta Juda mung wa shemai nü wang chela thun ka, khat wan raüta mijii wan. Raüta misiq wan.

²¹ Jerusalem chelati ka rekhat tang wan raüta, arü ariiq wawan tlaq kong raq, Edom mung ka mikhat wan. Raüta mitang wan. Raüta Edom mung ka misiq wan. Kiimaq kra akhing na, Tatiwe apaiq kli Hokhamwe ma mija wan,” nguta Tatiwe raq chongtlo.