Mark 3 - ASII LAKDAP Bible (BSI)

Jesuq Raq Ajaq Amaa Arkiwe Tiiheato

¹ Kra jai maq, Jesuq ka sinagok jam mong na hali wanongto. Kiijaq maiq weshi, ajaq ama arkiwe min asi riito.

² Kiijaq ngati phong wa, maiq wiijamti raq, Jesuq ka tiishut haijaq nguta lamlu liishat ritto. Krai mren, tsangshiq raq Asii Niitiitsak ranaiq na, Jesuq raq kra atsiti we kra mitiihea kuq sha, tiihea kuq mak wa riijiiq nguta, khekham maq liito.

³ Kiijiishe Jesuq raq atsiti we ka, “Ana tarü khaki na wara,” nguta heato.

⁴ Raütiishe, apaiq raq nokwe ma bom ka akha waito, “Riita, nashiq Thungtri na, Asii Niitiitsak ranaiq na, jamlai phan jaqsham chang ngutiiwa chongtla? Akhrumke chang ngutiisha chongtla, sha ashthen riibaiq chang ngutiiwa chongtla? Maiqse miisaq ka atiichhun chang ngutiisha chongtla, sha miisaq ka atan riiwan chang ngutiiwa chongtla?” Shatmaq, tsangshiq raq Jesuq bom ka poshi min tre mak, kaiqshak li riito.

⁵ Jesuq raq tsangshiq ka lii raüta, atsan khiq wa la riito. Shatmaq, tsanko miika, tsangshiq shut tlaq kra nai tsangshiq tsantsii wanrai tlaq kra chhi raüta, tsangshiq ma amang chan tsi wala hali riito. Kiijiishe apaiq raq maiq we kiima, “Ümjaq phi ka tlii laq,” nguta thaüto. Krai mren, apaiq raq ajaq ka tliisaq riito. Kiimaq ajaq tsi ka tiidoqra, heakisaq heakito.

⁶ Kra chhi raütiishe, Phorisinok ka, tiido rang, sinagok wa wawanto. Raüta, tlothit li she, Herod sengi wiijamti rai riihum wato. Raüta, tsangshiq raq Jesuq tsea baiq miitu, mat raü she süpha wanto.

Gelili Thamkii Maq Atsiti Pahea Tiiheato

⁷ Jesuq nai ajaqshisetiim ka maiq akaiq kaiq, Gelili Thamchum kii nü niishe wawanto. Shatmaq, mungmaiqse muklung raq, apaiq jai ka phan wanto. Tsangshiq ka Gelili wang wa, Judia wang wa,

⁸ Jerusalem wa, Idumea wang wa, Jordan rai maq shedong nü wang binjü wa, kiimaq Tajar nai Sidon chela tro wa awarai riito. Tsangshiq ka Jesuq rai riihumkai nguta kito. Tsangshiq ka Jesuq raq amao chang sham akai sham tlaq tsütsa kra tai raüta akirai riito.

⁹ Maiqphong ka pahea riitsap wan kha maq, athi mungmaiqse raq apaiq khoti nyat baiq jiiq ngo maq, apaiq ka lai na ngawa ma nguta, Jesuq raq ajaqshisetiim ma lai ashi tiije ronglaq nguta thaüto.

¹⁰ Apaiq raq maiq atsiti ka pahea tiihea kuqto. Krai mren, maiq atsiti thun pahea raq, apaiq khum na jaq maq shamtlo haijaq nguta, riithu riiliiq, apaiq phana wa riitsap khatto.

¹¹ Kiimaq, maiqtsak raq arom wan atsiti thun raq, apaiq rai riihum tlaq na, tsangshiq ka akhaki na kaütsrong na bumsaqsaq raüta, akii anyii, “Ümniika Shiikeawe Se!” nguta hoqsii trangto.

¹² Jesuq raq tsak tha thun ma, apaiq ka Khristo nguta, maiq ma chongke ra mak, nguta sonto.

Akiimwetiim Roqshi ri Wenai Shiikapto

¹³ Kra jai maq, Jesuq ka hiqlam ashi na wawanto. Raüta kiijaq, apaiq raq ümriiti wa rotla, kriiti thun ka apaiq phana heato. Krai mren, tsangshiq ka apaiq phana wato.

¹⁴ Kiimaq apaiq raq roqshi ri wenai ka shiikapto. Kra shiikap wantaq thun ka akiimwetiim nguta mangto. Apaiq raq tsangshiq ma, “Ngi raq namshiq ka ngi rai adam si miitu shiikap tiikang. Ngi raq namshiq ka trahokai mithaü kang.

¹⁵ Kiimaq namshiq ma tha jobaiq arang mikuq kang,” nguta chongkuqto.

¹⁶ Apaiq raq ashkap wan roqshi ri wenai ka arthun ara riito: Simon (Jesuq raq apaiq mang ka Petar nguta mangto).

¹⁷ Jakob nai ano Johan. Tsangnai ka Jebedi se (Jesuq raq tsangnai mang ka Boanergi nguta mangto.) Kra liichum ka ramok ikha tsüti nguta ngo riito.

¹⁸ Kiimaq Andru, Philip, Bartholomi, Mothiq, Thomas, Alphias se Jakob, Thadeas, mung ma tsan tiitsiti we Simon thun ka riito.

¹⁹ Kiimaq apaiq shaphaqti we Judas Iskariot ri tseato.

Jesuq Ka Beljebul Luwe Nguta Shrato

²⁰ Raütiishe, Jesuq ka jam na wawanto. Kiitiikii min, maiq ka pahea riiphong wan kha maq, Jesuq nai ajaqshisetiim riika dung min phaqsiq lap mak riito.

²¹ Kra tsütsa ka ajamti raq tairaüta, tsangshiq ka apaiq jaqsham kra shiikhingkai nguta kito. Kriika nokwe raq, “Apaiq kla angi she riikito!” nguta riichong sia kha maq kito.

²² Jerusalem wa awa shrinketibi wiijamti raq riichongto, “Akhum na Beljebul tha kaü asi! Thawe hokham raq apaiq ma, shotsai winji jobaiq wan ningkun kuq tlo,” nguta apaiq ka shrato.

²³ Kriikha maq, Jesuq raq tsangshiq ka apaiq tho na hea raüta, shiiton manphan setiim maq tsii chongkuqto: “Soitan riili Soitan ka jamkho mijo baiq?

²⁴ Maiq mung ashi ka, tsangshiq liipan na, maiqmii wela ja she, riilong liiqki raüla, tsangmung ka pongpin riipin mithenki ngushat.

²⁵ Kiimahali, maiq jamkun ashiti ka, maiqmii liipan na tatso watrangli la siraü jiika, tapin miki ngushat.

²⁶ Kiikhiisii hali, Soitan raq mung lang tlaq kiiwa, tsangshiq liipan na, maiqmii hokham ja she riikhat raü ka, apaiq mungtan ka atrun she mirki. Pongpin riipin raüta, athen miraq. Raüta athum she mirki.”

²⁷ “Kiimaq, srea weshi jamkun wa, ata awii run wa ma jiila, atati we ka kongkhu lap raüta, kharü maq tep khachang miraq. Kra lot jaitiq she, ajamkun wa hupsam thun kra mirun lot.”

²⁸ “Ngi chongpha, tai ronglaq, maiqse raq Shiikeawe man na, ahin ngarai tang tlaq kriika midii kuqlot,

²⁹ Shatmaq, jurwa Asii Wenyi ma bombi kuqtlaq, kra ngarai ka ümtiikii jiimin diikuq mak miraq. Jamkhano ngukla, apaiq raq tiisii wanlot mak chang phan ngarai tang tlo.”

³⁰ (Arka maiq wiijamti raq, “Apaiq ka maiqtsak raq rom wanto,” nguta shummii tlaq, kriikha maq nguto.)

Jesuq Ma Anyung Nai Anotiim

³¹ Kiitiikaq Jesuq ma anyung nai anotiim ka saükito. Kiijaq tsangshiq ka kinphai na chap raüta, apaiq ka tsangshiq rai mirhum kilaq nguta tiiheato.

³² Jesuq tro na ngatlaq mungmaiqse raq, “Ümniirai riihumkai aki, ümnyung nai ümnotiim, ümno jechaksere raq kinphai na hea tlo,” nguta Jesuq ma chongto.

³³ Kiijiishe Jesuq raq treto, “I nyung ka juwa? I notiim ka juwa?”

³⁴ Apaiq raq atro na, maiq thung tlaq kra pha nü na lii raüta, “Liimanta! Arthun ahata ngi ma anyung, kiimaq i notiim!

³⁵ Jurwa Shiikeawe bom lang tlaq, kriiti kata ngi ma, i no, i sheanyung, kiimaq i nyung,” nguta tsangshiq bom ka treto.