Mark 1 - ASII LAKDAP Bible (BSI)

Khamlamketi We Johan Raq Trahoto

¹ Arka Shiikeawe Se Jesuq Khristo Tsütsa Ahea manphan tiichap phaho.

² Arka shammi Isaia raq waiq thütaq kra phan phan she kuwanto. Apaiq raq akha waiq thüto: “Shiikeawe raq nguto, ‘Liilaq, ngi raq i tsa soqti kiimwe, ümniima sinkhu na mitiikiha. Apaiq raq ümkai chang lam ka mitanho!’

³ Kumtsaiphii maq maiq ashi raq akha riimtlo: ‘Tatiwe kai chang lam ka tanholi liilü; Apaiq kai ma lam ka liitatat tanholi laq!’”

⁴ Riita, ara chongtaq arai mren, Johan raq kumtsaiphii maq maiq ma, kham lamkuq wanto. Kiimaq tra hokuqto. Apaiq raq, “Namshiq ka ngarai lam wa jang ronglaq. Lanta kham lam ronglaq. Raüla, Shiikeawe raq namshiq ngarai ka adii mirkuq,” nguta trahokuqto.

⁵ Judia wang wa nai Jerusalem chela wa, maiq pahea raq, apaiq traho bom chong taikai kito. Kiimaq, tsangshiq raq maiqmii ngarai ka tiidiito. Krai mren, apaiq raq tsangshiq ma Jordan rai na kham lamkuqto.

⁶ Johan raq apaiq miirii ka kumtsong bin maq ataq khea samto. Kiimaq achhü niika ngamkhü shinket pato. Kiimaq apaiq dung ka kupchi nai ngiqngu phaqsiq raüta sito.

⁷ Apaiq raq mungmaiqse ma trahoke lam maq, “I jai na kitiiliiwe ka ngi thaq na ajong. Ngi ka apaiq hokpa raü kha diike min thek mang anun we.

⁸ Ngi raq namshiq ka kham miili lamkuq tiikang. Shatmaq apaiq riika, namshiq ma, Asii Wenyi miishe kham milamkuq,” nguta traho bom chongkuqto.

Johan Raq Jesuq Ma Kham Lamkuqto

⁹ Kra jai maq jaqlo sijai niili, Jesuq ka Gelili wang wa Najareth hiq maq aki she saühoto. Kiimaq Johan raq apaiq ma Jordan rai na kham lamkuqto.

¹⁰ Jesuq ka kham mong maq takii na dong wan ri li she, apaiq raq ramungtan ka tiidi wan chhito. Kiimaq Shiikeawe Wenyi ka haütaü kaü ikha satki raüta, akhu thaq na ngakito.

¹¹ Kiimaq ramungtan wa maiq bom ashi raq, “Ümniika I Se. Ngi ka ümniima kai khoqriiq tiikang,” nguta chongto.

Jesuq Ka Tha Raq Maitaito

¹² Kiimaq tlothit li she, Shiikeawe Wenyi raq apaiq ka kumtsaiphii binjü na sheahoto.

¹³ Raüta, kiijaq apaiq ka raroqblai Soitan raq, apaiq mo na tiishang hajaq nguta maitaito. Kiijaq rum ngamse min asi riito. Shatmaq rasetiim kiraüta apaiq ka shiililiito.

Jesuq Raq Ngiq Lamti Weblai Tsea Wanto

¹⁴ Johan ka phaqtek na ashaq wi niishe, Jesuq ka Gelili wang na wa raüta, Shiikeawe Tsütsa Ahea ka akha chongkuqto,

¹⁵ “Akhing ahea saüto she. Shiikeawe mungtan ka aje niishe! Ümchaü sanha, namshiq ngarai lamphan kra baiqthü rongliishe. Lanta Tsütsa Ahea kiima kam wan ronglaq!”

¹⁶ Jesuq ka Gelili Thamkii na awarai riito. Kiijaq apaiq raq ngiq lamti we Simon nai ano Andru ka, ngiq khup rea lowanto.

¹⁷ Jesuq raq tsangnai ka akha hiawanto, “Namnai ka ana warong ra. I jai she phan ronglaq. Ngi raq namshiq ma maiq khup wan jaqsham she mishrin kuq kang.”

¹⁸ Krai mren, tlothit li she, tsangnai raq chiiq ka kiijaq thaq rang raütiishe, apaiq jai she phan wanto.

¹⁹ Apaiq ka kiimaq phanshi ri hali wanongto. Raüta, Jebedi se, Jakob nai Johan rai she riihumto. Tsangshiq ka lai mong na chiiq tiihea rea lowanto.

²⁰ Jesuq raq tsangnai kra chhiri li she, apaiq raq tsangnai ka apaiq phana hea wanto. Krai mren, tsangnai riimin, awe ka kiijaq amaq kham na ngiq lam damti rai lai na baiqthü raüta, Jesuq rai she wawan damto.

Maiq Weshi Tha Raq Arom Wan Tiiheato

²¹ Jesuq nai ajaqshisetiim ka Kaparniam chela na wato. Kiimaq tlothit li, jai wa Asii Niitiitsak ranaiq na, Jesuq ka sinagok na kito. Raüta tra hokuqto.

²² Apaiq raq arang ajong maq, kholam kholiiq traho bom chongke kra tai raüta, nokwe ka kai amaoli she riito. Kra jamkhano maota ngukla, apaiq traho bom chongke ka, Thungtri shrinketibi raq chongkuq tlaq kiikha riimak. Arang ajong maq chongkuqto.

²³ Kra liipan niili, tlothit li kiijaq maiq weshi, wai raq ajok wan we ka sinagok na nyap wato. Raüta, apaiq ka aho asii, agiwa lam miishe,

²⁴ “Najareth hiqti Jesuq le, ümniika naishiq jaqsham ara tangta baiq kai she sha saüki laü? Ümniika naishiq ara shiithen baiq kai she sha saüki laü? Ngi raq ümniika asap ha. Ümniika Shiikeawe raq atiiki Asii kiimwe kata!” nguta siiraito.

²⁵ Jesuq raq wai tha ma, “Kaiqshak maq, arwe khum wa dongho tlo laq!” nguta aming kuqto.

²⁶ Krai mren, wai raq maiqwe ka notshotshot she bai raüta, aho asii waliishe, wai tha ka apaiq khum wa donghoto.

²⁷ Kra chhi raütiishe, nokwe ka kai awang rai lam miishe, “Notsam arwe ara juwa? Ara tsütsa chongtlaq arka anye ngo chang nya? Apaiq raq tha min tiidoq mra jobaiqtlo nya!” ngutiishe riibomto.

²⁸ Krai mren she, Jesuq tsa ka, jaqlo thitthit li she, kra Gelili wang hamli niishe nyam rai wanto.

Jesuq Raq Atsiti Pahea Tiiheato

²⁹ Jesuq nai ajaqshisetiim Jakob nai Johan miitaq ka tlothit hali, sinagok maq tiido wanto. Raüta Simon nai Andru jam na leaphok wawanto.

³⁰ Kiijaq, Simon nyai-chhi ka tsidong abum lowanto. Tsangshiq raq taülaükhiq Jesuq ma, Simon nyaichhi ka atsi nguta chongto.

³¹ Krai mren, apaiq ka wa raüta, ajaq maq atsiti nyung jaq na sham saq raüta tiichapto. Kiimaq atsi ka heasaq li she heakito. Krai mren, jamtinyung ka tsangshiq ma, tashong wachaq she honghoto.

³² Kra raji, rashe nyap jai niishe, atsiti nai wai raq ajok thun maiq kunli ka, Jesuq phana sheahoto.

³³ Kra chela wa maiq thun kunli ka, kra jam rinkea na tiibo wanto.

³⁴ Jesuq raq phanrap thuptsi thatsi wiita tiihea kuqto. Apaiq raq maiqkhum wa tha pahea jobaiqto. Apaiq raq tsak tha mii tha ka bom poshi min tiibom mak maq, jobaiqto. Kra jamkhano tiibom mak ngukla, tha raq apaiq ka Khristo nguta asap kha maq, tiibom mak riito.

Jesuq Raq Gelili Wang Na Trahoto

³⁵ Anap ranap na, wuwacho niili, Jesuq ka tiidohoto. Raüta, chela phai na, maiq akaiq kaiq ba na kihoto. Raüta achu jaüto.

³⁶ Shatmaq, Simon nai akongtitiim ka apaiq ritkai kito.

³⁷ Kiimaq apaiq rai riihum raüta, “Nanok tarü ümnaq ritti siisaq,” nguta apaiq ma chongto.

³⁸ Shatmaq Jesuq raq treto, “Nashiq ka arbinjü na hiqshong ahin ümchuwa asi, kiijaq khum wan chang. Ngi raq kra thun hiqshong niimin, tra hoke chang. Ngi ka ara miitu kikang.”

³⁹ Krai mren, apaiq ka Gelili wang hamli na khum raüta, sinagok thun na tsütsa ahea kra chongkuqto. Kiimaq tha ka maiq khum wa jobaiqto.

Jesuq Raq Maiq Weshi Tiiheato

⁴⁰ Maiq weshi ka ashong thatsi riito. Apaiq ka Jesuq phana kito. Raüta, kaütsrong na ngasaq raüta, “Ümniiraq mangchan haü jiila, i khum ara mitiisii kuq lot haü,” nguta tiipaiqneato.

⁴¹ Jesuq raq mangchan tsihea lam maq, atsitiwe dü na ajaq maq sham raüta, “Ngi raq ümkhum ka tiisiike rotiikang. Ümchaü min heakikiq she!” nguta bomdamto.

⁴² Krai mren, ashongtsi ka tlothit li she, tiidoqra heakito. Kiimaq apaiq khum ka nyeajok she siikito.

⁴³ Kiijiishe, Jesuq raq apaiq ma tsii ka atsi dada maq chongkuq raüta, tlothit li she tiiwa baiqto.

⁴⁴ Awawan na apaiq ma, “Bom ka tiitsang tailaq. Ara tsütsa ara jumiimin naq chong wankiq. Shatmaq, ramwe we phana leaphok wa laüta, apaiq ma ümkhum ka tlii wakiq. Apaiq raq ümkhum ka milii laq. Kra lot jai she, ümkhum ka asii she dea nguta, nanok tarü ma tiisap miitu she, Mosheq aming phan phan, honglu she kuq wakiq,” nguta chong kuqto.

⁴⁵ Shatmiitiq, apaiq ka wawan raüta, atsi tiihea kuqtaq tsütsa kra, barap binrii niishe tsaki wanto. Apaiq raq barap na, rin ra wan kha maq, Jesuq ka chela na, nokwe makki na, khumki lot mak she riito. Arkha maq Jesuq ka, maiq akaiq kaiq ba hiqshong niili she khum wanto. Kra taü maq dongdii min, mungmaiqse ka Gelili wang barap se wa, apaiq phana riitsap riikhat wato.