LEWI 1 - ASII LAKDAP Bible (BSI)

Wiipumtam Maq Chaqtlii Honglu

¹ Tatiwe raq Mosheq ka Tatiwe Asi Tombutiip maq heato. Raüta apaiq ma arthun thungtri raütu ka kuqto.

² Arka Israilnok raq tsangshiq raq honglu takuqtlaq akhing na lang wan miitu kuqto. Arka jurwa nyamse honglu takuq tlaq akhing na, riimakla aminsaü ashi takuq tlaq akhing na, lo riimakla asku ashi takuq tlaq akhing na, riimakla achhechhi kong wa ashi takuq tlaq akhing na lang chang.

³ Apaiq raq aminsaü kong wa ashi ka wiipumtam maq chaqtlii honglu na takuqtlaq akhing na, apaiq raq minsaü pongwe ka nyeajokjok hea jamlai ami atsi min ahü kechang. Apaiq raq kra Tatiwe asi Tombutiip rinkea na kewan ratlo. Kra raütiq Tatiwe raq apaiq ka mitao wan.

⁴ Kriiwe raq nyamse khupo na ajaq maq sham chang. Kiimaq kra nyamse ka apaiq ngarai thun tiikhoi miitu takuqto nguta mitao wan.

⁵ Apaiq raq kra minsaü pongwe ka kiijaq ataa miraq. Kiimaq Aron phan ramwebi raq ngam tiijai ka Tatiwe ma mikuq. Raütiishe Tombutiip kilamchong tho na berong-wacha sitlaq kra arong shokblai ri wiita na ngam tiijai ka miwan.

⁶ Kra raütiishe apaiq raq ngamkhü ka akoq miraq. Raüta ngam ka achum miraq.

⁷ Kiimaq ramwebi raq berong-wacha kiijaq chin pan thun kra aheawiq miphong. Raüta wa maq michaq.

⁸ Tsangshiq raq ngamphu thun ka wa na michaq. Akhupo nai ngampü thun kiimin nong nong michaq.

⁹ Kriiwe raq among wa apukji thun nai ahok thun kra kham maq heraatlo. Raüta kiijaq jaqshamti ramwe raq kra honglu ngam thun kra berong-wacha na wiita michaq baiq. Ara phaqsea-honglu khiimtsang ka Tatiwe ma tsan tiiheali.

¹⁰ Kiimaq kriiwe raq honglu na asku phong wa sku ashi lo riimakla achhechhi kong wa ashi takuqtlaq jiila, kriika apongwe kiimaq akhum nyeajokjok ami atsi jammin ahü riichang.

¹¹ Apaiq raq nyamse ka berong-wacha shekhu nü siim na tachang. Kiimaq ramwebi raq ngam tiijai ka berong-wacha siimblai ri wiita na miwan.

¹² Kiimaq kriiwe raq ngam ka aphu maq chumlot jai she, kiijaq jaqshamti ramwe sitlaq kriiraq ngam phu thun ka wiita, akhupo kiimaq ngampü thun kiimin nong nong maq wa na michaq.

¹³ Kriiwe raq among wa apuk aji thun nai awühokpe wiinai thun kra kham maq he ratlo. Kiimaq ramwe raq honglu ngam thun ka Tatiwe ma mikuq. Raüta ngam tlotli ka berong-wacha na michaq. Ara phaqsea honglu khiimtsang ka Tatiwe ma tsan tiiheali.

¹⁴ Kiimaq kriiwe raq chaqtlii-honglu ka wushi la kuq raüla, kriika haütao kaü keraatlo. Riimakla paro kaü riichang.

¹⁵ Ramwe raq kra berong-wacha na kechang. Adang kong maq rapkhat khat raüta, tsea chang. Raüta akhupo ka berong-wacha na chaq chang. Atiijai ka berong-wacha siim na tiisa baiq chang.

¹⁶ Raüta apaiq raq wushi tsiq pukpo nai among wa apukji thun ka lambaiq chang. Raüta berong-wacha maq shedong nü siim na wabun tsobaiq tlaq kiina baiqkai chang.

¹⁷ Apaiq raq wushi maa ka arakong wiinai maq sham raüta, arakongnai ka panbaiq mak miili panthit angam ka chai baiq chang. Raüta wiipumtam maq berong-wacha na chaq chang. Ara phaqsea-honglu khiimtsang ka Tatiwe ma tsan tiiheali.