Jude 1 - ASII LAKDAP Bible (BSI)

¹ Ngi, Jud, Jesuq Khristo jaqshise, kiimaq Jakob ma ano raq-- Shiikeawe raq ahea arwan maiqsetiim ma, juwa Shiikea Awe lungwii wokhong na nai Jesuq Khristo tiiwong na siti ma tiiho wan tiikang:

² Tiihang wan, hansang, kiimaq lungwiitsii ka namshiq ma asho awo misi laq.

Arot Shrabi

³ Lungwii phunainotiim lei, nashiq raq tiichhii wan rilung lap wan kai kra thaq na seng lata, ngi raq namshiq ma lak ashi, tlothit li waiq tlo ha jiilei nguta tiima wan kang. Arka, Shiikeawe raq nashiq asengi ma, pattup pat-sa kamasham kuqtaq, ara awongsii maq rüm laita siwan miitu, rekhat wanruq maq sichang nguta tsaido jido bom chongke lak waiq wan tiima kang.

⁴ Ara jamkhano chong tiikang ngukla, nashiq phong na, nashiq raq chhilap mai shon li, Shiikeawe sap makti maiq shang wanto. Tsangshiq raq, Shiikeawe kaphap mangchan ka, ajiq lam nü na seng raüta chongkuq tlo. Tsangshiq ka nashiq Tatiwe nai nashiq Chhiiti we, Jesuq Khristo ka shreng makti. Tsangshiq ka, Asii bomtsi na, man na, rathup rapha ji niiphü dongdii, atiishut baiq wan wishe.

⁵ Riita, ija, namshiq riimin la arthun arka asap han dongdii ngutiika, ngi riimin asap ha. Li jiimin, ngi raq namshiq ma thongshi ri hali bliiq chongke nong ro tiikang. Namshiq raq asap han, Tatiwe raq Israilnok ka Ejip mung wa tiichhii kuq wanto. Shatmaq, kra jai miishe, tsangshiq phong wa, maiq ümchu riiwa Shiikeawe ma kamwan mak riitaq, kriiti thun ka Shiikeawe raq wiita tsatbaiq wanto.

⁶ Kiimahali, namshiq raq tsan na tiitsang shat rong laq. Rasetiim phong wa, Shiikeawe raq tsangshiq ma arang kuqtaq, kra aming liipan na siwan mak maq, Shiikeawe aming kra jin raüta, ahin na kaihoti thun ka, Shiikeawe raq tsangshiq ka ümchaü, pattup tiipanki mak chang phan kharü maq kha raüta, ümchaü ka ranyaq nyang mong na kharü maq kha raüta thütlo. Shiikeawe raq tsangshiq ka Phangthum Khapho Ranaiq na, wamungtan na mitiidea baiq. Raüta wa maq mitiikhiim chaq baiq.

⁷ Kiimahali, namshiq raq tsan na tiitsang shat rong laq, Sodom nai Gommora chelati nai kra chela nai tho na siti maiqse ahinti thun riimin la, rasetiim raq tangtaq kiikha sethoq ngarai nai hi-awaq ikha riinyat shat ngarai kra tang raüta siwanto. Kriikha na, tsangshiq ka pattup thum mak phan wa maq, tiikhiim chaq baiqto. Kriika maiqse angu tarü ma, hon chongke miitu shiithen baiqto.

⁸ Ara chongtiikai akhiisii hali, ümchaü sitlaq, arot shammibi kong ara riimin, shammi la jatiikai nguta, tsangshiq khum ka shiithen baiq wan ngarai tang tlo. Raüta, Shiikeawe arang ka shummii shaqshaq shummii wantlo. Kiimaq ramungtan na siti rasetiim thun kriimin shummii wan tlo.

⁹ Riita, ara tsangshiq phephiiq wan tlaq akhiika, Rase jong Maikel raq san tla, atinkhan ka bom mak riito. Mosheq maa ka ju raq lapshe chang wa nguta, Thawe rai riitsotaq akhing niimin, apaiq raq Thawe ma ason ka son mak dea riito. Shatmaq, apaiq raq Thawe miika, “Tatiwe riitiq ümniika mison kiiphaü!” ngutli bomkuqto.

¹⁰ Shatmiitiq, ara chong tiikai arot shammibi thun riika, tsangshiq raq jamlai wa tak lot mak bomtsi sitlaq, kriika shummii laqpii, chuphit nüphit li saisi tlo. Tsangshiq raq jamlai wa saptlaq kriika, ngarai han-ngam pinjali sap tlo. Tsangshiq ka ngarai han-ngam tsii phara maq jamlai wa sap tlaq kra miitu, rum ngamse kong ikhli, maiq ka kaqho tlo. Kra riili she, tsangshiq ka shiithen baiqtlo.

¹¹ Tsangshiq miika kai phiiptsi wan chang sitlo! Tsangshiq ka Kain jai phanti. Kiimahali, kampho ma süram raüta, Balaam raq ngarai tangtaq, kra lamphan na hali, ümchaü tsangshiq armin kiho nong tlo. Tsangshiq arka, Kora raq jamkho pong wela ja ngarai tangtaq, kiikha ngarai tang tlo. Apaiq ka jamkho thumtaq, kra niq riri sii hali, tsangshiq armin then wanto she.

¹² Tsangshiq arka namshiq Phungmaiqse rintii riitam nga tlan na, shakaq sükhatam kong. Maiqmii wok triim phaq miituli sitlo. Tsangshiq arka phumlü da, rahai raq rawang win na pan rai tlaq ikhli sitlo. Tsangshiq arka rajun kham ahü, phumlüda tam ikhli. Tsangshiq ka atsi ahü pechong ikhli. Atsicho niimin tsihü li siwan tlaq ikha. Tsangshiq arka, pechong arang chong maq babaiq jeshe ikha, atsai kaikun she.

¹³ Tsangshiq raq ngarai jaqsham tlaq arka, sammoktra kham raq takii na ashe khamphom tsuqbaiq tlaq ikha. Tsangshiq ka pongmü riimü khumti, ra na raiqsaiq khumtlaq ikha. Tsangshiq miitu, makse riimin khonlot mak chang, ranyaq jonghea ka Shiikeawe raq tiijeje she thü tlo.

¹⁴ Tsangshiq miitu ka Enokh, Atam pat maq pha raüta pattrok wa shammi we raq tiitthai thü je she. Apaiq raq, “Tatiwe ka ahing amun, apaiq rasetiim rai misaüho.

¹⁵ Raüta ngarai maiqse kunli kha ka mipho kuq. Raüta, tsangshiq raq phiiptsi jiiptsi ümchuwa ngarai tangtaq thun nai Shiikeawe ma ashut bomtaq thun kra kha phoke kai miki!” nguta tiithai thiito.

¹⁶ Tsangshiq riika wranaiqshe, abot atsaü wa trangli, kiimaq maiqse maiqtsiiq wa trang tiimin li sitlo. Tsangshiq ka tsangshiq hon atsii abi rüm tlaq kra lamphanti. Tsangshiq ka maiqmii tiishomra sea wa tiimin li. Kiimaq maiq ka shomrasiq raüta, tsangshiq wok tiipaü wan, nanok ka hirii raüta mopsiq tlo.

Honlam Bom Nai Tsii Chongke Bomtsi

¹⁷ Shatmaq, phunainotiim lei, Tati Jesuq Khristo kiimwebi raq, man na namshiq ma jamlai bomtsi wa chongkuqtaq ira, tsan na tiitsang shat thü rong laq.

¹⁸ Tsangshiq raq namshiq ma, “Jai maq phangthum wan akhing saü wan raüla, namshiq shummiiti maiq midong wan. Tsangshiq ka maiqmii ngarai han-ngam ramho lamphantibi kong miraq,” nguta chongkuq thüto.

¹⁹ Tsangshiq arka, Phungmaiqse tu sitlaq kra tiikho baiq wanti miraq. Tsangshiq ka, ngarai han-ngam sükha lamphanti kong miraq. Tsangshiq mongjii na Asii Wenyi ka ahü miraq.

²⁰ Shatmaq, lungwii phunainotiim lei, namshiq riika, namshiq asii kamtsantsii rilung jam hai wan kli shiichaq wan ruq sironglaq. Asii Wenyi ningkun maq achu jaü lantli sirong laq.

²¹ Kiimaq, namshiq riika Shiikeawe mangchan wokhong mong na siwan ruq sirong laq. Lanta, khekham maq, pattup pat-sa rilung kongphiq kra, lap wan miitu sirong laq. Kriika Tati Jesuq Khristo raq, namshiq ma mikuq. Apaiq raq kra kaphap mangchan wokhong maq mikuq.

²² Namshiq liipan wa, Phungmaiqse wiijamti raq maiqmii kamasham lam phan na, tsangrii makti asi jiila, namshiq raq tsangshiq ka bomnin se maq chong kuq rong laq.

²³ Maiq wiijamti ka wamungtan na adea wan namshnam sitlo. Kiiwa tsangshiq ka tingting lam phan na tiijang shea wan nong rong laq. Lanta tiichhii kuq rong laq. Kiimaq maiq wiijamti ka tsangshiq maiqmii ashe ngarai ramho kharü mong na sitlo. Kiiwa tsangshiq ma mangchan tiitsi kuq rong laq. Lanta, Shiikeawe ma haisong wan lam kra chongkuq rong laq. Kra tiina, honkamshat maq siwan lili rong laq. Tsangshiq ngarai sükha rilung kriika, asaisi riironglaq. Shatmaq, namkhum kriika tsangshiq ngarai khamchum kiijaq naq tiitsam dam rongkiq.

Ram Tiibok Achu Jaü

²⁴ Namshiq ka tiichhan mak maq tiiwongketiwe, kiimaq namshiq ka shutphit ahü siirairai maq apaiq khushü ngao chhainyii mong na shea wantiwe, kiimaq chojong chise maq kiijaq mantut na tiichap wantiwe--

²⁵ apaiqkli nashiq Shiikeawe kiimaq nashiq Chhiitiwe kriimiili, nashiq Tati Jesuq Khristo lümaq, khushü, jonglu, ningkun, kiimaq arang ka, man na pat achat tlotli wa, kiimaq ümchaü min, kiimaq jai na wattlaq pattup pat-sa kiiwa wiita apaiq riili she mirlaq! Amen.