James 1 - ASII LAKDAP Bible (BSI)

¹ Ngi, Jakob, Shiikeawe kiimaq Tati Jesuq Khristo jaqshise raq: Shiikeawe sengi mangjong tlotli na riinyinshin siti tarü ma salam tiitai tiikang.

Kamtsantsii Nai Taksu Tsii

² Iphu inotiim lei, namshiq raq phanrap phanrii maitai riihum tlan na akhing na, kopan jonghea nguta tiima rong laq.

³ Jamkhano ngukla, namshiq raq asap han, namshiq kamtsantsii raq atinkhan maitai ara tanglot raüla, kra tsi ngo ka anin wan ningkun asi she ngushat.

⁴ Khekham maq silaq, anin wan ningkun maq chamchao thun ka tang wan ruq miitu, krai mren ümniika minhap kiimaq awongsii maiqse she mija haü kiimaq jamlai phan niimin kojo maü she mirhaü.

⁵ Shatmiitiina, namshiq liipan na, ara chongtiikai minhap maiqse rilung ara siwan miitu, taksu tsii ka lap mak shaqli, weshi ra asi jiila, apaiq raq Shiikeawe ma achu mijaü laq. Raüla, Shiikeawe raq apaiq ma mikuq. Jamkhano ngukla, taksu tsii jaüti, wiita ma, Shiikeawe raq jaq tiichhii raüta, khoqriiq shishiiq maq, raükhokkhok kuq tlo.

⁶ Shatmiitiina, ümniiraq achu jaü tlaü akhing na, Shiikeawe riika ümniima mikuq dongdii nguta, kam laüta jaü laq. Ümtsan anai ka naq thü kiq. Jurwa tsan nai maq achu jaü tlaq, kriiti ka sammoktra jü na, rahai wan kiijaq khamtso blun phom tlaq ikha. Apaiq ka rahai walam phanphan, khamtso blun phom wan tlaq ikhli miraq. Apaiq kamtsantsii ka rahai niili mipansiq.

^7-8 Ara chongtiikai akha, kamtsantsii na jonlang jonla tsiiti riika, Shiikeawe lam phan na ardea thukto nguta thimi tsii mak. Akhiiti riika Shiikeawe jaq wa achu shiiman milap ha nguta akhiismin tiima raa mak.

Chiithe Maiqse Nai Miitsan Maiqse Ma Tsiichong

⁹ Phungmaiqse liipan na juwa thümsaü litse sitlaq, Shiikeawe raq kriiti ka arong awin ma tiija wan tlaq akhing na chochi wan chang.

¹⁰ Kiimahali, Phungmaiqse liipan na, juwa chiithe sitlaq, Shiikeawe raq kriiti ka miitsan ma tiija tlaq akhing niimin chojong chise miili siwan raa tlo. Ara jamkhano chongtiikang ngukla, chiithe ja rilung ka, rum na pepü chong pülii tlaq ikhli. Jaqlose miitu li mipülii. Kiimiika atsaikai chang.

¹¹ Rashe kaü ka ranap chu maq dong wan tlo. Raüta akii heng wa liishe, ranaiq wan wan kii wan tlo. Kra rashe kii heng riishe, pepü chong ka tiijung baiq tlo. Raüta among wahea la, pülii tlaq kiimin wiita, tiijung chaq baiq tlo. Raüta ashin riikitlo. Ara chongtiikai ara niq riri sii hali, chiithe maiqse rilung kiimin, ranaiq shishi ka ashin mirki. Apaiq ka piikii tiikang nguta, mochii tlaq kra shon li, arilung thum wan raq mitong.

Amaitai Nai Atairai Akhing

¹² Jurwa maitai chamchao akhing saü raü min, apaiq raq Shiikeawe ma kamtsantsii rüm tlaq kra, tiimeshi mak maq, pharangrang maq, chamchao litkot kra nin wan ruq miili sitlaq, kriiti ma pinthum kechu jonghea. Shiikeawe raq apaiq lungwiitibi miitu, pattup pat-sa rilung mikuq ha nguta kiqkham kuqtaq kra, apaiq riimin milap.

¹³ Riita ju miiwa akha ngarai na tiidea miitu, maitai akhing saü tlaq, kra akhing na apaiq raq, “Ngi ara Shiikeawe raq ngarai na tiidea miitu maitai hophiiwa,” nguta Shiikeawe ma huknyan ka raa mak. Jamkhano ngukla, Shiikeawe riika abi ngarai jaqsham ka shamki mak phan. Kiimaq apaiq riika ngarai na tiidea miitu jumin maitai mak.

¹⁴ Shatmaq maiqse ngutlaq ka, atsan mong na abi tiima rüm tlaq kra, tiihong wan raa dongdii nguta süram wan tlaq, kra riili she, apaiq ka atsai chang thiikhobok na tiidea baiq tlo.

¹⁵ Apaiq raq abi sükha rümtlaq kriiraq asewok she miho kiimaq ngarai se she michii. Raüta ngarai tsi ka aman she miraq. Raüta kra se ka atsai she mirhum.

Kongphiq Ahea Ka Shiikeawe Raq Akuq

¹⁶ Lungwii Phungmaiqse phunainotiim le, namshiq ka angok angikong ma naqja rongkiq!

¹⁷ Phanrap ahea awa kongphiq ümchuwa sitlaq, kiimaq phanrap athuk atsom kongphiq ümchuwa sitlaq kriika, ramungtan na siti Shiikeawe raq siisaq akuq. Arthun arka Shiikeawe jaq wa siisaq saütlo. Apaiq ka ra na diim tlaq raiqsaiq, jipi, rashe sitlaq kra Tiiqti we. Apaiq ka pattup klai mak phan. Apaiq riika maiqse rilung na ra tiinyaq mak phan.

¹⁸ Apaiq tsantsiitsii maq nashiq ka tengteng bomtsi maq rawü tiichhi kuqto. Raüta wenyi rilung na nashiq ka apaiq raq ümchuwa phansang wantaq, kra thun thaq na, nashiq ka lamsheati ma tiija wan miitu phansangto.

Ni Maq Tai Nai Jaq Maq Sham

¹⁹ Lungwii phunainotiim lei, namshiq raq ara bomtsi ashi arka asap han she: Wiitarü raq tsütsa ahea bomtsi chongkuq tlaq kra, tsangriri maq tiitsangdada tai ronglaq. Lanta tak ronglaq. Shatmiitiina, nanok ma shrinke wan lam niika, chaosusu se maq chongkuq rong laq. Kiimaq mokhiq kai ka naqkhiq rongkiq.

²⁰ Maiqbi ngikhiti riika, Shiikeawe raq apaiq miitu asii rilung lamphan tiichhikuq tlaq kra, phan wan lot mak miraq.

²¹ Arkha maq, namshiq tarü raq, maiqmii tsan mong na abi, ashe ashi tiima tsantsii sitlaq kra, kiimaq abi ati rong arai sitlaq thun kra, wiita tsuqsaiqsaiq riilanta, arang chong maq ba lanta, phai baiq ronglaq. Lanta, Shiikeawe wokhong na, phaqchii nichii maq nyap wan lanta, si ronglaq. Lanta Shiikeawe raq, apaiq asii bomtsi lai namshiq mongjii na chhi jang wan tlaq kra, lang lanta si ronglaq. Kra bomtsi raq, namshiq rilung ka tiichhii wan raüta tiichhan chhi wan tlo.

²² Tsütsa Ahea bomchong kriika, ni maq lamlamse tai raü ka hong mak. Namshiq raq jamlai wa tai tlan, kra bomtsi ka maiqmii rilung na alang wan chang. Namshiq raq kra lang man miila sihan jiila, namshiq ka maiqmii kli tlao phaq tlan ngushat miraq.

²³ Phungmaiqse liipan na, jurwa Shiikeawe bomtsi ka ni maq atai wan lamlam li riitlaq, shatmaq apaiq raq jamlai wa tai tlaq kra, lang mak maq sitlaq, kriiti ka, maiq jurwa chamni tho na chap raüta, maiqmii sham na lii tlaq ikhli miraq.

²⁴ Apaiq raq asham ka chamni mong na chhi tlaq kra milii siq. Raüta mikiho. Krai mren, asham ka chamni mong na jamkho chhitaq kriika alaq she mirbaiq.

²⁵ Shatmaq, Tsütsa Ahea ka, Shiikeawe raq maiqse ma akuq minhap thungtri raütu. Ara minhap tri raütu raq, ngarai maiqse ka, kharü mong wa daa wan tlo. Jurwa ara tri raütu na jamlai wa chongtlaq kra thun ka, tiitho tiipha sidi raüta, liichum kra thusi tlaq, raüta laq mak phan maq, tsan na thü raüta, ranaiqtek lang tlaq, Shiikeawe raq apaiq ma phanrap na achu shiiman mikuq.

²⁶ Maiq weshi ra riika, apaiq ka maiqshaq awongsii Phungmaiqse sitiikang ngutiimin mitiima sham. Shatmiitiina, apaiq raq atili ka stiqkhaq mak maq, abom wan nguli bom tlaq jiika, apaiq ka banbok miili sitlo ngushat. Kriika maiqmii tlaophaq li. Apaiq raq Shiikeawe lamphan tlaq kriika shaqmii, atuli miraq.

²⁷ Shiikeawe, nashiq ma Awejong maklii na, apaiq shomnoqti awongsii Phungmaiqse ashi nguta sitlaqti riika, arthun jaqsham ara misham: Apaiq riika jechi nomi setiim kra mikhrum kuq. Kiimaq thüm waq manti nyungre kra, tsangshiq chamchao litkot ranaiq na milii kuq. Kiimaq maiqmii rilung kiimin, mangjong hiq wa ngarai rilung lamphan kiiwa, pong na trai rii shatmaq, asii maq misi. Akha singa wanti arka Shiikeawe raq kechu maiqse dea nguta miwea.