Hebrews 1 - ASII LAKDAP Bible (BSI)

Shiikeawe Raq Ase Lümaq Riibom Wanto

¹ Richü pat na Shiikeawe raq natitiim ma, apaiq wokhong na siwan lamlu hon atsii ka jang pahea chongkuqto she. Kiimaq ra shammibi lümaq phanrap phanrii lam na seng raüta, tsii ka chongkuqto.

² Shatmaq ümchaü sanha, ara phangthum wan pat she ngo maq, Shiikeawe raq nashiq ma tsii chongke ka, Ase nübok lümiishe bom dam tlo. Shiikeawe raq Ase lümaq, ara ra nai hiq ara phansang wanto. Kiimaq Shiikeawe raq Ase ka phangthum jai maq ara ra nai hiq thun wiita kunli ara rüm wan miitu ashong wan kun she.

³ Apaiq sham ari ka Shiikeawe achhai anyii ngao kra dongdii, shamshi ngamshi. Kiimaq Shiikeawe rong arai sham ari ka kunli, apaiq khum na tiisam tlo. Kiimaq apaiq nübok maq dong tlaq ningkun henghea bomtsi lümaq, ra nai hiq wiita rüm tlo. Apaiq raq ara mangjong hiq na diim tlaq, mangjong maiqse ngarai diike wan lam ka tankuq wan tlii raütiishe, apaiq ka sanseng ramungtan na ngati we, Ningkun Ajong thaq na Ajong Rümti we Shiikeawe sitlaq ngachang tho na, jaqtsi nü niishe nga wato.

Shiikeawe Ka Pinthum Ajong Alu

⁴ Shiikeawe raq, Ase mang liichum ka rasetiim mang thaq na ajong pinthum maq mang wanto. Ase mang wantaq mang kriika, Awe Shiikeawe raq tingsang athiiq raüta, apaiq rii dongdii nguta athü wan mang riito. Krai mren, Shiikeawe Awe raq, Ase ka rasetiim thaq na ajong pinthum miishe tiija wanto.

⁵ Ara jamkhano chongtiikai ngukla, Shiikeawe raq rasetiim phong wa ashi ra ma dongdii min, “Ümniika I se; Ümchaü ranaiq miishe ngi ka üm We,” ngutiika ngu mak dea. Kiimahali, Shiikeawe raq rase rai riibom wan tlaq akhing na, “Ngi ka Awe ma mijaha, kiimaq apaiq ka I Se shaq miishe mija wan,” ngutiimin ngumak dea.

⁶ Shatmaq, Shiikeawe raq Ase sekhuq laqlaqse ka, mangjong hiq na tiisat kaiho akhing na, Ase miitu apaiq raq bom ka akha chongto, “Rasetiim thun tlotli raq, apaiq ka shomnoq raa tlo,”

⁷ Shatmaq Shiikeawe raq rasetiim miitu bom ka akha chongto, “Shiikeawe raq apaiq rasetiim kong ka, rahai ikha wrakong phansangto. Kiimaq Apaiq jaqshisetiim kong ka, waniitu ikha phansangto,”

⁸ Shatmaq tiina Shiikeawe raq Ase miitu bom ka akha chongto: “O Shiikeawe lei, ümniiraq ümhokham jaqsham tlaü kriika, pattup pat-sa mitsing wan! Ümniiraq ümsengi mungmaiqse ka, tingting tri raütu sham laüta peng tlaü.

⁹ Ümniiriika tingting jaqsham kli lungwii tlaü, Abi jaqsham ka asaisi riitlaü. Arkha miitiina, ngi Üm Shiikeawe raq, ümniika shong wan kang. Kiimaq, ümniima ümkongti tiim tarü thaq na, chochi ajong pinthum shreng lap wan miitu, shong wan kang.”

¹⁰ Apaiq raq akha nguto, “O TATIWE lei, ümniiraq apha na mangjong hiq ara phansang wan laü; Kiimaq, ramungtan thun ka tiiq wan laü.

¹¹ Ara ra nai hiq thun arka athum mirki, Shatmaq, ümniika siruqli misi haü. Arthun arka, khu akhea riimki tlaq ikha, ariim mirki.

¹² Ümniiraq ra nai hiq thun arka damsii ikha, komshom shom mikom baiq haü. Kiimaq ra nai hiq thun arka, khu akhea riimki tlaq ikha ariim mirki. Shatmaq, ümniika pattup taqtaq li misi haü. Ümrilung ka akii wan nguta ahü.”

¹³ Shiikeawe raq rasetiim ashi ra ma dongdii min, “Ümniika ngi ma jaqtsi nü arjaq ngali liishaq, Ngi raq ümjaqti thun ka lap wan lata, ümji ni ma hüda ikha, mitiibum kuq wan ha shaq wiiwii,” ngutiika jangshi min ngu mak dea.

¹⁴ Riita, ikha jiila, rasetiim ka ju wiita? Tsangshiq ka winji kong. Tsangshiq ka Shiikeawe shiili liiti. Tsangshiq ka tiichhii wan rilung lap wanti maiqse angu thun kra khrumke miitu, Shiikeawe raq atiiki.