ESTHAR 1 - ASII LAKDAP Bible (BSI)

Hokhamnyung Washti Raq Hokhamwe Ahasueras Aming Roito

¹ Ara mra pin wantaq akhing arka Ahasueras raq hokham jaqsham wantaq akhing pat wa bomchong riito. Apaiq raq mung lang wantlaq maiqmung thun ka wang 127 na tiikho raüta peng wanto. Arka India mung maq pha wan raüta Ethiopia mung na saüli ham wanto.

² Kra akhing na Hokhamwe Ahasueras raq Susa chela maq si raüta mung ka lang wanto.

³ Apaiq raq Hokham jaqsham pha wanli maq wiitsam si raüta, awokhong na siti aki shiilangbi nai mungtubi ma awin naü phaqsea poi jonghea kloto. Parsia mung nai Media mung pengti phentu jongbi kiimaq wanghuptibi kiimaq welabi thun wiita tiithung raüta asi riito.

⁴ Kiijaq apaiq raq ahokham tsiiq nai nyam tum chiithe jonglu khushü kra jipi lütrok na saüli, mungmaiqse ma awin naü rinwiito.

⁵ Kra jai miishe hokhamwe raq Susa chela na siti chiithe lüwa kiimaq miitsan maiqse tarü hupli mungmaiqse ma lüwaja winnaü phaqsea poi jonghea ashi kloto. Ara phaqsea Poi arka ramiishi na saüli kloto. Arka hokhamwe jamkea na pepü ro kiijaq kloto.

⁶ Kra jamkea ka kheawai nai alü kheathum nai kheamin phusetiim ka müsaisai raihi-nairai raü na chan raüta, longchhai kham thun na chaq maq alo jinkomsetiim awa asi kiijaq khealü phusetiim nai kheawai phusetiim kra tiikha chan raqraq raüta jamkea thung kra tiimiikhiiq raüta tsomhea tiihongto. Kra keathung kiijaq chaq ngam maq nai kampho ngam maq alo sopha ngachang pahea asi riito. Kra keathung ka longchhai pen kiimaq rongshii phan phelspar long pen kiimaq achhai anyii thiitsinhea longpo phan kiimaq rongwai phan turkuois longsengpo maq ahai wan tsomhea riito.

⁷ Che ka chaqngam maq alo dangshaü koksetiim na tsüm raüta pheakuqto. Dangshaü koksetiim kiimin pongphan riiphan. Hokhamwe raq nokwe ma che ka chamtraq tiiphaq siqto.

⁸ Che nyangti miika hongto she nguta arai arü ka ahü. Hokhamwe raq ajaqshamtibi ma, nokwe raq jamkhii phaqsea wa lungwii tlaq, kiikha maiq loweatek raq maiqmii tsan roro miphaqsiq laq nguta aming kuqto.

⁹ Kiimahali Hokhamnyung Washti riimin hokham jam wangmong na jechakre ma winnaü poi phaqsea jonghea kloto.

¹⁰ Poi klo phaqsea ra miishe ranaiq she angu na, hokhamwe ka che nyang raüta atsan ahea polokhiq riito. Krai mren, apaiq raq akolibi wemiishi, Mehuman, Bijtha, Harbona, Bigtha, Abagtha, Jethar kiimaq Karkas kra heato.

¹¹ Raüta apaiq raq Hokhamnyung Washti ka hokham miirii maq tiimii raüta miki laq nguta tiishea wato. Kra thaütaq kriika, apaiq shamhea kra mungmaiqse ajong alabi ma mitiichhiki laq nguta heato.

¹² Shatmaq Hokhamnyung Washti raq hokhamwe aming kra taimak tleato. Kra ningkhan hokhamwe ka kai khiqto.

¹³ Riita ija akha akhek amu mra angu niika hokhamwe raq mungpeng thung tri asapti taksmabi rai riiwai wan lili riitlo. Krai mren, apaiq raq apaiq khrumti tsüwe tsitwebi ka tiiheaki raüta, kra kha ka jamkhii phochang wa nguta waito.

¹⁴ Akha akhek bom riiwai wan miitu akongtibi thun ka Karshena, Shethar, Admatha, Tarshish, Meres, Marsena kiimaq Memukan riito. Ara tsangshiq wela wemiishi arka Parsia mung nai Media mung na mung peng wan damti mungtubi thaq na ajong pinthum riito.

¹⁵ Apaiq raq ara tsangshiq ma, “Ngi Hokhamwe Ahasueras raq, ijaqshibi tiiwa lata Hokhamnyung Washti ka tiihea wakang. Shatmaq apaiq raq ngi aming ka roito! Riita nashiq thungtri na akha khü akha arka jamkhii phochang wa miraq? Kiimaq apaiq ka jamkhii riichang she wa miraq?” nguta tsangshiq ma waito.

¹⁶ Kiijiishe Menukan raq hokhamwe man na nai ajong alabi thung tlaq kra khaki na, tri ka akhiishe phoqto, “Singmung lei, tairong laq. Hokhamnyung Washti riika, hokhamwe shummii lamlam li ka riimak. Shatmaq apaiq sengi ajong alabi min wiita roito!

¹⁷ Jamkhano ngukla, ümchaü hokhamnyung raq jamlai wa shuttaq tsütsa ara tairaüta, hokhamwe mungtan na siti jechakre tarü riishe, ajamtiwe ka shummii shaqshaq li she mirwan. Raüta tsangshiq raq, ‘Hokhamwe Ahasueras raq Hokhamnyung Washti ka apaiq khaki na mikilaq nguta aming kuqto. Shatmaq hokhamnyung ka kimak dea riito,’ ngutiishe mirchong wan.

¹⁸ Ara hokhamnyung hon atsii tsütsa ka taiwi raüta, Parsia nai Media mung na siti, aki miikiim nyungre raq, ümchaü ranap ra min miwiishaq niili, ajamtiwe tiim ka mishummii wan. Krai mren, maiqhiqshong rap na achakre raq awesetiim ka shreng mak she miraq. Kiimaq awesetiim ka achaktiim ma tsankhiq miraq.

¹⁹ Riita, Chaü lei, ümniiraq thapthi tlaü jiika, ümchaü armiiphat Washti ka hokhamwe man na chapkai maimak she miitu ümniiraq aming kuqlaq. Kra aming ka Parsia mung nai Media mung na ümtiikiimin klai mak chang miitu tri raü miishe thüwan chang miraq. Kra laüta apaiq ngachang hokhamnyung ngacho ka apaiq thaq na maiqshaq shaqti miishe klai chang miraq.

²⁰ Riita hokhamwe aming ka ara ajong alu mungtan ara phoili minyam wan laq. Kra raüta jamti nyungre raq awese ka ngao asi ti min kiimaq ahüti min wiita ma ana mito wan laq.”

²¹ Ara bom ka hokhamwe nai shiilangbi thun raq Menukan bom rai mren tri ka tiihong thuto.

²² Ara tri raütu arka maiq aphan aphan bom maq waiq raüta, hokhamwe sengi awangtek na siti ma phea kuqto. Kiimaq maiq atatek na awese raq ajamkun ka lang wan chang nguta waiqto.